Paliya Bible
यहोसु 18
बचला जागा ने वाटणु
अळतेण ईस्रायली माणहु नी आखी मंडळी सीलो ह़ेर मे एक्ठा हय्न तां भगवान नी हजुरी नु तम्बु ने उबु कर्या; काहाके देस तीमना हक मे हय जेलु हतु। अने ईस्रायली मे गेथी ह़ात जाती आह़फा-आह़फाम नो वाटो लीया वगर री जेली हती। ता यहोसु ईस्रायली माणहु ने केदो, “जे देस तमारा आड़ा-बुड़ाम नो भगवान यहोवा तमने आपलो से, तीने तमारा हक मे कर लेवा करीन तमु कारु तक ढीलाय करता रेहु? हाव एक-एक जाती मे गेथा तीन-तीन माणहु ने टाळ लेवो, अने मे तीमने आनीन करते मोकलही के तीहया जाय्न देस मे चाले फीरे, अने आह़फा-आह़फाम नी जाती ना वाटा ना जुगाड़ नी अनसारे तीना बारा मे लीखी-लीखीन मारीन्तां पासा आवती रेय। अने तीहया देस ना ह़ात वाटा लीखहे, यहुदी ते दखणाव भणी आह़फाम ना वाटा मे, अने युसुफ ना घोराणा ना माणहु धुराव भणी तीमना वाटा मे रेहे। अने तमु देस ना ह़ात वाटा लीखीन मारीन्तां ली आवो; अने मे आञे तमारी जुगु आपणा भगवान यहोवा अगळ चीट्ठी नाखही। अने लेवीम नो तमारी वचमे कंय बी वाटो नी रेय, काहाके यहोवा नो आपलो पुंजारा नो जागोत ईमनो वाटो से; अने गाद रुबेन, अने मनस्से ना आदी जाती ना माणहु यरदन नंदी नी उगवणी धेड़ यहोवा नो चाकर्यो मुसो आपलो तीहयो वाटो हात कर लेदला से।”
ता तीहया अदमी उठीन चाल पड़्या; अने जे तीहया देस ना बारा मे लीखवा चाल्या तीमने यहोसु आहयो हुकम आप्यो, “जाय्न देस मे फीरो, अने तीना बारा मे लीखीन मारीन्तां आवती रेवो; अने मे आञे सीलो मे यहोवा नी अगळ तमारी जुगु चीट्ठी नाखही।” ता तीहया अदमी चाल पड़्या, अने तीहया देस मे फीर्या, अने तीहया ह़ेर ने ह़ात वाटा करीन तीना बारा मे कीताप मे लीखीन सीलो ना पड़ावा मे यहोसुन्तां आया। ता यहोसु सीलो मे यहोवा भगवान अगळ तीमनी जुगु चीट्ठी नाख्यो; अने तांत यहोसु ईस्रायली माणहु ने तीमना वाटा नी अनसारे देस ने वाट देदो।
बीन्यामीन नी जाती ने आपलो वाटो
बीन्यामीन जाती नी चीट्ठी तीमना घोराणा नी अनसारे नीकळी, अने तीमनो वाटो यहुदा अने युसुफ नी जाती नी वचमे पड़्यो। अने तीमनी दखवरी काकड़ यरदन नंदीन्तां गेथी सुरु हयी, अने यरीहो नी धुराव भणी चड़तीन बुडवणी ह़ोड़ बड़ा वाळा देस मे हय्न बेतावेन ना जंगल मे पुगी; तां गेथी काकड़ लुज मे पुगी जे बेतेल बी केवाये, अने लुज नी दखणाव भणी हतीन हेट्ला बेथोरोन नी दखणाव भणी ना बड़ा मे हय्न अत्रोतद्दार मे जत री। अळतेण बुडणली काकड़ वळीन बेथोरोन नी अगळ अने दखणाव भणी ना बड़ा मे हतीन कीर्यतबाल नाम ना यहुदा ना एक ह़ेर ने तां नीकळी जे कीर्यात्यारीम बी केवाय; बुडवणी नी काकड़ आहयीत ठेरी। अळतेण दखणाव भणी नी काकड़ बुडवणी गेथी सुरु हय्न कीर्यात्यारीम नी धेड़े गेथी नीकळीन नेप्तोह ना झोर पोर पुगी; अने तीहया बड़ा नी धेड़े नीकळी, जे हीन्नोम ना सोरा नी घाटी नी अगळ अने रपाईम नाम नी घाटी नी धुराव भणी से; अने तां गेथी हीन्नोम नी घाटी मे, मतलब यबुसी नी दखणाव भणी हय्न एनरोगेल झोर ने तां पुगी; तां गेथी तीहयी धुराव भणी वळीन एनसेमेस भणीन नीकळीन तीहयु गलीलोत भणीन जी, जे अदुम्मीम ना चड़ाव नी अगळ से, अळतेण तां गेथी तीहयी काकड़ रुबेन ना सोरा बोहन ना दगड़ा तक जत री; तां गेथी तीहयी धुराव भणी जाय्न अराबा नी अगळ ना बड़ा भणीन हय्न यरदन नी घाटी मे जत री; तां गेथी तीहयी काकड़ बेथोग्ला नी धुराव मे हय्न खारली दर्यान नी दखणाव मे हय्न यरदन नंदी ना मोडा पोर नीकळी; दखणाव नी काकड़ आहयीत ठेरी। अने उगवणी ह़ोड़ नी काकड़ यरदन नंदीत ठेरी। बीन्यामीन नी जाती नो वाटो, च्यारो-मेर नी काकड़ भेळ, तीमनी जाती नी अनसारे, आहयोत ठेर्यो।
बीन्यामीन नी जाती ने तीमनी जाती नी अनसारे आहया ह़ेर जड़्या, मतलब यरीहो, बेथोग्ला, एमेक्कसीस, बेतराबा, समारेम, बेतेल, अब्बीम, पारा, ओप्रा, कपरम्मोनी, ओप्रनी अने गेबा; आहया बारे ह़ेर अने तीमना गाम जड़्या। अळतेण गीबोन, रामाह, बेरोत, मीस्पे, कपीरा, मोसा, रेकेम, यीर्पेल, तरला, सेला, एलेप, यबुसी, जे यरुसलेम बी केवाय, गीबत, अने कीर्यत; आहया चोवदे ह़ेर अने ईमना गाम ईमने जड़्या। बीन्यामीन जाती ने तीमनो वाटो तीमना घोराणा नी अनसारे आहयोत ठेर्यो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.