Paliya Bible
यहोसु 19
सीमोन ना घोराणा ने आपलो वाटो
बीजी चीट्ठी सीमोन ना नाम पोर नीकळी, मतलब सीमोनी जाती नी अनसारे तीमना घोराणा ना नाम पोर नीकळी; अने तीमनो वाटो यहुदाम ना वाटा नी वच मे ठेर्यो। तीमना वाटा मे आहया ह़ेर से, मतलब बेर्सेबा, सेबा, मोलादा,1 हसर्सुवाल, बाला, एसेम, एलतोलद, बतुल होर्मा, सीकलग, बेत्मकार्बोत, हससुर्सा, बेतलबावोत, अने सारुहेन; आहया तेरे ह़ेर अने तीमना गाम ईमने जड़्या। अळतेण एन, रीम्मोन, एतेर, अने आसान, आहया च्यार ह़ेर गाम भेळ; अने बालत्बेर जे दखणाव देस नु रामाह बी केवाय, तां तक आहया ह़ेर नी च्यारो-मेर ना आखा गाम बी ईमने जड़्या। सीमोनी जाती नो वाटो तीमना घोराणा नी अनसारे आहयोत ठेर्यो। सीमोन नी जातीम नो वाटो ते यहुदा घोराणा ना वाटा मे गेथो आप्या; काहाके यहुदा घोराणा नो वाटो तीमनी जुगु घणो ढेरको हतो, करीन सीमोन नी जाती नो वाटो ईमनीत वचमे ठेर्यो।
जबुलुन ना घोराणा ने आपलो वाटो
तीसरी चीट्ठी जबुलुनी जाती नी अनसारे तीमना नाम पोर नीकळी। अने तीमना वाटा नी काकड़ सारीद तक पुगी; अने तीमनी काकड़ बुडवणी ह़ोड़ मरला नाम ना जागे हतीन दब्बेसेत मे पुगी, अने योकनाम ना अगळ ना कोतड़े तक पुगी; अळतेण तीहयी काकड़ सारीद गेथी उगवणी ह़ोड़ वळीन कीसलोत्ताबोर नी काकड़ तक पुगी, अने तां गेथी अगी जाय्न दाबरत मे नीकळी, अने यापी भणीन जाय्न नीकळी; तां गेथी तीहयी उगवणी भणीन जाय्न गथेपेर अने ईत्कासीन मे जत री, अने तीहया रीम्मोन मे नीकळी जे नेवा भणी फेललु से; तां गेथी तीहयी काकड़ तीनी धुराव भणी वळीन हन्नातोन पोर पुगी; अने यीप्तहेल नी घाटी मे जाय्न नीकळी; कत्तात, नहलाल, सीम्रोन, यीदला, अने बेतलहम; आहया बारे ह़ेर तीमना गाम भेळ तीहयात वाटा ना ठेर्या। जबुलुनीम नो वाटो तीमना घोराणा नी अनसारे आहयोत ठेर्यो; अने तीनी मे तीमना गाम भेळ आहयात ह़ेर से।
ईस्साकार ना घोराणा ने आपलो वाटो
चोवथी चीट्ठी ईस्साकार नी जाती नी अनसारे तीमना नाम पोर नीकळी। अने तीमनी काकड़ यीज्रेल, कसुल्लोत, सुनेम, हपारेम, सीवोल, अनाहरत, रब्बीत, कीस्योन, एबेस, रेमेत, एनगन्नीम, एनहद्दा, अने बेत्पस्सेस तक पुगी। अळतेण तीहयी काकड़ ताबोर, सहसुमा अने बेतसेमेस तक पुगी, अने तां गेथी यरदन नंदी पोर जाय नीकळी; आहयी रीते ईमने ह़ोळ्ळे ह़ेर तीमना गाम भेळ जड़्या। जाती नी अनसारे ईस्साकारीयो नी जाती नो वाटो ह़ेर अने गाम भेळ आहयोत ठेर्यो।
आसेर ना घोराणा ने आपलो वाटो
पांचवी चीट्ठी आसेरीम ना घोराणा नी जाती नी अनसारे तीमना नाम पोर नीकळी। तीमनी काकड़ मे हेल्कात, हली, बेतेन, अक्साप, अलाम्मेल्लेक, अमाद, अने मीसाल हता; अने तीहयी काकड़ बुडवणी ह़ोड़ कार्मेल तक अने सीहोर्लीन्बात तक पुगी; अळतेण तीहयी उगवणी वळीन बेतदागोन मे जत री, अने जबुलुन ना वाटा तक, अने यीप्तहेल नी घाटी गेथी धुराव भणी हय्न बेतेमेक अने नीयल तक पुगी; अने धुराव भणी जाय्न काबुल पोर नीकळी, अने तीहयी एब्रोन, रहोब, हम्मोन, अने काना मे हय्न मोट्ला सीदोन मे पुगी; तां गेथी तीहयी काकड़ वळीन रामाह मे हतीन सोर नाम ना कीला वाळा ह़ेर तक जत री; अळतेण काकड़ होसा भणीन वळीन अने अकजीब ने तां ना देस मे हय्न दर्या पोर नीकळी, उम्मा, अपेक, अने रहोब, बी तीमना वाटा मे ठेर्या; आहयी रीते बावीस ह़ेर तीमना गाम भेळ तीमने जड़्या। जाती नी अनसारे आसेरीम ना घोराणा नो वाटो ह़ेर अने गाम भेळ आहयोत ठेर्यो।
नप्ताली नी जाती ने आपलो वाटो
छट्टी चीट्ठी नप्ताली ना घोराणा नी अनसारे तीमना नामे नीकळी। अने तीमनी काकड़ हेलेप गेथी, अने सानन्नीम ना वांज्या झाड़ गेथी, अदामीनेकेब अने यब्नेल माय्न, अने लक्कुम मे जाय्न यरदन नंदी पोर नीकळी; तां गेथी तीहयी काकड़ बुडवणी ह़ोड़ वळीन अजनोत्ताबोर मे जी, अने तां गेथी हुक्कोक मे पुगी, अने दखणाव ह़ोड़, अने जबुलुन ना वाटा तक, अने बुडवणी ह़ोड़ आसेर ना वाटा तक, अने उगवणी ह़ोड़ यहुदा ना वाटान्तां नी यरदन नंदीन्तां नीकळी। अने तीमना कीला वाळा ह़ेर आहया से, मतलब सीद्दीम, सेर, हम्मत, रक्कत, कीन्नेरेत, अदामा, रामाह, हासोर, केदेस, एद्रेई, एन्हासोर, यीरोन, मीगदलेल, होरेम, बेतनात, अने बेतसेमेस; आहया उन्नीस ह़ेर अने गाम भेळ ईमने जड़्या। घोराणा नी अनसारे नप्ताली जाती नो वाटो ह़ेर अने गाम भेळ आहयोत ठेर्यो।
दान ना घोराणा ने आपलो वाटो
ह़ातवी चीट्ठी जाती नी अनसारे दान ना घोराणा ना नाम पोर नीकळी। अने तीमना वाटा नी काकड़ मे सोरा, एसतावोल, ईरसेमेस, सालब्बीन, अय्यालोन, यीतला, एलोन, तीम्ना, एक्रोन, एलतके, गीब्बतोन, बालात, यहुद, बनेबराक, गत्रीम्मोन, मेयकोर्न, अने रक्कोन ठेर्या, अने यापो नी अगळ नी काकड़ बी तीमनी हती। अने दान जाती नो वाटो आनी गेथो जादा हय ज्यो, मतलब दान जाती ना माणहु लेसेम मे रेवा वाळा ह़ाते झुमाय पड़्या, अने तीने तलवार वेर मारीन हक मे कर लेदा, अने तीने आह़फाम ना हक मे करीन तीनी मे वह ज्या, अने तीमना कुळ ना पेल्ना अदमी ना नाम पोर लेसेम नु नाम दान पाड़्या।2 घोराणा नी अनसारे दान जाती नो वाटो ह़ेर अने गाम भेळ आहयोत ठेर्यो।
यहोसु ने बी जागा नो वाटो जड़नु
जत्यार देस ने वाटो पाड़वा नु काम खत्तम हयु, ता ईस्रायली नुन ना सोरा यहोसु ने बी आह़फाम नी वचमे वाटो आप्या। यहोवा केदलो तीनी अनसारे तीहया तीने तीहयो मांग्यो तीहयु ह़ेर आप्या, आहयु एप्रेम ना बड़ा मे वाळु तीन्मत्सेरह से; अने तीहयो तीहयु ह़ेर ने पासो वारु ह़ुदारीन तीनी मे रेवा बाज ज्यो। जे-जे वात एलीयाजार पुंजारो, अने नुन नो सोरो यहोसु, अने ईस्रायलीम ना जाती ना घोराणा ना डाहला ना मुख्या-मुख्या अदमी सीलो मे, मळवा वाळा तम्बु ना झापले, यहोवा अगळ चीट्ठी नाखी-नाखीन वाट देदा तीहया आहयात से। करीन तीहया देस वाटो पाड़वा नु काम खत्तम कर्या।
Source notes (2)
- Cross-reference 1 ईतीहास 4:28-33
- Cross-reference न्यायीयो 18:27-29
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.