Paliya Bible
युहन्ना 4
ईसु सामरी बयर ह़ाते भगवान नी वात करे
जत्यार मालीक ने मालम हयु, के फरीसी पंथवाळा आहयु ह़मळ्या, के ईसु युहन्ना गेथो वदु चेला बणावे अने तीमने बपतीस्मा आपे। ईसु आह़फोत बपतीस्मा नी आपत्लो, पण तीना चेला बपतीस्मा आपत्ला। तत्यार तीहयो युहद्या जीला ने सोड़ीन गलील मे जत र्यो। अने ईसु ने सामर्या हय्न जवा नु जरुड़ी हतु।
एतरे ईसु सामर्या जीला ना सुखार नाम ना एक ह़ेर धेड़्ये पुग्यो। तां एक खेतर हतु, तीहयु खेतर पेल्ना वारा मे याकुब आह़फा ना बेटा युसुफ ने आपलो हतो। अने याकुब नो कुवो बी तां हतो, ईसु वाट्ये चालीन थाकलो तीहया कुवा पोर उदड़ेत बह ज्यो, अने आहयी वात तोपीवळे नी टेम मे हयी।
एक सामरी बयर पाणी भरवा करीन आयी, तीने ईसु केदो, “मने पाणी पीवाड़ दे।” काहाके तीना चेला खाणु लेवा करीन ह़ेर मे जत रेला हता।
एतरे तीहयी सामरी बयर ईसु ने केदी, तु युहदी जाती वाळो हय्न बी मारी पांह पाणी पीवा करीन काहा मांगे? मे ते एक सामरी जाती नी बयर से काहाके युहदी माणहु सामरी माणहु ह़ाते भेद-भाव राखे।
ईसु तीने जपाप आप्यो, “तु आहयु नी जाणती के भगवान तने कानो वाटो आपवा हींडे, अने जे तारी पांह पीवा करीन पाणी मांग र्यो, तीहयो कोय से। कदी तु जाण लेती ता तु मार पांह पाणी मांगती, अने मे तने अमर जीवाय नु पाणी आपतो।”
सामरी बयर ईसु ने केदी, “ए मालीक! तारी पांह कुवा मे गेथु पाणी काडवा नी लेदे ठाहरु बी नी हय, अने कुवो घणो उंडो से ता अळी तीहयु अमर जीवाय नु पाणी कां गेथु लावही? तु अमारा बाह याकुब गेथो बी मोटो से ह़ु? तीहयो आमने आहयो कुवो आप्यो; तीहयो आह़फो बी अने तीना अवल्यात अने तीना पाळ्ळा ढुरु बी आहया कुवा मे गेथु पाणी पीदला।”
ईसु केदो, “जे कोय आहयु पाणी ने पीहे, तीने अळी तरहे लागहे। बाखीन मे आपही ते पाणी जे बी पीहे, तीने कदी तरहे नी लागे एतरुत नी पण तीहयु पाणी तीनी जीवाय मे पाणीन झोर बण जहे, अने तीनी अमरकाय जीवाय जुगु वयतु रेहे।”
सामरी बयर ईसु ने केदी, “ए मालीक! मने तीहयु पाणी आप दे, ता मने वळ-वळीन तरहे नी लागे, अने मने आतरा नाम्बे पाणी भरवा नी आव्वा पड़े।” ईसु तीने केदो, “जा तारा धणी ने आञे बोलाय लाव।”
तीहयी बयर जपाप आपी, “मारो धणी नी हय।” ईसु तीने केदो, “तु ह़ाची की री के मारो धणी नी हय। काहाके तु पांच लाडा कर लेदली से, अने हाव तु जीनीन तां री, री तीहयो बी तारो धणी नी हय; तु आहयी वात ह़ाचली की री।”
तीहयी बयर ईसु ने केदी, “मने लागे के तु भगवान वगे गेथी वात केण्यो से।” अमारा डाह-डाहा आहया बड़ा पोर भगवान नी पुजा-पाट कर्या, पण युहदी माणहु केय के भगवान नी पुजा-पाट नो जागो यरुसलेम मेत से।
ईसु तीने केदो, “ओ बाय जात! मारी आहयी वात पोर भरहो कर आसवी टेम आव्वा बाज री, तीहयी टेमे तमु नी ते बड़ा पोर, अने नी ते यरुसलेम मे भगवान बाह नी पुजा-पाट करहु। तमु जीने नी जाणता तीनी पुजा-पाट कर र्या, पण आमु ते जीने जाणये तीनीत पुजा-पाट कर र्या, काहाके छुटकारो युहदी जाती वाळा मसी मे गेथोत से। पण तीहयी टेम आव्वा बाज री, अने हमणे आय लागली से, जे टेमे भगवान नी पुजा-पाट करन्या आत्मा मे अने खराय सी करहे, काहाके भगवान बाह बी आसवी पुजा-पाट करन्या ने ह़ोद र्यो। भगवान आत्मा से; अने जरुड़ी से के तीनी पुजा-पाट करन्या ने तीनी आत्मा अने सच्चाय मे हय्न तीनी पुजा-पाट करवा जोवे।”
बयर ईसु ने केदी, “मने मालम से के, मसी जे मसी केवाय तीहयो आव्वा वाळो से जत्यार तीहयो आवहे, तत्यार आमने आखी वात देखाड़ देहे।” ईसु तीने केदो, “मेत मसी से, जे तारी ह़ाते वात करवा बाज र्यो।”
तीहयी टेमे ईसु ना चेला आय लाग्या, अने ईसु ने एक बयर ह़ाते वात करत्लो देखीन वीच्यार मे पड़ ज्या; ते बी कोय नी केदु के तने आनी पांह ह़ु जोवे “नीता तु आनी ह़ाते ह़ु वात कर र्यो।”
तत्यार तीहयी बयर आह़फी नो वटळो तांत रेवा दीन ह़ेर मे जाय्न माणहु ने आहयु केवा बाज जी, “चालो एक माणेह ने देखो, तीहयो मे जे करली तीहयु आखु देखाड़ देदो; कंखर माय्न हीय्योत मसी नी हय?” तत्यार तीहया ह़ेर मे गेथा नीकळीन तीनीन्तां आव्वा बाज ज्या।
तीहयी टेमे तीना चेला ईसु सी वीन्ती करता हता के, “ए गुरु थोड़ुक खाय ले।”
पण ईसु तीमने केदो, “मारी पांह खावा जुगु एवु खाणु से तीने तमु नी जाणो।”
तत्यार चेला आह़फा-आह़फात केदा, “कोय आनी जुगु खाणु लायु हहे ह़ुं?”
ईसु तीमने केदो, “मारु खाणु आहयु से के मने मोकल्वा वाळा नी मरजीन अनसारे चालु अने तीनु काम पुरु करु। तमु ते आसम केता आय र्या, मेर पाकवा मे हजु च्यार मयना बच र्या, पण मे तमने केम, उचा डोळा करीन खेतरु भणी भाळो, आहयी खेतरु नी मेर पाकीन वाडे ईसम हय री। अने वाडवा वाळा ने दाड़की जड़े, अने अमर जीवाय जुगु फोळ एखठा करे, काहाके बीज वेरन्यो अने मेर वाडण्यो भेळा हय्न खुसी मनावे। काहाके आनी पोर आहयो कवाड़ो वारु मेळ खाय के ओरवा वाळो बीजो से, अने वाडवा वाळो बीजो से। मे तमने तीहया खेतर नी मेर वाडवा करीन मोकल्लो से, जीनी मे तमु मेहनत नी कर्या, बीजा मेहनत कर्या अने तमु तीमनी मेहनत नी मेर मे साजल्या बण ज्या।”
सामर्या माणहु नु भरहो करणु
तीहयी सामरी बयर ईसु ना बारा मे आहयी गवाय देदली, “के तीहयो मे जे करली तीहयु आखु मने देखाड़ देदो।” एतरे तीहया सामर्या ह़ेर ना ढेरेत माणहु ते बयर नी गवाय ह़मळीन ईसु पोर भरहो कर्या। एतरे सामरी माणहु ईसुन्तां आया, अने तीनी सी वीन्ती कर्या के तु अमारीन्तां रे। एतरे ईसु चेला ह़ाते तीमनीन्तां बे दाड़ा लग र्यो।
अने ईसु नी वात ह़मळीन ढेरेत बीजा माणहु बी ईसु पोर भरहो कर्या। तीहया ते बयर ने केदा, “हाव आमु तारा केवा सी भरहो नी करता, काहाके आमुत ह़मळी लेदा, अने जाण लेदा के आहयोत ह़ाचली मे कळी ने छुटकारो आपण्यो से।”
ईसु नु अदीकारी ना सोरा ने आरगो करवु
तीहया बे दाड़ान अळतेण ईसु चेला ह़ाते तां गेथो गलील मे जत र्यो। 1ईसु आह़फोत आहयी गवाय देदलो हतो के, जे बी भगवान वगे गेथो खबर लावण्यो से, तीने आह़फा ना देस मे ईज्जत नी जड़े। 2जत्यार ईसु गलील मे आयो ता गलील ना माणहु तीने खुसी सी मळ्या; काहाके जेतरा जुदा-काम तीहयो यरुसलेम मे तीवार नी टेमे करलो तीहया ते आखा कामु ने देखला हता, काहाके तीहया बी तीवार मे जेला हता।
राजवाड़ा मे काम करवा वाळा ना सोरा ने वारु करनु
तत्यार तीहयो अळी गलील ना काना ह़ेर मे आयो, जां तीहयो पाणी ने अंगुर नो रोह बणावलो हतो। अने राजा नो एक पावोर हतो, तीनो सोरो कफरनहुम ह़ेर मे मांदलो हतो। जत्यार राजा नो पावर्यो आहयु ह़मळ्यो के ईसु युहद्या मे गेथो गलील मे आय र्यो, तत्यार तीहयो ईसुन्तां जाय्न तीनी सी वीन्ती कर्यो के आवीन मारा सोरा ने आरगो कर दे, काहाके तीहयो मरवा पोर हतो। ईसु गलील वाळा नो कमतो भरहो देखीन तीने केदो, “तमु ते जुदा-काम नी सेलाणी देख्या वगर मार पोर भरहो नी करो।”
राजा नो पावर्यो ईसु ने केदो, “ए मालीक, मारा सोरा ने मरवा सी पेले चाल।”
ईसु राजा ना पावर्या ने केदो, “जा तारो सोरो जीवत्लो से। तीहयो ईसु नी वात पोर भरहो करीन जत र्यो।” तीहयो वाट्येत हतो, ता तीना पावर्या आवीन तीने भेट्या अने केदा, “तारो सोरो जीवत्लो से।”
तीहयो तीमने पुछ्यो कानी टेमे मार सोरो वारु हयवा बाज जेलो? तीहया केदा, “काले दीह़ु एक बजे तीनो ताव उतरी जेलो।” तत्यार तीनो बाह जाण ज्यो के आहयु तीहयी टेमे हयु जत्यार ईसु मने केदलो, “जा तारो सोरो जीवत्लो से।” आसम करीन तीहयो अने तीना आखा घोरल्या ईसु पोर भरहो कर्या।
ईसु नी गलील मे आहयी बीजी सेलाणी हती। ईसु युहद्या गेथो आवीन गलील मे देखाड़्या।
Source notes (3)
- Cross-reference मत्ती 13:57; मरकुस 6:4; लुका 4:24
- Cross-reference युहन्ना 2:23
- Cross-reference युहन्ना 2:1-11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.