Paliya Bible
यहोसु 4
फोम राखवा ना बारे दगड़ा
जत्यार तीहयी आखी जाती ना माणहु यरदन नंदी ने पार हय ज्या, ता यहोवा भगवान यहोसु ने केदो, “माणहु मे गेथा बारे अदमी, मतलब जाती पसळ एक-एक अदमी ने टाळीन आहयो हुकम आप, ‘तमु यरदन नंदी नी वच मे, जां ह़ारीक पुंजारा पोग मेकला हता तां गेथा बारे दगड़ा उचलीन तमारी ह़ाते पार ली लेवो, अने जां ह़ारीक आज नी राते नो पड़ावो रेहे तांत तीमने मेक देजो।’” ता यहोसु तीहया बारे अदमी ने, जीमने तीहयो ईस्रायली नी आखा जाती मे गेथा छाटीन ठेराय रेलो हतो, बोलावीन केदो, “तमु आपणा भगवान यहोवा नु मोट्लु पेटारु अगळ यरदन नंदी नी वचमे जाय्न ईस्रायली जाती नी गीनती नी अनसारे एक-एक दगड़ो उचलीन आह़फा-आह़फाम ना खांदा पोर मेको, जीनी सी आहयी तमारी वचमे सेलाणी ठेरे, अने अगा चालीन तमारा सोरा आहयु पुछे, ‘के आहया दगड़ा नु ह़ु मतलब से?’ ता तमु तीमने आहयो जपाप आपजो, के यरदन नंदी नु पाणी यहोवा भगवान ना वायदा नु पेटारु अगळ बे वाटा मे वटाय जेलु, काहाके जत्यार भगवान नु पेटारु नंदी पार करवा बाज रेलु, ता यरदन नंदी नु पाणी बे वाटा मे वटाय ज्यु। अने तीहया दगड़ा ईस्रायली माणहु ने जलमका फोम कराव्वा वाळा ठेरहे।”
यहोसु ना आहया हुकम नी अनसारे ईस्रायली माणहु कर्या, जेम यहोवा यहोसु ने केदलो हतो तेमेत तीहया ईस्रायली जाती नी गीनती नी अनसारे बारे दगड़ा यरदन नंदी नी वच मे गेथा चुट लेदा; अने तीमने आह़फाम नी ह़ाते ली जाय्न पड़ावा मे मेक देदा। अने यरदन नंदी नी वच मे, जां ह़ारीक पुंजारा भगवान ना वायदा नु पेटारु ने उचलीन पोग मेकला हता ता यहोसु बारे दगड़ा उबा कराड़्यो; तीहया आज बी तांत से। अने पुंजारा मोट्लु पेटारु उचलीन तीहयी टेमे तक यरदन नंदी नी वचमे उबा र्या जत्यार तक तीहयी आखी वात पुरी नी हय जी, अने यहोवा भगवान यहोसु ने जे हुकम आपलो तीहयोत हुकम मुसा माणहु ने केवा नो हुकम आपलो हतो। ता आखा माणहु उतवाळ्या पार हय ज्या; अने जत्यार आखा माणहु पार हय ज्या, ता पुंजारा अने यहोवा भगवान नु मोट्लु पेटारु बी तीमनी देखणते पार हय ज्यु। अने रुबेनी, गादी, अने मनस्से नी आदी जाती ना माणहु मुसान केवा नी अनसारे ईस्रायली माणहु नी अगळ झुमायवा ना हत्यार बांदीन पार ज्या; मतलब चाळीह हजार अदमी झुमायवा ना हत्यार लीन झुमायवा करीन यहोवा अगळ पार उतरीन यरीहोन्तां ना मयदान मे पुग्या। तीहया दाड़े यहोवा आखा ईस्रायली माणहु अगळ यहोसु नी बड़ाय कर्यो; अने जेम तीहया मुसा नी बीक मान्ता हता तेमेत तीनी बी बीक तीहयो जीवत्लो हतो तांह तक मान्ता र्या।
ता यहोवा यहोसु ने केदो, “वायदा नु पेटारु उचलवा वाळा पुंजारा ने हुकम आप के यरदन नंदी मे गेथा नीकळ आवे।” ता यहोसु पुंजारा ने हुकम आप्यो, “यरदन नंदी मे गेथा नीकळ आवो।” जेमेत यहोवा भगवान ना वायदा नु पेटारु ने उचलवा वाळा पुंजारा यरदन नंदी नी वचमे गेथा नीकळ आया, अने तीमना पोगु ह़ुकला जागा पोर पड़्या, तत्यारुत यरदन नंदी नु पाणी तीमना जागा पोर आय पड़्यु, अने पेलेन तेम धेकड़ पोर माय्न वयवा बाज ज्यु।
पेल्ला मयना ना दहवा दाड़े माणहु यरदन नंदी मे गेथा नीकळीन यरीहोन उगणली काकड़ पोर गीलगाल मे पड़ावो नाख्या। अने जे बारे दगड़ा यरदन नंदी मे गेथा नीकाळला हता, तीमने यहोसु गीलगाल मे उबा कर्यो। ता तीहयो ईस्रायलीम ने केदो, “अगा चालीन तमारा सोरा आह़फा-आह़फाम ना बाहु ने आहयु पुछे, ‘आहया दगड़ा नु ह़ु मतलब से?’ ता तमु आहयु कीन तीमने देखाड़जो, ‘आमु ईस्रायली माणहु यरदन नंदी ने ह़ुकला जागे चालीन पार करला।’ काहाके जेम तमारो भगवान यहोवा रात्ली दर्या ने आमु ने पार हयते तक अमारी अगळ गेथी ह़ुकाड़ीन सेटी कर रेलो हतो, तेमेत तीहयो यरदन नंदी नु पाणी बी तमने पार हयते तक तमारी अगळ गेथु सेटु करीन ह़ुकाड़ राख्यो; आनीन करते के कळी ना आखा देसु ना माणहु जाण लेय के यहोवा नो हात ताखत वाळो से; अने तमु जलमका आपणा यहोवा भगवान नी बीक मान्ता रेवो।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.