Skip to content
BibleKenya

Paliya Bible

यहोसु 1

भगवान यहोसु ने कनान देस ने जीकवा नो हुकम आपे

यहोवा भगवान ना चाकर्‌या मुसान मरवान अळतेण यहोवा भगवान तीना चाकर्‌या यहोसु ने जे नुन नो सोरो हतो केदो, “मारो चाकर्‌यो मुसो मर जेलो से; एतरे हाव तु उठ, केड़ बांद, अने आहया आखा माणहु ह़ाते यरदन नंदीन पार हय्‌न तीहया देस मे जा जीने मे मतलब ईस्‌रायली माणहु ने आपु। तीहया बोल नी अनसारे जे मे मुसा ने केदलो, मतलब जे-जे जागा पोर तमु पोग मेकहु तीहयो आखो मे तमने आप देम।1 जंगल अने तीहया लबानोन सी लगाड़ीन मोट्‌ली नंदी फरात तक, अने उगवणी ह़ोड़ मोट्‌ली दर्‌या तक हीत्‌तीम नु आखु देस तमारो वाटो ठेरहे। तु जीवत्‌लो रेही तांह तक तारी अगळ कोय बी माणेह तारो सामनो नी कर सके; जेम मे मुसा नी ह़ाते र्‌यो तेमेत तारी ह़ाते बी रेही; अने नी ते मे तने धोको देम, अने नी तने छोड़ु।2 एतरे हीम्‌मत राखीन टणको हय जा; काहाके जे देस ने आपवा नी ह़ाम मे आहया माणहु ना आड़ा-बुड़ा ह़ाते खादलो हतो तीनो हकदार्‌यो तु आमने करावही।3 आतरुत हये के तु हीम्‌मत राखीन अने वारु टणको हय्‌न जे नेम मारो चाकर्‌यो मुसो तने आपलो से तीहया आखा नी अनसारे करवा नी चोकसी करजे; अने तीनी सी नी ते डाखरी ह़ोड़ वळजे अने नी जमणी ह़ोड़, ता जां-जां तु जही तां-तां तारु काम पुरु हयहे। नेम नी आहयी कीताप तारा दीमाक मे गेथी कदी नी उतरवा जोवे, आनी मेत रात-दाड़ो धीयान लगाड़ राखजे, आनीन करते के जे कंय तीनी मे लीखलु से तीनी अनसारे करवा नी तु चोकसी करे; काहाके आसमेत करवा सी तारा आखा काम पुरा हयहे, अने तु ताखत वाळो बणही। ह़ु मे तने हुकम नी आप्‌यो? हीम्‌मत राखीन टणको हय जा; बीहे ना, अने तारु मन काचु ना करे; काहाके जां-जां तु जही तां-तां तारो भगवान यहोवा तारी ह़ाते रेहे।”

यहोसु नु माणहु ने हुकम आपणु

ता यहोसु माणहु ना मुख्‌या ने आहयो हुकम आप्‌यो, “पड़ावा मे एथान-एथा जाय्‌न माणहु ने आहयो हुकम आपो, के आह़फा-आह़फाम नी जुगु खाणु तीयार कर राखो; काहाके तीन दाड़ा सी पेले-पेले तमु ने आहयी यरदन नंदीन पार उतरीन तीहया देस ने आह़फाम ना हक मे करवा करीन जवा नु से जीने तमारो भगवान यहोवा तमारा हक मे आपवा वाळो से।”

अळतेण यहोसु रुबेनीयो, गादीयो, अने मनस्‌से नी आदी जाती ना माणहु ने केदो,4 “जे वात यहोवा नो चाकर्‌यो मुसो तमने केदलो के तमारो भगवान यहोवा तमने अराम आपे, अने आहयुत देस तमने आपहे, तीनी फोम करो। तमारा बयरा, बाळ-बच्‌चा, अने जानवरु ते आहया देस मे रेय जे मुसो तमने यरदन नंदी नी आहयीत धेड़े आपलो से, पण तमु जे ताखत वाळा से हत्‌यार बांदीन तमारा भायु नी अगळ-अगळ पार उतरीन चालो, अने तीमनी मदत करो; अने जत्‌यार यहोवा तीमने एवो अराम आपहे जेवो तीहयो तमने आप देदलो से, अने तीहया बी तमारा यहोवा भगवान ना आपला देस ना हकदार्‌या हय जहे; ता तमु तमारा हक मे ना देस मे, जे यहोवा नो चाकर्‌यो मुसो यरदन नंदी नी आहयी धेड़े उगवणी ह़ोड़ तमने आपलो से पासा आवीन आना हकदार्‌या बणहु।” ता तीहया यहोसु ने जपाप आप्‌या, “जे कंय करवा नो तु आमने हुकम आपलो से तीहयो आमु करहु, अने जां कंय तु आमने मोकलही तां आमु जहु। जेम आमु आखी वात मे मुसा नी मान्‌ता हता तेमेत तारी बी मान्‌या करहु; आतरु हयवा जोवे के तारो भगवान यहोवा जेम मुसा नी ह़ाते रेतो हतो तेमेत तारी ह़ाते बी रेय। कोय बी काहा नी हय जे तारा वीरोद मे बक-बक करे, अने जेतरा हुकम तु आपे तीमने नी माने, ता तीने मोत नो डंड जड़हे। पण तु टणको अने हीम्‌मत राखीन रे।”

Source notes (4)
  1. Cross-reference वेवस्‌थावीवरन 11:24-25
  2. Cross-reference नीरगमन 3:12; वेवस्‌थावीवरन 7:24; 31:6,8; ईब्‌रानीयो 13:5
  3. Cross-reference वेवस्‌थावीवरन 31:6,7,23
  4. Cross-reference गीनती 32:28,32; वेवस्‌थावीवरन 18:20

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.