Paliya Bible
यहोसु 20
आसरा ना ह़ेर नु ठेरावणु
अळतेण यहोवा भगवान यहोसु ने केदो,1 “ईस्रायलीम ने आहयु के, ‘मे मुसा नी लारे तमारी ह़ाते आसरा ना ह़ेर नी जे वात करलो तीनी अनसारे तीमने ठेराय लेवो, जीनी सी कानो भुलीन अंजाण्या मे काना ने मार नाखे, तीहयो तीमनी मे गेथा काना मे बी नाह जाय; एतरे तीहया ह़ेर खुन नो बदलो लेवा वाळा सी बचवा करीन तमारो आसरो आपण्यो जागो ठेरे। तीहयो तीहया ह़ेर मे गेथा काना बी ह़ेर मे नाह जाय, अने तीहया ह़ेर ना फाटे उबो हय्न तीना डायला ने आह़फा नी वात ह़मळावे; अने तीहया तीने तीमना ह़ेर मे तीमनीन्तां बोलाय लेय, अने तीने कानो जागो आपे, जीनी मे तीहयो तीमनी ह़ाते रेय। अने कदीम खुन नो बदलो लेवा वाळो तीनी पछळ आवे, ता तीहया मारवा वाळा ने तीना हात मे नी ह़ोपे; काहाके तीहयो जाण्या वगर तीनी ह़ाते वाळा ने मारलो से, अने ह़ाते वाळा ना वीरोद मे कंय बी रीह नी हती। अने जत्यार तक तीहयो मंडळी नी अगळ आह़फा नो नीयाव जुगु उबो नी हये, अने जत्यार तक तीहया बेम जणा नो मोट्लो पुंजारो मरी नी जाय, तांह तक तीहयो तीहयात ह़ेर मे रेय; आनीन अळतेण तीहयो मारवा वाळो तीना ह़ेर मे पासो आवीन जीनी मे गेथो तीहयो नाह जेलो हतो तीना घोर मे पासो रेवा बाज जाय।’” अळतेण तीहया नप्ताली ना बड़ा मे वाळु देस मे गलील ना केदेस ना ह़ेर ने, अने एप्रेम ना बड़ा मे वाळु देस मे सकेम ने, अने यहुदा ना बड़ा मे वाळु देस मे कीर्यतर्बा ने, जे हेब्रोन बी केवाय आसरा ना ह़ेर ठेरायो। अने यरीहोन्तां यरदन नंदी नी उगवणी धेड़े तीहया रुबेन नी जाती ना वाटा मे बेसेर ने, जे जंगल मे चपाट जागा मे वहलु से, अने गाद नी जाती ना वाटा मे गीलाद ना रामोत ने, अने मनस्से नी जाती ना वाटा मे बासान ना गोलान ने ठेराया। आखा ईस्रायलीम नी जुगु, अने तीमनी वचमे रेवा वाळा बीजा देस वाळा जुगु बी, जे ह़ेर आहयी हेर करीन ठेरावला से के जे कोय काना माणेह ने भुलचुक मे मार देय तीहयो तीहया ह़ेर मे गेथा काना ह़ेर मे नाह जाय, अने जत्यार तक नीयाव जुगु मंडळी अगळ उबो नी हये, तांह तक खुन नो बदलो लेवा वाळो तीने मारवा नी जोवे, तीहया आहयात से।
Source notes (1)
- Cross-reference गीनती 35:9-34; वेवस्थावीवरन 4:41-43; 19:1-13
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.