Paliya Bible
यहोसु 16
एप्रेम अने मनस्से जाती ने आपलो वाटो
अळतेण युसुफ नी अवल्यात नो वाटो चीट्ठी नाखवा सी ठेराया, तीमनी काकड़ यरीहोन्तां नी यरदन नंदी गेथी, मतलब उगवणी ह़ोड़ यरीहो ना झोर गेथी सुरु हय्न तीहया बड़ा वाळा देस मे हय्न, जे जंगल मे से, बेतेल ह़ेर मे जाय री। बेतेल ह़ेर गेथी लुज1 मे तक पुग री, अने एरेकी जाती नी काकड़ ने तां हय्न अतारोत पुग जी; अने बुडवणी ह़ोड़ यपलेती जाती नी काकड़ भणीन हय्न अने हेट्ली बेथोरोन नी काकड़ माय्न गेजेर मे पुगी, अने दर्यान्तां खत्तम हयी। ता मनस्से अने एप्रेम नाम ना युसुफ ना बेम सोरा नी अवल्यात आह़फा-आह़फाम नो वाटो लेदा।
एप्रेम नो वाटो
एप्रेम जाती वाळा नी काकड़ तीमनी जाती नी अनसारे आहयी ठेरी; मतलब तीमना वाटा नी काकड़ उगवणी गेथी सुरु हय्न अत्रोतद्दार हय्न उप्परवाळा बेथोरोन तक पुगी; अने धुराव भणी नी काकड़ बुडवणी ह़ोड़ ना मीकमतात गेथी सुरु हय्न उगवणी ह़ोड़ वळीन तानतसीलो मे पुगी, अने तीनीन्तां माय्न यानोह तक पुगी; अळतेण यानोह गेथी तीहयी अतारोत अने नारा भणीन हेटी उतरती जाय्न यरीहोन्तां हय्न यरदन नंदीन्तां नीकळी। अळतेण तीहयीत काकड़ तप्पुह ने तां नीकळीन, अने बुडवणी ह़ोड़ जाय्न, काना नाम ना कोतड़े तक हय्न दर्या पोर नीकळी। एप्रेम जाती नो वाटो तीमना घोराणा नी अनसारे आहयोत ठेर्यो। अने मनस्से जाती ना वाटा नी वचमे गेथा ढेरेत ह़ेर तीमना गाम भेळ एप्रेम जाती जुगु अलग कर्या। पण जे कनानी गेजेर ह़ेर मे वहला हता तीमने तां गेथा एप्रेमी माणहु नी नीकाळ्या; एतरे तीहया कनानी माणहु तीमनी वचमे आज ना दाड़े तक वहला से, अने तीमने दाड़की करवा करीन पावर बणाय देदला से।2
Source notes (2)
- Footnote लुज लुज एक गाम से
- Cross-reference न्यायीयो 1:29
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.