Paliya Bible
यहोसु 5
जत्यार यरदन नंदी नी बुडणली ह़ोड़ रेवा वाळा एमोरी ना आखा राजा, अने दर्या धेड़े रेवा वाळा कनानी ना आखा राजा आहयु ह़मळ्या, के यहोवा ईस्रायली माणहु ने नंदी पार हयते तक तीमनी अगळ गेथु यरदन नंदी नु पाणी सेटु करीन ह़ुकाड़ीन राख्यो, ता ईस्रायली माणहु ना बीक ना कारण सी तीमनु मन घबराय ज्यु, अने तीमना जीव मे जीव नी र्यो।
गीलगाल जागा मे ईस्रायली माणहु नु खतनु हयणु
तीहयी टेमे यहोवा यहोसु ने केदो, “चमकण्या दगड़ा ना चक्का बणावीन बीजी काव ईस्रायलीम नु खतनु कराय दे।” ता यहोसु चमकण्या दगड़ा ना चक्का बणावीन खतना नाम ना बड़ा पोर ईस्रायली माणहु नु खतनु करायो। अने यहोसु जे खतनु करायो, तीनो कारण आहयो से, के जेतरा झुमायवा नी लायक अदमी मीस्र देस मे गेथा नीकळला तीहया आखा मीस्र मे गेथा नीकळला ता जंगल नी वाटे मर जेला हता। जे अदमी मीस्र देस मे गेथा नीकळला हता तीमना आखा नु खतनु ते हय जेलु हतु, पण जेतरा तीमना मीस्र मे गेथा नीकळला अने जंगल नी वाटे पयदा हयला तीमनी मे गेथा कोय नु बी खतनु नी हयलु हतु। काहाके ईस्रायली माणहु ते चाळीह साल तक जंगल मे फीरता र्या, जत्यार तक तीहयी जाती ना माणहु, मतलब जेतरा झुमायवा नी लायक माणहु मीस्र देस मे गेथा नीकळला हता तीहया खत्तम नी हय ज्या, काहाके तीहया यहोवा भगवान नी वात नी मान्या; एतरे यहोवा भगवान ह़ाम खाय्न तीमने केदलो हतो, के जे देस मे तमारा आड़ा-बुड़ा ह़ाते ह़ाम खाय्न तमने आपही केदलो, अने तीनी मे दुद अने मोद ना झोरु वये, तीहयु देस मे तमने नी देखाड़ु।1 ता तीहया माणहु ना सोरा जीमने यहोवा तीमना जागा पोर पयदा करलो, तीमनु खतनु यहोसु पांह कराया, काहाके वाटे तीमनु खतनु नी हयवा ना कारण सी तीहया खतना वगर ना हता। अने जत्यार तीहयी आखी जाती ना माणहु नु खतनु हय ज्यु, ता तीहया वारु हय जते तक आह़फा-आह़फाम ना पड़ावा मे र्या। ता यहोवा यहोसु ने केदो, “तमारु नामबद्दी जे मीस्र देस मे हयली से तीने मे आज सेटी कर देदलो से।” करीन तीहया जागा नु नाम आज ना दाड़े तक गीलगाल2 पड़लु से।
एतरे ईस्रायली माणहु गीलगाल मे पड़ावो नाखीन र्या, अने तीहया यरीहो ना मयदान मे मयना ना चोवदवा दाड़े ह़ांतली टेमे तीवार वाळ्या।3 अने फसह तीवार ना बीजा दाड़े तीहया ते देस नी मेर मे गेथा खमीर वगर ना रोट्ला अने भुंजला दाणा बी खावा बाज ज्या। अने जे दाड़े तीहया ते देस नी मेर मे गेथु खावा बाज ज्या, तीहयात दाड़े ह़वारे गेथा मन्ना पड़वा बंद हय ज्या; अने ईस्रायलीम ने अगा अळी कारु बी मन्ना नी जड़्या, पण तीहया साल तीहया कनान देस नी मेर मे गेथु खादा।4
यहोसु अने तलवार लेदलो एक अदमी
जत्यार यहोसु यरीहोन्तां हतो ता तीहयो आह़फा ना डोळा उचा कर्यो, अने देख्यो, के हात मे एक मीयान मे गेथी नीकाळली तलवार लीन एक अदमी अगळ उबो हय र्यो; अने यहोसु तीनीन्तां ह़ाते जाय्न पुछ्यो, “ह़ु तु अमारी भणीन नो से, के अमारा वेरीम नी भणी नो?” ता तीहयो जपाप आप्यो, “नी; पण मे यहोवा भगवान ना मेळा नो मुख्यो हय्न हमणेत आवलो से।” ता यहोसु धरती पोर मोडा ना भरहे पड़ीन वांद्यो, अने तीने केदो, “तीना चाकर्या जुगु मारा मालीक नो ह़ु हुकम से?” यहोवा ना मेळा नो मुख्यो यहोसु ने केदो, “आह़फा ना खाहड़ा पोग मे गेथा नीकाळ दे, काहाके जे जागा पोर तु उबो हय र्यो तीहयो चोखलो से।” ता यहोसु तेमेत कर्यो।
Source notes (4)
- Cross-reference गीनती 14:28-35
- Footnote मुल मे, ढबळायो या सेटु कर्यो
- Cross-reference नीरगमन 12:1-13
- Cross-reference नीरगमन 16:35
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.