Paliya Bible
लेव्यवेवस्था 1
होम नी बादा नी रीती
भगवान मुसा ने बोलाय्न मेळ वाळा तम्बु मे तीने केदो, ईस्रायल ना माणहु ने कीदे के तमारी मे गेथा कदी कोय माणेह भगवान ना लेदे जानवर नो चड़ावो चड़ावे, ता पाळन्या जानवर नी बादा नीता गाडरा-बोकड़ा मे गेथु एक रेवा जोवे। कदी पाळन्या जानवर नी होम बादा चड़ावे, ता वण-गुनाळ्ळो नर मेल-मीलाप वाळु तम्बु ना झापला पोर चड़ावो काहाके भगवान तीने ली लेय। तीहयो आह़फा नो हात होम नी बादा ना जानवर ना मुंडा पोर मेके, अने तीहयो तीनी लेदे पछतावो करवा ने मान लेहे। ता तीहयो ते वाछड़ु ने भगवान ना अगळ मारे; अने हारुन ना सोरा जे पुंजारो से तीहया लोय ने ह़ाते ली जाय्न तीहयी वेदी ना च्यारो-मेर छीड़के जे मेळ वाळा तम्बु ना झापला पोर से। अळतेण तीहयो होम बादा ना जानवर नी खाल ने नीकाळीन तीहया जानवर ना टुकड़ा-टुकड़ा करे; तत्यार हारुन पुंजारा ना सोरा वेदी पोर आक्ठु मेके, अने आक्ठु पोर लाकड़ा जमाड़ीन मेके; अने हारुन ना सोरा जे पुंजारा से तीहया मुंडु अने चरबी भेळ जानवर ना टुकड़ा ने वेदी ना आक्ठा पोर जमाड़ीन मेके; अने तीहया तीना आतड़ा ने अने पोगु ने पाणी वेर धोव्वा जोवे। तत्यार पुंजारो वेदी पोर आखु ने धपाड़वा जोवे के तीहयी होम बादा भगवान ना लेदे वारु अने वारु गंदायवा वाळी रेवा जोवे। कदी तीहया गाडरा नीता बोकड़ा नी होम बादा चड़ावे ता खामी वगर नो नर चड़ावे; अने तीहयो तीने भगवान ना अगळ वेदी ना धुराव भणी बादा चड़ावे; अने हारुन ना सोरा जे पुंजारा से तीहया तीना लोय ने वेदी ना च्यारो-मेर छाट देय। अने तीहयो तीना टुकड़ा-टुकड़ा करे, अने मुंडु अने चरबी ने अलग करे, अने पुंजारो आहयु आखु ने तीहया लाकड़ा पोर जमाड़ीन मेके जे वेदी ना आक्ठा पोर से। अने तीहयो तीना आतड़ा अने पोगु ने पाणी सी धोवे। अने पुंजारो आखु ने ह़ाते ली जाय्न वेदी पोर धपाड़े, तीहयी होम बादा भगवान ना लेदे वारु अने गंदायवा वाळी ठेरे। कदी तीहयो भगवान ना लेदे चड़ला नी होम बादा चड़ावे, ता हुली नीता पारवा नो चड़ावो चड़ाव्वा जोवे। पुंजारो तीने वेदी ना ह़ाते ली जाय्न तीनु गळु चमळीन मुंडु ने धोड़ गेथु अलग करे, अने वेदी पोर धपाड़वा जोवे; अने तीनु आखु लोय वेदी ना धेड़े पाड़जो; अने तीहयो तीना पाखड़ा अने पोटा ने वेदी ना उगवणी धेड़े, रोखड़ो नाखवा ना जागा मे नाख देवा जोवे। अने तीहयो तीने पाखड़ा ना वचे गेथु फाड़े, पण अलग नी करे। ता पुंजारो तीने वेदी ना आक्ठा ना लाकड़ा पोर मेकीन धपाड़े, तीहयी होम बादा भगवान ना लेदे वारली अने वारु गंदायवा वाळी ठेरे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.