Paliya Bible
यहोसु 15
यहुदा नी जाती ने आपलो वाटो
यहुदी माणहु नी जाती नो वाटो तीमना घोराणा नी अनसारे चीट्ठी नाखवा सी एदोम नी काकड़ तक, अने दखणाव भणी सीन ना जंगल तक जे दखवरी काकड़ तक से जड़्यो। तीमना वाटा नी दखणाव नी काकड़ खारली दर्या नी काठे गेथी नीकळे। अने तीहयी अक्रब्बीम नाम ना चड़ाव नी धुराव भणी गेथी नीकळीन सीन मे हय्न कादेसबर्ने नी दखणाव भणी जती हती, अळतेण हेस्रोन ने तां हतीन अद्दार मे हतीन कर्का भणीन वळ जी, तां गेथी अस्मोन हय्न तीहयी मीस्र ना कोतड़े नीकळी, अने तीहयी काकड़ नी आखरी दर्या हती। तमारी दखणाव नी काकड़ आहयीत रेहे। अळतेण उगवणी काकड़ यरदन ना मोडे तक खारली दर्यात ठेरी, अने दखणाव भणी नी काकड़ यरदन नंदी ना मोडान्तां ना तळाव ना मोडे गेथी सुरु हय्न, अने तां गेथी बेथोग्ला माय्न बेतराबा नी दखणाव भणी माय्न रुबेनी बोहन नाम ना दगड़ा तक से; अने तीहयीत काकड़ आकोर नाम नी घाटी मे गेथी दबीर भणी जत री, अने दखणाव भणी माय्न गीलगाल भणीन वळी जे घाटी नी दखणाव भणी अदुम्मीम ना चड़ाव नी अगळ से; तां गेथी एनसेमेस नाम ना झोर ने तां माय्न एनरोगेल मे खत्तम हयी; अळतेण तीहयीत काकड़ हीन्नोम ना सोरा नी घाटी माय्न यबुसी जे यरुसलेम केवाय तीनी दखणाव भणी माय्न तीहया बड़ा नी चोट्ली पोर पुगी, जे दखणाव नी ह़ोड़ हीन्नोम नी घाटी नी अगळ अने रपाईम नी घाटी ना धुराव भणीन ना सींडे से; अळतेण तीहयीत काकड़ तीहया बड़ा नी काकड़ गेथी नेप्तोह नाम ना झोर ने तां माय्न एप्रोन बड़ा ना ह़ेर मे हय्न नीकळी; अळतेण तां गेथी बाला मे (जे कीर्यात्यारीम बी केवाय) पुगी; अने तीहयी काकड़ बाला गेथी बुडवणी ह़ोड़ वळीन सेईर बड़ा तक पुगी अने यारीम बड़ा (जे कसालोन बी केवाय) तीनी धुराव भणी माय्न बेतसेमेस मे जत री, अने तां गेथी तीम्ना मे जत री; तां गेथी तीहयी काकड़ एक्रोन नी धुराव भणी हय्न सीक्करोन जती हती, अने बाला बड़े हय्न यन्बेल पोर नीकळी; अने तीहयी काकड़ दर्या नी काठे खत्तम हयी। अने उगवणी नी काकड़ मोट्ली दर्या नी काठे तक ठेरी। यहुदीम ने जे वाटो तीमना घोराणा नी अनसारे जड़्यो तीनी च्यारो-मेर नी काकड़ आहयीत हती।
कालेब नु हेब्रोन अने दबीर ने हरावणु
(न्यायीयो 1:11-15)
यपुन्ने ना सोरा कालेब ने तीहयो यहोवा भगवान ना हुकम नी अनसारे यहुदीम नी वचमे वाटो आप्यो, मतलब कीर्यतर्बा जे हेब्रोन बी केवाय तीहयो अर्बा अनाक नो बाह हतो।1 अने कालेब तां गेथो सेसे, अहीमन, अने तल्मे नाम ना अनाक ना तीनोव सोरा ने नीकाळ देदो। अने तां गेथो तीहयो दबीर ना रेवा वाळा ह़ाते झुमायो; पेले ते दबीरा नु नाम कीर्यत्सेपेर हतु। अने कालेब केदो, “जे कीर्यत्सेपेर ह़ेर ने हराय देय तीनी ह़ाते मे मारी सोरी अकसा ना वेवा कर देही।” ता कालेब नो भाय कनज नो सोरो ओतनीयल तीने हराय नाख्यो; अने कालेब तीनी ह़ाते आह़फा नी सोरी अकसा ना वेवा कर देदो। जत्यार तीहयी तीनीन्तां आयी, ता ओतनीयल तीने तीना बाह पांह थोड़ोक जागो मांगवा करीन केदो, अळतेण तीहयी तीनु गदड़ु पोर गेथी उतर पड़ी, अने कालेब तीने पुछ्यो, “तने ह़ु जोवे?” तीहयी केदी, “मने बरकत आप; तु मने दखणाव भणी नो थोड़ोक जागो ते आपलो से, मने पाणी ना झोर बी आप दे।” ता तीहयो उपर ना झोर अने हेट्ला झोर बेम तीने आप देदो।
यहुदा नी जाती ना ह़ेर
यहुदी जाती नो वाटो ते तीमना घोराणा नी अनसारे आहयोत ठेर्यो। यहुदी जाती नी धेड़े वाळा ह़ेर नी दखणाव भणी ना देस मे एदोम नी काकड़ भणीन आहया से, मतलब कबसेल, एदेर, यागुर, कीना, दीमोना, अदादा, केदेस, हासोर, यीत्नान, जीप, लेतेम, बालोत, हासोर्हदत्ता, करीय्योहेस्रोन, जे हासोर बी केवाय, अने अमाम, सेमा, मोलादा, हसगर्ददा, हेसमोन, बेत्पालेत, हसर्सुवाल, बेर्सेबा, बीज्योत्या, बाला, ईय्यीम, एसेम, एलतोलद, कसील, होर्मा, सीकलग, मदमन्ना, सनसन्ना, लबावोत, सील्हीम, एन, अने रीम्मोन; आहया आखा ह़ेर उन्तीस से, अने आमना गाम बी से।
हेट्ला देस मे आहया से: मतलब एसतावोल, सोरा, असना, जानोह, एनगन्नीम, तप्पुह, एनाम, यर्मुत, अदुल्लाम, सोको, अजेका, सारेम, अदीतेम, गदेरा, अने गदेरोतेम; आहया आखा चोवदे ह़ेर से, अने आमना गाम बी से।
अळतेण सनान, हदासा, मीगदलगाद, दीलान, मीस्पे, योक्तेल, लाकीस, बोस्कत, एग्लोन, कब्बोन, लहमास, कीतलीस, गदेरोत, बेतदागोन, नामाह, अने मक्केदा; आहया ह़ोळ्ळे ह़ेर से, अने आमना गाम बी से।
अळतेण लीब्ना, एतेर, आसान, यीप्ताह, असना, नसीब, कीला, अकजीब अने मारेसा; आहया नव ह़ेर से, अने आमना गाम बी से। अळतेण ह़ेर अने गाम भेळ एक्रोन, अने एक्रोन गेथा लगाड़ीन दर्या तक, आह़फा-आह़फाम ना गाम भेळ जेतरा ह़ेर असदोद भणीन से।
अळतेण आह़फा-आह़फाम ना ह़ेर अने गाम भेळ असदोद, अने गाजा, आहया मीस्र ना कोतड़े तक अने मोट्ली दर्या ना काठे तक जेतरा ह़ेर से।
बड़ा वाळा देस मे आहया से: मतलब सामीर, यत्तीर, सोको, दन्ना, कीर्यत्सन्ना जे दबीर बी केवाय, अनाब, एस्तमो, आनीम, गोसेन, होलोन, अने गीलो; आहया ग्यारे ह़ेर से, अने आमना गाम बी से।
अळतेण अराब, दुमा, एसान, यानीम, बेत्तप्पुहम अपेका, हुमता, कीर्यतर्बा जे हेब्रोन बी केवाय, अने सीवोर; आहया नव ह़ेर से, अने आमना गाम बी से। अळतेण मावोन, कर्मेल, जीप, युत्ता, यीज्रेल, योकदाम, जानोह, केन, गीबा अने तीम्नाह; आहया दह ह़ेर से, अने आमना गाम बी से।
अळतेण हलहुल, बेतसुर, गदोर, मरात, बेतनोत, अने एलतकोन; आहया छो ह़ेर से, अने आमना गाम बी से।
अळतेण कीर्यतबाल जे कीर्यात्यारीम बी केवाय, अने रब्बा; आहया बे ह़ेर से, अने आमना गाम बी से।
जंगल मे आहया ह़ेर से: मतलब बेतराबा, मीद्दीन, सकाका; नीबसान, खारलु मीठु नु ह़ेर, अने एनगदी, आहया छो ह़ेर से, अने आमना गाम बी से।
यरुसलेम मे रेवा वाळा यहुदी यबुसी जाती वाळा ने नी नीकाळ सक्या; एतरे आज ना दाड़े तक यबुसी माणहु यहुदीम नी ह़ाते यरुसलेम मे री र्या।2
Source notes (2)
- Cross-reference न्यायीयो 1:20
- Cross-reference न्यायीयो 1:21; 2 समुवेल 5:6; 1 ईतीहास 11:4
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.