Paliya Bible
लेव्यवेवस्था 2
अन नी भेट नी रीती
जत्यार कोय यहोवा नी लेदे अन नी भेट चड़ाव्वा हींडे, ता तीहयो मयदो चड़ावे; अने तीनी पोर तेल नाखीन तीनी पोर लोबान मेके; अने तीहयो तीने हारुन ना सोरान तां लावे, जे पुंजारा से। अने तीहयो अन नी भेट ने तेल मीलावला मयदा मे गेथु आसम आपणी मुठ भरीन नीकाळे के लोबान तीनी मे आय जवा जोवे; अने पुंजारो तीमने फोम कराव्वा वाळा वाटा ना लेदे वेदी पोर धपाड़े के आहयु भगवान ना लेदे वारु गंदायवा वाळी भेट ठेरे। अने अन नी भेट मे जे बी बच जाय तीहयु हारुन नु अने तीना सोरा नु ठेरे; आहयो भगवान नी भेट मे गेथो आक्ठु मे चड़ाव्वा वाळो आखा गेथो चोखलो वाटो रेहे। जत्यार तु अन नी भेट ना लेदे चुला पोर चुड़ावलु चड़ावो चड़ावे, ता तीहया तेल मे मीलावला खमीर वगर ना मयदा ना फुलका, नीता तेल चोपड़ला खमीर वगर ना रोट्ला नो हयवा जोवे अने कदी तारो चड़ावो तवा पोर चुड़ावली अन नी भेट हय, ता तीहयो तेल चोपड़ला खमीर वगर ना मयदा नो रेवा जोवे; तीने टुकड़ा-टुकड़ा करीन तीनी पोर तेल नाखजे, ता तीहयी अन नी भेट हय जहे। अने कदी तारो चड़ावो कड़ाया मे तळली अन नी भेट हय, ता तीहयो तेल चोपड़ीन मयदा नो बणाव्वा जोवे। अने जे अन नी भेट आहयी चीज मे गेथी कानी नु बी बणलु हय तीने भगवान ना ह़ाते ली जाय; अने जत्यार तीने पुंजारान तां लावे, ता पुंजारो तीने वेदीन ता ली जाय। अने पुंजारो अन नी भेट मे गेथु फोम कराव्वा वाळो वाटो नीकाळीन वेदी पोर धपाड़े के तीहयु भगवान ना लेदे वारु गंदयवा वाळी आक्ठा नी भेट ठेरे; अने अन नी भेट मे गेथु जे बच जाय तीहयु हारुन नु अने तीना सोरा नु ठेरे; तीहयु भगवान ना हवन मे जादा चोखलो वाटो रेहे। कानी बी अन नी भेट जीने तमु भगवान ने चड़ावो, खमीर वगर नो बणाव्वा जोवे; तमु कदी बी हवन मे भगवान ना लेदे खमीर अने मोद नी धपाड़जो। तु तीने पेल्नी मेर ना चड़ावा ना रुप मे यहोवा नी लेदे चड़ावजे; पण वारु गंद वाळी भेट करीन आने वेदी पोर नी धपाड़वा जोवे। अळतेण आखी अन नी भेट ने मीठु नाखीन बणावजो; काहाके मीठु आपणा भगवान ह़ाते करला वायदा ने देखाड़े; आपणा आखा चड़ावा ह़ाते मीठु बी चड़ावजो। कदी तु भगवान ना लेदे पेल्नी मेर नी अन नी भेट चड़ावे, ता आह़फा नी पेल्नी मेर नी भेट नी लेदे गम नी लील्ली उंब्या ने आक्ठु मे भुंजीन उंब्या ने चोळीन नवला दाणा ने नीकाळीन अन नी भेट ना रुप मे चड़ावजो। अने तीनी पोर तेल नाखीन, अने तीनी उपर लोबान मेकजे; ता तीहयु अन नी भेट हय जहे। अने पुंजारो चोळीन नीकाळला दाणा ने, अने लोबान ने फोम कराव्वा वाळो वाटो करीन धपाड़ दे; तीहयो भगवान ना लेदे हवन ठेरे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.