Paliya Bible
यहोसु 14
यरदन नंदीन बुडवणी धेड़ ना वाटा नो वाटो पाड़नु
जे-जे वाटो ईस्रायलीम ने कनान देस मे जड़्यो, जीमने एलीयाजार पुंजारो, अने नुन नो सोरो यहोसु, अने ईस्रायली जाती ना डायला घोराणा ना मुख्या-मुख्या अदमी तीमने आपला तीहयो आहयो से। जे हुकम यहोवा मुसा नी लारे साड़ी नव जाती जुगु आपलो हतो, तीनी अनसारे तीमनो वाटो चीट्ठी नाखी-नाखीन आप्या।1 मुसो ते ढाय जाती नो वाटो यरदन नंदीन पार आपलो; पण लेवीम ने तीहयो तीमनी वचमे कानो बी वाटो नी आप्यो। युसुफ ना घोराणा नी ते बे जाती हय जेली हती, मतलब मनस्से अने एप्रेम; अने तीहया देस मे लेवीम ने कंय बी वाटो नी आप्या, रेवा जुगु ह़ेर, अने जानवरु अने धन मेकवा जुगु जानवरु चरवा नो जागो जड़्यो।2 जे हुकम यहोवा मुसा ने आपलो हतो तीनी अनसारे ईस्रायली माणहु कर्या; अने तीहया देस ने वाट लेदा।
हेब्रोन ह़ेर कालेब ने आपणु
ता यहुदी माणहु यहोसुन्तां गीलगाल मे आया; अने कनज यपुन्ने नो सोरो कालेब तीने केदो, “तु जाणतो हहे के यहोवा कादेसबर्ने ह़ेर मे मुसा ने मारा अने तारा बारा मे ह़ु केदलो हतो।3 जत्यार यहोवा नो चाकर्यो मुसो मने आहया देस ना बारा मे जानकारी लेवा करीन कादेसबर्ने ह़ेर मे गेथो मोकल्लो हतो; ता मे चाळीह साल नो हतो; अने मे खरला मन सी तीमनीन्तां खबर ली आयो4 अने मारा ह़ाती जे मारी ह़ाते जेला हता तीहया ते माणहु नु मन ने कमजोर कर देदा, पण मे आपणा भगवान यहोवा नी पुरी रीते वात मान्यो। ता तीहया दाड़े मुसो ह़ाम खाय्न मने केदो, ‘तु पुरी रीते मारा भगवान यहोवा नी वात पोर चाललो से, एतरे कंय बी सण्का कर्या वगर जे जागा पोर तु तारा पोग मेक आवलो से तीहयो जागो जलमको तारो अने तारी जाती नो रेहे।’5 अने हाव देख, जत्यार यहोवा भगवान मुसा ने आहयो बोल केदलो हतो तां गेथा पेतालीस साल हय ज्या, तीहया दाड़ा मे ईस्रायली माणहु जंगल मे फीरता र्या; तीहया दाड़ा मे यहोवा तीहयो केदलो तीनी अनसारे मने जीवत्लो राखलो से, अने हाव मे पीच्यासी साल नो से। जेतरी ताखत मुसो मने मोकल्लो तीहया दाड़े मारी हती तेतरी ताखत हजु तक मारी मे से; झुमायवा, नीता मोय-बारा आव्वा-जवा जुगु जेतरी ताखत तीहयी टेमे मारी मे हती तेतरीत आज बी मारी मे ताखत से। एतरे तीहयु बड़ा वाळु देस मने आप दे जीनी वात यहोवा भगवान तीहया दाड़े करलो हतो; तु ते तीहया दाड़े ह़मळ्यो हहे के तीनी मे ते अनाक जाती वाळा रेय, अने मोट्ला-मोट्ला कीला वाळा ह़ेर बी से; पण ह़ु मालम हय सके के यहोवा भगवान मारी ह़ाते रेय, अने तीहयो केदलो तीनी अनसारे मे तीमने तीमना देस मे गेथो नीकाळ देम।” ता यहोसु तीमने बरकत आप्यो; अने हेब्रोन ह़ेर ने यपुन्ने ना सोरा कालेब नो वाटो करीन आप देदो। करीन हेब्रोन ह़ेर कनज जाती ना यपुन्ने ना सोरा कालेब नो वाटो आज तक बणलो से, काहाके तीहयो ईस्रायल ना भगवान यहोवा नी सच्चाय सी हुकम मान्यो। पेले हेब्रोन ह़ेर नु नाम कीर्यतर्बा हतु; तीहयो अर्बा अनाकी जाती मे आखा गेथो मोटो माणेह हतो। अने तीहया देस ने झगड़ा सी सांती जड़ी।
Source notes (5)
- Cross-reference गीनती 26:52-56; 34:13
- Cross-reference गीनती 32:33; 34:14,15; वेवस्थावीवरन 3:12-17
- Cross-reference गीनती 14:30
- Cross-reference गीनती 13:1-30
- Cross-reference गीनती 14:24
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.