Paliya Bible
यहोसु 2
यरीहो ह़ेर मे यहोसु होगा ह़ला लेवा वाळा ने मोकलनु
ता नुन नो सोरो यहोसु बे होगात ह़ला लेवा वाळा ने सीत्तीम पड़ावा मे गेथा होगात मोकल्यो, अने तीमने केदो, “जाय्न तीहया देस यरीहो ने देखो।” तत्यारुत तीहया चाल पड़्या, अने राहाब नाम नी कानी छीनाळ्याण ना घोर मे जाय्न ह़ुय ज्या।1 ता कानो यरीहो ना राजा ने केदो, “आज राते थोड़ाक ईस्रायली माणहु अमारा देस ना बारा मे ह़ला लेवा करीन आञे आय र्या।” ता यरीहो नो राजो राहाब ने आसम केवाड़ मोकल्यो, “जे अदमी तारीन्तां आवला से ईमने बारा ली आव; काहाके तीहया आखा देस ना बारा मे ह़ला लेवा करीन आवला से।” तीहयी बयर तीहया बेम अदमी ने ह़ताड़ीन राखी; अने आहयी रीते केदी, “मारीन्तां थोड़ाक माणहु आवला ते खरा, पण मे नी जाणती के तीहया कां वाळा हता; अने जत्यार अंदारु हयु ता ह़ेर नु झापलु देवा बाज ज्या, ता तीहया नीकळ ज्या; मने नी मालम के तीहया कां ज्या; तमु उतवाळ करीन तीमनी पछळ जावो ता तीमने धर लेहु।” तीमने तीहयी घोर नी छत पोर चड़ावीन ह़ण्या तळे ह़ताड़ देदली जे तीहयी छत पोर ह़जाड़ीन मेक रेली। राजा ना माणहु यरदन नंदी नी वाटे-वाटे तीमने ह़ोदवा करीन घाटी तक जत र्या; अने जेम तीमने ह़ोदवा वाळा झापले गेथा नीकळ्या तेमेत झापलु ने दी देदा।
तीहया ह़ुया नीन पेले तीहयी बयर छत पोर तीमनीन्तां जाय्न तीहया अदमी ने केवा बाज जी, “मने पक्कु मालम से के यहोवा भगवान तमने आहयु देस आपलो से, अने आमने आखा ने तमारी बीक से, अने आहया देस ना आखा रेवा वाळा तमारा कारण सी घबराय र्या। काहाके आमु ह़मळला से के यहोवा भगवान तमने मीस्र देस मे गेथा नीकळवा नी टेमे तमारी अगळ रात्ली दर्या नु पाणी ह़ुकाड़ देदो। अने तमु सीहोन अने ओग नाम ना यरदन नंदीन पार रेवा वाळा एमोरी ना बेम राजा ने खत्तम कर नाखला से।2 अने आहयु ह़मळतेत अमारु मन घबराय आयु, अने तमारा कारण सी कोय मे बी जीव मे जीव नी र्यो; काहाके तमारो भगवान यहोवा उप्पर नु ह़रग अने हेटी नी धरती नो भगवान से। हाव मे जे तमारी पोर दया करली से, एतरे हाव तमु यहोवा नी ह़ाम खावो के तमु बी मारा बाह ना घोराणा पोर दया करहु, अने आनी खरली सेलाणी मने आपो, के तमु मारा आय्ह-बाहा, भायु अने बेन्या ने, अने जे कंय तीमनु से तीहयु आखु ने बी जीवत्लु रेवा देवो, अने अमारा आखा नो जीव मरवा सी बचाड़हु।” ता तीहया अदमी तीने केदा, “कदीम तु अमारी आहयी वात कोय अगळ उजन्ती नी करे, ता तमारा जीव ना बदले अमारो जीव जाय; अने जत्यार यहोवा भगवान आमने आहयु देस आपहे, ता आमु तारी ह़ाते दया अने सच्चाय सी वेहवार करहु।”
ता राहाब जीनु घोर ह़ेर नु मोट्लु भीतड़ु धेड़े बणलु हतु, अने तीहयी तांत रेती हती, तीहयी तीमने खीड़की मे गेथा दोड़ु ना भरहे उतारीन ह़ेर गेथा बारा कर देदी। अने तीहयी तीमने केदी, “बड़ा भणीन जत रेवो, आसम नी हय जाय के ह़ोदवा वाळा तमने देख लेय; एतरे जत्यार तक तमने ह़ोदवा वाळा पासा नी आवती रेय तांह तक, मतलब तीन दाड़ा तक तांत ह़ताय रेजो, अळतेण तमारी वाटे चाल पड़जो।” तीहया तीने केदा, “जे ह़ाम तु आमने खवाड़ली से तीना बारा मे आमु ते वण-गुनाळ्ळा रेहु। ह़मळ, जत्यार आमु आहया देस मे आवहु, ता जे खीड़की मे गेथा तु आमने उतारली से तीनी मे आहयीत रात्ला रंग नी ह़ुतळी नी दोरी बांद लेजे; अने तारा आय्ह-बाहा, भायु; अने तारा बाह ना आखा घोरल्या ने आहयात घोर मे तारीन्तां एक्ठा कर राखजे। ता जे कोय तारा घोर ना झापले गेथु बारु नीकळे, तीना खुन नो गुनेगार तीहयोत ठेरहे, अने आमु वण-गुनाळ्ळा ठेरहु: पण कदीम तारी ह़ाते घोर मे रीन बी काना माणेह नी मोत हये, ता तीना खुन नो गुनो अमारा माथे पड़हे। अने कदीम तु अमारी आहयी वात काना अगळ उजन्ती करे, ता जे ह़ाम तु आमु ने खवाड़ली से तीनी गेथा आमु छुट जहु।” तीहयी केदी, “तमारा बोलु नी अनसारे हये।” ता तीहयी तीमने वळाय देदी, अने तीहया जत र्या; अने तीहयी राल्ता रंग नी दोरी ने खीड़की मे बांद देदी।
तीहया जाय्न बड़ा पोर पुग्या, अने ह़ोदवा वाळा ने पासा आवते तक, मतलब तीन दाड़ा तक र्या; अने ह़ोदवा वाळा तीमने आखी वाटे ह़ोदता र्या अने तीमने कंखर नी जड़्या। ता तीहया बेम अदमी बड़ा पोर गेथा उतर्या, अने नंदीन पार जाय्न नुन ना सोरा यहोसुन्तां पुगीन जे कंय तीमनी पोर वीतली तीहयु आखु देखाड़ देदा। अने तीहया यहोसु ने केदा, “कंय बी सण्का कर्या वगर यहोवा तीहयु आखु देस अमारा हात मे कर देदलो से; अने आने सोड़ीन तीहया देस ना आखा रेवा वाळा अमारा कारण सी घबराय र्या।”
Source notes (2)
- Cross-reference ईब्रानीयो 11:31; याकुब 2:25
- Cross-reference नीरगमन 14:21; गीनती 21:21-35
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.