यहोसु 23

यहोसु नो आखरी परच्‌यार

1आनीन ढेरेत दाड़ान अळतेण, जत्‌यार यहोवा ईस्‌रायलीम ने तीमना च्‌यारो-मेर ना वेरी सी अराम आप्‌यो, अने यहोसु डायलो अने घणी उमर नो हय ज्‌यो, 2ता यहोसु आखा ईस्‌रायलीम ने, मतलब डायला, मुख्‌या माणहु, अने नीयाव करन्‌या, अने अदीकार्‌या ने बोलावीन केवा बाज ज्‌यो, “मे ते हाव डायो अने घणी उमर नो हय जेलो से; 3अने तमु देखला से के तमारो भगवान यहोवा तमारी जुगु आहयी आखी जाती ह़ाते ह़ु-ह़ु करलो से, काहाके जे तमारी भणी गेथो झुमायतो आय र्‌यो तीहयो तमारो भगवान यहोवा से। 4देखो, मे आहयी बचली जातीम ने चीट्‌ठी नाखी-नाखीन तमने वाट देदलो से; अने यरदन नंदी गेथो लगाड़ीन उगवणी ह़ोड़ नी मोट्‌ली दर्‌या तक रेवा वाळी तीहयी आखी जातीम ने बी आसमेत आपलो से, जीमने मे काट देदलो से। 5अने तमारो भगवान यहोवा तीमने तमारी अगळ गेथा तीमना देस मे गेथा नीकाळ देहे; अने तमु आपणा यहोवा ना बोल नी अनसारे तीमना देस ना अदीकार्‌या हय जहु। 6एतरे घण जबर हीम्‌मत राखीन, जे कंय मुसा नी नेम नी कीताप मे लीखलु से तीने पुरु करवा करीन चोकसी करजो, तीनी गेथा नी ते डाखरी ह़ोड़ वळजो अने नी ते जमणी ह़ोड़ वळजो। 7आहयी जाती जे तमारी वचमे री जेली से आमनी वचमे नी जजो, अने नी आमना देवताम ना नामु नी वात करजो, अने नी आमनी ह़ाम खवाड़जो, अने नी आमनो उपाह पाळजो अने नी आमने वांदजो, 8पण जेम आज ना दाड़े तक तमु आपणा भगवान यहोवा नी भक्‌ती मे लागला री र्‌या, तेमेत रीया करजो। 9यहोवा तमारी अगळ गेथी मोट्‌ली-मोट्‌ली अने ताखत वाळी जाती ने नीकाळलो से; अने तमारी अगळ आज तक कोय बी उबु नी री सक्‌यु। 10तमारी मे गेथो एक माणेह हजार माणहु ने नहाड़हे, काहाके तमारो भगवान यहोवा आह़फा ना बोल नी अनसारे तमारी लेदे झुमाय।1 11करीन आपणा भगवान यहोवा ह़ाते मोंग राखवा नो पुरो ध्‌यान राखजो। 12काहाके कदीम तमु आनी रीते यहोवा भगवान भणी गेथा फीरीन आहयी जाती ना बीजा माणहु ह़ाते भेसकायवा बाज जावो जे तमारी वच मे बच र्‌या, अने आमनी ह़ाते वेवा करीन आमनी ह़ाते सवसार नो रीस्‌तो जोड़ो, 13ता पक्‌का जाण लेवो अगा चालीन तमारो भगवान यहोवा आहयी जाती ने तमारी अगळ गेथी नी नीकाळे; अने आहयी तमारी जुगु जाळ, फंदा, अने तमारा वाहां जुगु ह़ड़का, अने तमारा डोळा मे काटा ठेरहे, अने आखरी मे तमु आहयी वारली जागा पोर गेथा जे तमारो भगवान यहोवा तमने आपलो से खत्‌तम हय जहु।

14“देखो, मे हाव मोत नी वाटे से, जीनी पोर आखा ने चालवा नु से। अने तमु आखा आह़फा-आह़फाम ना मन मे जाणो, के जेतरी भलाय नी वात अमारो भगवान यहोवा अमारा बारा मे केदो तीमनी मे गेथी एक बी पुरी हया वगर नी री; तीहयी आखीन आखी तमारी पोर पुरी हय जेली से, तीमनी मे गेथी एक बी पुरी हया वगर नी री। 15ता जेम तमारा भगवान यहोवा नी केदली आखी भलाय नी वात तमारी ह़ाते पुरी हयली से; तेमेत यहोवा भगवान गरा नी आखी वात तमारी पोर लावहे अने तमु ने आहयी वारली जागा पोर गेथो, जीने तमारो यहोवा भगवान तमने आपलो से, खत्‌तम कर देहे। 16जत्‌यार तमु तीहया वायदा ने, जीने तमारो भगवान यहोवा तमने हुकम आपीन आह़फा नी ह़ाते बंदाड़लो से, तोड़ीन बीजा देवताम नी बड़ाय अने तीमने वांदवा बाज जावो, ता यहोवा भगवान नी रीह तमारी उपर आय लागहे, अने तमु आहया वारला देस मे गेथा जीने तीहयो तमने आपलो से सोटात खत्‌तम हय जहु।”