Paliya Bible
यहोसु 17
बुडवणी ह़ोड़ मनस्से जाती नो वाटो
अळतेण युसुफ ना मोट्ला सोरा मनस्से नी जाती नो वाटो चीट्ठी नाखवा सी आहयो ठेर्यो। मनस्से नो मोट्लो सोरो, गीलाद नो बाह माकीर, झुमायण्यो, योद्दा हतो करीन तीना घोराणा ने गीलाद अने बासान देस आप्या। एतरे आहयो वाटो बीजा मनस्से ना बीजा सोरा जुगु तीमना घोराणा नी अनसारे ठेर्यो, मतलब अबीयेजेर, हेलेक, अस्रीएल, सकेम, हेपेर, अने समीदा; जे आह़फा-आह़फाम नी जाती नी अनसारे युसुफ ना सोरा मनस्सेम ना घोराणा ना अदमी हता, तीमना अलग-अलग घोराणा जुगु ठेर्यो। पण हेपेर जे गीलाद नो सोरो, अने माकीर नो सोरा नो सोरो, अने मनस्से नो सोरा ना सोरा नो सोरो हतो, तीना सोरा सलोफाद ना एक बी सोरा नी हता आखा सोर्यात हता; अने तीमना नाम महला, नोवा, होग्ला, मील्का, अने तीर्सा से। ता तीहया सोर्या एलीयाजार पुंजारा, नुन ना सोरा यहोसु, अने मुख्यान्तां जाय्न केवा बाज ज्या, “यहोवा भगवान मुसा ने हुकम आपलो हतो, के तीहयो आमने अमारा ह़गला नी वचमे वाटो आपे।” ता यहोसु यहोवा ना हुकम नी अनसारे तीमने तीमना काकाम नी वचमे वाटो आप्यो।1 ता मनस्से ने, यरदन नंदीन पार गीलाद देस अने बासान देस मे छोड़ीन, दह वाटा अळी जड़्या: काहाके मनस्सेम नी जाती नी वच मे मनस्से ना सोर्या ने बी वाटो जड़्यो। अने मनस्से जाती वाळा बीजाम ने गीलाद देस जड़्यु।
मनस्से नी काकड़ आसेर गेथी लगाड़ीन मीकमतात तक हती, जे सकेम नी उगवणी ह़ोड़ से; अळतेण तीहयी काकड़ दखणाव भणी एनतप्पुह ना रेवा वाळा भणीन तक जत री। तप्पुह नी जागा ते मनस्से ने जड़ी, पण तप्पुह ह़ेर जे मनस्से नी काकड़ पोर वहलु से तीहयु एप्रेम जाती ना हक मे हतु। अळतेण तीहयी काकड़ तां गेथी काना नाम ना कोतड़ान्तां माय्न उतरीन तीनी दखणाव भणी तक पुग जी; आहया ह़ेर मनस्से ना ह़ेर नी वचमे हता ते बी एप्रेम ना ठेर्या; अने मनस्से नी काकड़ तीहया कोतड़ा नी धुराव भणी हतीन दर्या पोर नीकळी; दखणाव भणी नु देस ते एप्रेम नी जाती ने जड़्यु अने धुराव भणी नु देस मनस्से ने जड़्यु, अने तीनी काकड़ दर्या ठेरी; तीमनी काकड़ धुराव भणी आसेर मे अने उगवणी ह़ोड़ ईस्साकार मे जाय्न भेसकाय जी। अने मनस्से ने, अने ईस्साकार अने आसेर आह़फा-आह़फाम ना ह़ेर भेळ बेतसान, यीबलाम, अने आह़फाम ना ह़ेर दोर ह़ेर मे रेवा वाळा, अने आह़फाम ना ह़ेर भेळ एनदोर ह़ेर ना रेवा वाळा, अने आह़फाम ना ह़ेर भेळ तानाक ह़ेर ना रेवा वाळा अने आह़फाम ना ह़ेर भेळ मगीद्दो ह़ेर ना रेवा वाळा, आहया तीनोव जे उचा जागा मे वहला से जड़्या। पण मनस्से नी जाती वाळा तीहया ह़ेर मे रेण्या ने ह़ेर मे गेथा नी नीकाळ सक्या; एतरे तीहया कनानी तीहया देस मे हीम्मत भेळ वहला र्या।2 ते बी ईस्रायली जत्यार ताखत वाळा हय ज्या, ता कनानी माणहु ने जबराण ते काम कराव्वा बाज ज्या, पण तीमने पुरी रीते नीकाळ्या नी।
एप्रेम अने मनस्से जाती नी लारे जादा जागो मांगणु
युसुफ नी अवल्यात यहोसु ने केवा बाज ज्यी, “अमारी गीनती ते घणी से, काहाके हजु तक यहोवा आमु ने बरकतेत आपतो आय र्यो, ता तु अमारा आखा देस जुगु चीट्ठी नाखीन काहा एकीत वाटो आप र्यो?” यहोसु तीमने केदो, “तमु गीनती मे जादा से, अने एप्रेम नु बड़ा मे वाळु देस तमारी जुगु नानु हय, ता जे परीज्जी अने रपाई जाती नु देस जे जंगल से तीनी मे जाय्न झाड़का ने वाड देवो।” युसुफ नी अवल्यात केदी, “तीहयु बड़ा मे वाळु देस अमारी जुगु नानु से; अने बेतसान अने तीना ह़ेर मे रेवा वाळा अने यीज्रेल नी घाटी मे रेवा वाळा, जेतरा कनानी हेट्ला देस मे रेय, तीमनी आखा पांह लुहड़ा ना घोड़ा-गाड्या से।” ता यहोसु, ह़ु एप्रेम, ह़ु मनस्से, मतलब युसुफ नु आखु घोराणु ने केदो, “होव, तमु ते गीनती मे वदु से, अने तमारी जाती बी ताखत वाळी से, एतरे तमने एकीत वाटो नी जड़े। बड़ा मे वाळु देस बी तमारु हय जहे; काहाके तीहयु जंगल ते से, पण तीना झाड़का वाड देवो, ता तीनी आड़े-धेड़े नु देस बी तमारु हय जहे; काहाके भले कनानी ताखत वाळा हय, अने तीमनी पांह लुहड़ा ना घोड़ा-गाड्या बी हय, ते बी तमु तीमने तां गेथा नीकाळ सकहु।”
Source notes (2)
- Cross-reference गीनती 27:1-7
- Cross-reference न्यायीयो 1:27,28
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.