Skip to content
BibleKenya

Paliya Bible

यहोसु 22

यहोसु उगवणी ह़ोड़ वहला ने पासो जवा केय

तीहयी टेमे यहोसु रुबेनी, गाद, अने मनस्‌से ना आदा घोराणा ना माणहु ने बोलावीन केदो, “जे-जे हुकम यहोवा नो चाकर्‌यो मुसो तमने आपलो तीहया आखा तमु मान्‌ला से, अने जे-जे हुकम मे तमने आपलो से तीमने बी तमु मान्‌ला से;1 तमु आह़फाम ना भाय ने एतरा दाड़ा मे आज तक ना दाड़े तक नी छोड़्‌या, अने आपणा भगवान यहोवा नो हुकम तमु चेतीन रीन मान्‌ला से। अने हाव तमारो भगवान यहोवा तमारा भायु ने तीना बोल नी अनसारे अराम आपलो से; एतरे हाव तमु आह़फा-आह़फाम ना पड़ावा मे, अने तमारा जागा मे, जीने यहोवा नो चाकर्‌यो मुसो यरदन नंदीन पार तमने आपलो से, जत रेवो। आहयीत वात नी पुरी चोकसी करजो के जे-जे हुकम अने नेम यहोवा नो चाकर्‌यो मुसो तमने आपलो से तीने मानीन आपणा भगवान ह़ाते मोंग राखो, तीनी आखी वाट्‌ये चालो, तीना हुकम ने मानो अने तीनी भक्‌ती करवा मे लागला रेवो, अने खुद ना आखा मन सी अने आखा जीव सी तीनी सेवा करो।” ता यहोसु तीमने बरकत आपीन तीमने मोकल देदो अने तीहया तीमना-तीमना पड़ावा मे जत र्‌या। मनस्‌से नु आदु घोराणु ने मुसो बासान मे वाटो आपलो हतो; पण बीजा आदा घोराणा ने यहोसु तीमना भायु नी वच मे यरदन नंदी नी बुडवणी ह़ोड़ वाटो आप्‌यो। तीमने जत्‌यार यहोसु मोकल्‌यो के आह़फा-आह़फाम ना पड़ावा मे जाय, ता तीमने बी बरकत आपीन केदो, “ढेरेत जानवरु, अने चांदी, ह़ोनु, पीतळ, लुहड़ु, अने ढेरेत लुगड़ा, अने ढेरेत धन-दवल्‌यत लीन आह़फा-आह़फाम ना पड़ावे जत रेवो; अने आपणा वेरी नु लुटलु धन ने खुद ना भायु ह़ाते वाटे लेजो।”

ता रुबेन, गाद, अने मनस्‌से नु आदु घोराणु ईस्‌रायलीन्‌तां गेथा, मतलब कनान देस ना सीलो ह़ेर मे गेथा, आह़फाम नी गीलाद नाम नी जागा मे, जे मुसा नी लारे आपली यहोवा भगवान ना हुकम नी अनसारे तीमनी जागा हय जेली हती, जवा ना वीच्‌यार सी पासा जत र्‌या।

यरदन नंदी ना काठे वेदी नु बणावणु

जत्‌यार रुबेनी, गादी, अने मनस्‌से नी आदी जाती यरदन नंदी नी तीहयी घाटी मे पुग्‌या जे कनान देस मे से, ता तीहया तां देखवा लायक एक मोट्‌ली वेदी बणाया। अने आनी खबर ईस्‌रायलीम ने ह़मळवा मे आयी, के रुबेनी, गादी, अने मनस्‌से नु आदु घोराणु कनान देस अगळ यरदन नंदी नी घाटी मे, मतलब तीनी बीजी धेड़ जे ईस्‌रायलीम नु से, एक वेदी बणाया। जत्‌यार ईस्‌रायली आहयु ह़मळ्‌या, ता ईस्‌रायली नी आखी मंडळी तीमनी ह़ाते झुमायवा करीन सीलो मे एकठी हयी। ता ईस्‌रायली रुबेनी, गादी, अने मनस्‌से नी आदी जाती ना माणहु गीलाद देस मे एलीयाजार पुंजारा ना सोरा पीनहास ने, अने तीनी ह़ाते दह मुख्‌या ने, मतलब ईस्‌रायल मे गेथी एक-एक जाती मे गेथा डाहला ना घोराणा ना एक-एक मुख्‌या ने मोकल्‌या, अने तीहया ईस्‌रायलीम ना हजारो मे आह़फा-आह़फाम ना डाहलाम ना घोराणा ना मुख्‌या अदमी हता। तीहया गीलाद देस मे रुबेनी, गादी, अने मनस्‌से नी आदी जातीन्‌तां जाय्‌न केवा बाज ज्‌या, “यहोवा नी आखी मंडळी आहयु केय, ‘तमु ईस्‌रायल ना भगवान यहोवा ने धोको देदला से; आज जे तमु एक वेदी बणाय लेदला से, आनी मे तमु तीनी पसळ चालवा छोड़ीन तीना वीरोद मे झगड़ो करला से?2 ह़मळो, पोर ह़ेर मे नो अधरम आपणी जुगु ह़ु कम हतो, ते बी यहोवा नी मंडळी ने घणो डंड जड़्‌यो ते बी आज ना दाड़े तक आमु तीहया अधरम सी चोखा नी हया; तीहयी वात तमारी नींगा मे नानी से ह़ु।3 के आज तमु यहोवा ने छोड़ीन तीनी पसळ चालवा छोड़ र्‌या? आज तमु यहोवा भणी गेथा फीर जेला से, अने वाहणे तीहयो ईस्‌रायली नी आखी मंडळी पोर रीह करहे। पण कदीम तमारी जागा वीटळ्‌ळी हय, ता पार आवीन यहोवा नी जागा मे, जां ह़ारीक यहोवा नु रेवा नु से, अमारी वच मे आह़फा-आह़फाम नी जागा हात कर लेवो; पण अमारा भगवान नी वेदी छोड़ीन अळी बीजी वेदी बणाय्‌न नी ते यहोवा ह़ाते झगड़ो करो अने नी अमारी ह़ाते। देखो, जत्‌यार जेरह नो सोरो आकान ह़ोपली चीज ना बारा मे धोको देदो, ता ह़ु यहोवा ईस्‌रायल नी आखी मंडळी पोर रीह नी कर्‌यो? अने तीहया माणेह ना अधरम नो मोत नो डंड एखला ने नी जड़्‌यो पण बीजा माणहु ने बी जड़्‌यो।’”4

ता रुबेनी, गाद, अने मनस्‌से नी आदी जाती ईस्‌रायल ना हजारो ना मुख्‌या माणहु ने आहयो जपाप आप्‌या, “यहोवा भगवान जे भगवान नो भगवान से, भगवान नो भगवान यहोवा आने जाणे, अने ईस्‌रायली बी आने जाण लेहे के कदीम यहोवा भणी गेथा फीरीन नीता तीनी ह़ाते धोको तोड़ीन आमु आहयु काम कर्‌या हय, ता तु आज आमने जीवत्‌ला ना छोड़े, कदीम आज ना दाड़े आमु वेदी ने आनीन करते बणाया हय के यहोवा पसळ चालवा छोड़ दीया, नीता आनीन करते के तीनी पोर होम बादा, अनबादा, नीता मेल-मीलाप नी बादा चड़ावे, ता यहोवा खुद आनो हीसाब लेय; पण आमु आहयात वीच्‌यार अने मन सी आहयु करला से के कंय माय्‌न अगा चालीन तमारी अवल्‌यात अमारी अवल्‌यात ने आहयु नी केवा बाज जाय, ‘तमु ने ईस्‌रायल ना भगवान यहोवा ह़ाते ह़ु काम? काहाके, ए रुबेनी, ए गादी, यहोवा जे अमारी अने तमारी वचमे यरदन नंदी ने काकड़ ठेरावला से, एतरे यहोवा मे तमारो कंय बी वाटो नी हय।’ आसम कीन तमारी अवल्‌यात अमारी अवल्‌यात मे गेथी यहोवा नी बीक ने सेटी कर देहे। एतरे आमु केदा, ‘आवो, आमु आपणी जुगु एक वेदी बणाय लीया, तीहयी होम बादा नीता मेलबादा जुगु नी, पण आनीन करते के अमारी अने तमारी, अने अमारीन अळतेण अमारी अने तमारी जाती नी वच मे गवा नी सेलाणी बणे; आनीन करते के आमु होम बादा, मेल-मीलाप नी बादा, अने बादा चड़ावीन यहोवा अगळ तीनी बड़ाय करे; अने अगा चालीन तमारी अवल्‌यात अमारी अवल्‌यात ने आहयु नी केवा जोवे, के यहोवा मे तमारो कंय बी वाटो नी हय।’ एतरे आमु केदा, ‘जत्‌यार तीहया माणहु अगा चालीन आमु ने नीता अमारी जाती ने आसम केवा बाज जाय, ता आमु तीमने केहु, के यहोवा नी वेदीन तेवी बीजी बणावली वेदी ने देखो, जीने अमारा आड़ा-बुड़ा होम बादा नीता मेलबादा जुगु नी बणाया; पण आनीन करते बणावला हता के अमारी अने तमारी वच मे गवाय नी सेलाणी बणे।’ आहयु अमारी गेथु सेटु रेवा जोवे के यहोवा भणी गेथा फीरीन आज तीनी पसळ चालवा छोड़ दीया, अने आपणा यहोवा नी वेदी ने छोड़ीन जे तीना रेवा ना जागा अगळ से होम बादा, अने अनबादा नीता मेलबादा जुगु बीजी वेदी बणावया।”

रुबेनी, गादी अने मनस्‌से नी आदी जाती ना माणहु आहयी वात ने ह़मळीन पीनहास पुंजारो अने तीनी ह़ाते मंडळी ना मुख्‌या, जे ईस्‌रायल ना हजारो ना मुख्‌या अदमी हता, तीहया घणा खुस हया। अने एलीयाजार पुंजारा नो सोरो पीनहास रुबेनी, गादी, अने मनस्‌से माणहु ने केदो, “तमु जे यहोवा नो आसम भरहो नी तोड़्‌या, आनी सी आमु आज आहयु जाण लेदा के यहोवा अमारी वच मे से: अने तमु ईस्‌रायलीम ने यहोवा ना हात सी गुनेगार ठेरवा सी बचाड़ला से।” ता एलीयाजार पुंजारा नो सोरो पीनहास मुख्‌या भेळ रुबेनी अने गादी माणहुन्‌तां गेथो गीलाद मे हय्‌न कनान देस मे ईस्‌रायलीम ने तां पासो जत र्‌यो: अने आहयी वात तीमने आखा ने ह़मळायो। ता ईस्‌रायली आखा खुस हया; अने यहोवा ने जुगाळो से केदा, अने रुबेनी अने गादी माणहु ह़ाते झुमायवा अने तीमनु रेवा नु देस उजाड़वा करीन झुमायवा नी वात अळी नी कर्‌या। अने रुबेनी अने गादी माणहु आहयु कीन, “आहयी वेदी अमारी अने तीमनी वच मे आहयी वात नी गवा ठेरली से, के यहोवा भगवानेत भगवान से।” तीहयी वेदी नु नाम एद5 पाड़्‌या।

Source notes (5)
  1. Cross-reference गीनती 32:20-32; यहोसु 1:12-15
  2. Cross-reference वेवस्‌थावीवरन 12:13,14
  3. Cross-reference गीनती 25:1-9
  4. Cross-reference यहोसु 7:1-26
  5. Footnote मतलब, गवा

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.