Paliya Bible
यहोसु 3
ईस्रायली माणहु नु यरदन नंदी पार करनु
यहोसु ह़वारे उठ्यो, अने आखा ईस्रायलीम ने ह़ाते लीन सीत्तीम मे गेथो नीकळीन यरदन नंदी ना काठे आयो; अने तीहया पार हयवा सी पेले तांत पड़ावो नाख देदा। अने तीन दाड़ा बाद मुख्या पड़ावा मे जाय्न माणहु ने आहयो हुकम आप्यो, “जत्यार तमु ने आपणा भगवान यहोवा ना वायदा नु मोट्लु पेटारु1 अने तीने उचलवा वाळा लेवी पुंजारा बी देखाव पड़े, ता आह़फाम ना जागे गेथा नीकळीन तीमनी पसळ-पसळ चालजो, पण तीमनी अने तमारी वचमे बे हजार हात नी आड़े-धेड़े फासलो रेवा जोवे; तमु पेटारु नी ह़ाते नी जजो। के तमु देख सको के तमने कानी वाटे माय्न जवा नु से, काहाके तमु हजु तक आहयी वाटे माय्न नी चाल्या।” अळतेण यहोसु माणहु ने केदो, “तमु आह़फा-आह़फाम ने चोखा करो; काहाके वाहणे ना दाड़े यहोवा तमारी वचमे वहराड़न्या काम करहे।” ता यहोसु पुंजारा ने केदो, “वायदा नु पेटारु उचलीन माणहु नी अगळ-अगळ चालो।” ता तीहया वायदा नु पेटारु उचलीन अगळ-अगळ चाल्या।
ता यहोवा यहोसु ने केदो, “आज ना दाड़े गेथो मे आखा ईस्रायली माणहु अगळ तारी बड़ाय करवा सुरु कर देही, जीनी सी तीहया जाण लेय के जेम मे मुसा ह़ाते रेतो हतो तेमेत तारी ह़ाते बी से। अने तु वायदा नु पेटारु ने उचलवा वाळा पुंजारा ने आहयो हुकम आप, ‘जत्यार तमु यरदन नंदी ना पाणी नी धेड़े पुगो, ता यरदन नंदी मे उबा रेजो।’”
ता यहोसु ईस्रायली माणहु ने केदो, “ह़ाते आवीन आपणा यहोवा भगवान ना बोलु ने ह़मळो।” अने यहोसु केवा बाज ज्यो, “आनी सी तमु जाण लेहु के जीवत्लो भगवान तमारी वचमे से, अने तीहयो तमारी अगळ गेथा सण्का कर्या वगर कनानी, हीत्ती, हीब्बी, परीज्जी, गीर्गासी, एमोरी, अने यबुसीम ने तीमना देस मे गेथा नीकाळ देहे। ह़मळो, आखी धरती ना मालीक ना वायदा नु पेटारु तमारी अगळ-अगळ यरदन नंदी ने पार करवा वाळु से। करीन हाव ईस्रायल नी जाती मे गेथा बारे अदमी ने टाळ लेवो, तीहया एक-एक जाती मे गेथा एक अदमी रेय। अने जे टेमे आखी धरती नो मालीक यहोवा ना वायदा नु पेटारु उचलवा वाळा पुंजारा ना पोगु यरदन नंदी ना पाणी मे मेकहे, तीहयी टेमे यरदन नंदी नु उपर गेथु वयत्लु पाणी उबु री जहे, अने ढेर हय्न उबु हय रेहे।”
एतरे जत्यार माणहु आह़फाम ना पड़ावा मे गेथा यरदन नंदीन पार जवा करीन नीकळ्या, अने पुंजारा वायदा नु पेटारु उचलीन माणहु नी अगळ-अगळ चाल्या, अने पेटारु ने उचलवा वाळा यरदन नंदीन्तां पुग्या, अने पेटारु ने उचलवा वाळा पुंजारा ना पोगु यरदन ना पाणी मे डुब ज्या यरदन नंदी नु पाणी ते वाडणी नी टेम तक ना आखा दाड़ा मे तीनी धेकड़े गेथु उपर-उपर वया करे, ता जे पाणी उपर गेथु वय्न आवतु हतु तीहयु घण नाम्बे, मतलब आदाम ह़ेर ने तां जे सारतान नी धेड़े से उबु रीन एक ढेर हय ज्यु, अने भीतड़ुन तेम उबु हय ज्यु, अने जे पाणी अराबा नी दर्या जे खारली दर्या बी केवाय, तीनी भणीन हय्न आवतु हतु, तीहयु पुरी रीते ह़ुक ज्यु; अने माणहु यरीहो नी अगळ पार उतर ज्या। अने पुंजारा यहोवा नु वायदा नु पेटारु उचलीन यरदन नंदीन वचा-वच पुगीन ह़ुकला जागा पोर एक जागे उबा र्या, अने आखा ईस्रायली माणहु ह़ुकला जागा पोरेत चालीन पार उतरता र्या, आखरी मे तीहयी आखी जाती ना माणहु यरदन नंदीन पार हय ज्या।
Source notes (1)
- Footnote वायदा नु मोट्लु पेटारु जीनी मे दह हुकम ना पट्या ने मेकता हता
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.