Paliya Bible
यहोसु 21
लेवीम ने ह़ेर आपणु
ता लेवीम ना डाहलाम ना घोराणा ना मुख्या-मुख्या माणहु एलीयाजार पुंजारा, अने नुन ना सोरा यहोसु, अने ईस्रायली जाती ना डाहलाम ना घोराणा ना मुख्या-मुख्या माणहुन्तां आवीन कनान देस ना सीलो ह़ेर मे केवा बाज ज्या, “यहोवा मुसा नी लारे आमु ने वहवा करीन ह़ेर, अने अमारा जानवरु जुगु चारवा नो जागो बी आपवा नो हुकम आपलो हतो।”1 ता ईस्रायली यहोवा केदलो तीनी अनसारे आह़फा-आह़फाम ना वाटा मे गेथा लेवी जाती ने चारवा ना जागा भेळ आहया ह़ेर आप्या। ता कहाती जाती ना नाम पोर चीट्ठी नीकळी। एतरे लेवी मे गेथा हारुन पुंजारा ना घोराणा ने यहुदा, सीमोन अने बीन्यामीन नी जाती मे ना वाटा मे गेथा तेरे ह़ेर जड़्या।
बीजा कहातीम ने एप्रेम नी जाती ना घोराणा, अने दान नी जाती, अने मनस्से नी आदी जाती ना वाटा मे गेथा चीट्ठी नाख-नाखीन दह ह़ेर आप्या।
अळतेण गेर्सोनीयो ने ईस्साकार नी जाती ना घोराणा, अने आसेर, अने नप्ताली नी जाती ना वाटा मे गेथा, अने मनस्से नी तीहया आदी जाती ना वाटा मे गेथा बी जे बासान मे हतो चीट्ठी नाख-नाखीन तेरे ह़ेर आप्या।
घोराणा नी अनसारे मरारीम रुबेन, गाद, अने जबुलुन ना वाटा मे गेथा बारे ह़ेर आप्या।
जे हुकम यहोवा मुसा नी लारे आपलो तीनी अनसारे ईस्रायली लेवीम ने चारवा ना जागा भेळ आहया ह़ेर चीट्ठी नाख-नाखीन आप्या। तीहया यहुदा अने सीमोनीम नी जातीम ना वाटा मे गेथा आहया ह़ेर जीमना नाम लीखला से आप्या; आहया ह़ेर लेवी कहाती घोराणा मे गेथा हारुन ना घोराणा जुगु हता; काहाके पेली चीट्ठी तीमनात नाम पोर नीकळली हती। मतलब तीहया तीमने यहुदा ना बड़ा वाळा देस मे च्यारो-मेर ना चारवा ना जागा भेळ कीर्यतर्बा ह़ेर आप देदा, जे अनाक ना बाह अर्बा ना नाम पोर केवाय अने हेब्रोन बी केवाय। पण तीहया ह़ेर ना खेतर अने तीना गाम तीहया यपुन्ने ना सोरा कालेब ने तीनो बाह वाटो करीन आप देदा।
ता तीहया हारुन पुंजारा ना घोराणा ने चारवा ना जागा भेळ खुनी ना आसरा ना ह़ेर हेब्रोन, अने तीमना-तीमना चारवा ना जागा भेळ लीब्ना, यत्तीर, एस्तमो, होलोन, दबीर, एन, युत्ता अने बेतसेमेस आप्या; आहयी रीते तीहया बेम जाती ना वाटा मे गेथा नव ह़ेर आप्या। अने बीन्यामीन ना वाटा मे गेथा तीमना-तीमना चारवा ना जागा भेळ आहया च्यार ह़ेर आप्या, मतलब गीबोन, गेबा, अनातोत अने अल्मोन। आहयी रीते हारुन घोराणा ना पुंजाराम ने तेरे ह़ेर अने तीमनो चारवा नो जागो जड़्यो। अळतेण बीजा कहाती लेवीम ना घोराणा ना वाटा ना ह़ेर चीट्ठी नाख-नाखीन एप्रेम नी जाती ना वाटा मे गेथा आप्या। मतलब तीमने चारवा ना जागा भेळ एप्रेम ना बड़ा मे वाळा देस मे खुनी नो आसरो लेवा नु सकेम ह़ेर आप्या, अळतेण तीमना-तीमना चारवा ना जागा भेळ गेजेर, कीबसेम, अने बेथोरोन; आहया च्यार ह़ेर आप्या। अने दान नी जाती ना वाटा मे गेथो तीमना-तीमना चारवा ना जागा भेळ, एलतके, गीब्बतोन, अय्यालोन, अने गत्रीम्मोन आहया च्यार ह़ेर आप्या। अने मनस्से नु आदु घोराणु ना वाटा मे गेथा तीमना-तीमना चारवा ना जागा भेळ तानाक अने गत्रीम्मोन; आहया बे ह़ेर आप्या। आहयी रीते बीजा कहाती जाती ना आखा ह़ेर चारवा ना जागा भेळ दह ठेर्या।
अळतेण लेवीम ना घोराणा मेना गेर्सोनीयो ने मनस्से नी आदी जाती ना वाटा मे गेथा तीमना-तीमना चारवा ना जागा भेळ खुनी नु आसरा नु ह़ेर बासान नु गोलान अने बेसतरा; आहया बेम ह़ेर आप्या। अने ईस्साकार नी जाती ना वाटा मे गेथो तीमना-तीमना चारवा ना जागा भेळ कीस्योन, दाबरत, यर्मुत, अने एनगन्नीम; आहया च्यार ह़ेर आप्या। अने आसेर नी जाती ना वाटा मे गेथा तीमना-तीमना चारवा ना जागा भेळ मीसाल, अब्दोन, हेल्कात, अने रहोब; आहया च्यार ह़ेर आप्या। अने नप्ताली नी जाती ना वाटा मे गेथा तीमना-तीमना चारवा ना जागा भेळ खुनी नु आसरा नु ह़ेर गलील नु केदेस, अळतेण हम्मोतदोर, अने कर्तान; आहया तीन ह़ेर आप्या। गेर्सोनीयो नी जाती नी अनसारे तीमना आखा ह़ेर तीमना-तीमना चारवा ना जागा भेळ तेरे ठेर्या। अळतेण बीजा लेवी, मतलब मरारी जाती ने जबुलुन नी घोराणा ना वाटा मे गेथा तीमना-तीमना चारवा ना जागा भेळ योकनाम, कर्ता, दीम्ना, अने नहलाल; आहया च्यार ह़ेर आप्या। अने रुबेन ना घोराणा ना वाटा मे गेथा तीमना-तीमना चारवा ना जागा भेळ बेसेर, यहसा, कदेमोत, अने मेपात; आहया च्यार ह़ेर आप्या। अने गाद ना घोराणा ना वाटा मे गेथा तीमना-तीमना चारवा ना जागा भेळ खुनी ना आसरा ना ह़ेर गीलाद मे नु रामोत, अळतेण महनेम, हेसबोन, अने याजेर, जे आखा मळीन च्यार ह़ेर से, आप्या। लेवीम नी बचली जाती मतलब मरारी नी जाती नी अनसारे तीमना आखा ह़ेर आहयात ठेर्या, आहयी रीते तीमने चीट्ठी नाखी-नाखीन बारे ह़ेर आप्या। ईस्रायलीम ना ह़ेर नी वचमे लेवीम ना आखा ह़ेर तीमना-तीमना चारवा ना जागा भेळ अड़तालीस ठेर्या। आहया आखा ह़ेर तीमना-तीमना च्यारो-मेर ना चारवा ना जागा भेळ ठेर्या; आहया आखा ह़ेर नी आहयीत हालत हती।
कनान देस पोर ईस्रायलीम नो पोर हक
आहयी रीते यहोवा ईस्रायलीम ने तीहयु आखु देस आप्यो, जीने तीहयो तीमना डाह-डाहा ने ह़ाम खाय्न आपवा केदलो; अने तीहया तीना हकदार्या हय्न तीनी मे वह ज्या। यहोवा तीहयी आखी वात नी अनसारे, जे तीहयो तीमना डाह-डाहा ने ह़ाम खाय्न केदलो हतो, तीमने च्यारो-मेर गेथो अराम आप्यो; अने तीमना वेरी मे गेथु कोय बी तीमनी अगळ टेक नी सक्यु; अने यहोवा भगवान तीमने आखा ने तीमना हक मे कर देदो।
जेतरी भलाय नी वात यहोवा ईस्रायलीम ना घोराणा ने केदलो तीहयी वात मे गेथी कानी वात बी नी छुटी; आखीन आखी पुरी हयी।
Source notes (1)
- Cross-reference गीनती 35:1-8; 1 ईतीहास 6:54-81
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.