Paliya Bible
युहन्ना 3
ईसु अने नीकुदेमुस
फरीसी पंथवाळा मे नीकुदेमुस नाम नो एक माणेह हतो, तीहयो युहदी माणहु नो पुडार्यो हतो। तीहयो राते ईसुन्तां आयो अने ईसु ने केदो, “ए गुरु! आमु जाणये के तु भगवान वगे गेथो आवलो से, काहाके कदी भगवान ह़ाते नी हय, ता कोय बी जुदा-काम नी सेलाणी नी देखाड़ सके जीसम तु देखाड़े।”
ईसु जपाप आप्यो, “मे तने ह़ाचली केम, जत्यार लग कोय अळी पासो पयदा नी हये, तत्यार लग तीहयो भगवान ना राज ने नी देख सके।”
नीकुदेमुस ईसु ने पुछ्यो, “कानो बी माणेह डायो हय्न पासो कीसम पयदा हय सके? ह़ुं तीहयो आह़फा नी आह्य ना कोख मे पासो जाय्न बीजी कावा पयदा हय सके?” ईसु जपाप आप्यो, “मे तने ह़ाचली केम, जत्यार लग कोय बी माणेह पाणी अने आत्मा सी पयदा नी हये, तत्यार लग तीहयो भगवान ना राज मे नी भराय सके। काहाके जे डील सी पयदा हयु, तीहयु डील से; अने जे आत्मा सी पयदा हयु, तीहयु आत्मा से। मे तने आहयी वात केदो, करीन वहराय ना तने आत्मा सी पासो पयदा हयवा जरुड़ी से। वाहळु जंखर जवा लागे, तींखोर जाय; अने तु तीनी अवाज ते ह़मळे, पण तीहयु कां गेथु आयु अने कां जाय, तीहयु तने मालम नी पड़े। जे कोय आत्मा मे पयदा हयला से, तीहया आहयु वाहळुन तेमेत से।”
नीकुदेमुस ईसु ने केदो, “आहयु आसम कीसम हय सके।”
आहयी वात ह़मळीन ईसु तीने केदो, “तु ईस्रायली माणहु नो गुरु” हय्न बी आहयी वात ने नी ह़मजतो। मे तने ह़ाचली केम, आमु जे जाणया, तीहयुत कीया, अने जीने आमु देख्या तीनीत गवाय दीया, पण तमु अमारी गवाय ने नी मान्ता। मे तमने धरती पोर नी वात देखाड़्यो, ते बी तमु भरहो नी करता, कदी मे तमने ह़रगे वाळी वात देखाड़ही, ता तमु कीसम भरहो करहु? अने कोय ह़रग पोर नी चड़्यु, जे माणेह नो बेटो बणीन ह़रगे गेथो धरती पोर आवलो से, तीहयो एतरोत ह़रग मे चड़लो से।
अने जीसम मुसो उजाड़ी बड़ा मे गड़हा नी मुर्ती बणाय्न लाकड़ा ना खम्बा पोर चड़ावलो, तीसमेत माणेह ना बेटा ने बी उपर चड़ाय्न टांगहे अने आसम हयवा जरुड़ी से। काहाके जे कोय ईसु पोर भरहो करहे, तीहयो अमर जीवाय हात करहे।
भगवान आहयी कळी सी एतरो मोंग कर्यो, के तीना एक-खोळ्या बेटा ने आप देदो के, जे कोय तीनी पोर भरहो करे, तीहयो बरबात नी हये, पण अमर जीवाय हात करहे। भगवान आह़फा ना बेटा ने कळी मे आनी लेदे नी मोकल्यो, के कळी पोर डंड नो हुकम आपे, पण आनी लेदे के कळी तीनी लारे बचे।
जे ईसु पोर भरहो करे, तीनी पोर डंड नो हुकम नी हय, पण जे ईसु पोर भरहो नी करे, तीहयो गुनाळ्ळो गणाय जेलो से, आनीन करते के तीहयो भगवान ना एक-खोळ्या बेटा ना नाम पोर भरहो नी कर्यो। अने डंड ना हुकम नो कारण आहयो से के वीजाळु कळी मे आयु, अने माणहु वीजाळु गेथा अंदारलु ने जादा मोंग कर्या काहाके तीना काम बुरा हता। काहाके जे कोय बुराय करे, तीहयो वीजाळा सी वेर राखे, अने आह़फा ना कुहर्या कामु उजन्ता हय जहे, करीन तीहयो वीजाळा मे नी आवे। पण जे कोय खराय सी चाले, तीहयो वीजाळु ह़ाते आवे, काहाके तीना काम उजन्ता हये के मे भगवान नी वखे हय जाम।
ईसु ना बारा मे युहन्ना नी गवाय
अळतेण ईसु अने तीना चेला युहद्या देस मे आया, अने तीहयो तीमनी ह़ाते रीन बपतीस्मा आपवा लाग्यो। अने युहन्नो बी सालेम ना ह़ाते एनोन मे बपतीस्मा आपतो हतो, काहाके तां घणु पाणी हतु, अने माणहु आय्न बपतीस्मा लेता हता। 1काहाके युहन्नो तीहयी टेम लग जेल मे नी ज्यो।
तां युहन्ना ना चेला काना युहदी माणहु ह़ाते चोखा हयवा नी रीती ना बारा मे जखड़ी पड़ ज्या। अने तीहया युहन्नान तां आय्न तीने केदा, ए गुरु, जे माणेह यरदन नंदी नी ह़ेली धेड़ तारी ह़ाते हतो, अने जीनी तु गवाय देदलो, तीहयो बपतीस्मा आपे, अने आखा तीनीन्तां आवे।
युहन्नो केदो, जत्यार लग माणेह ने ह़रग मे गेथु नी आपे, ता लग तीहयो कंय बी नी ली सके। 2तमु ते खुदेत मारा गवा से, के मेत केदो, मे मसी नी हय, पण तीनी अगळ मोकलो से। जीनी नवली लाडी से, तीहयोत नवलो लाडो से, पण नवला लाडा नो खास दोस्तीदार से जे तीनी ह़ाते उबो हय र्यो तीहयो तीनी ह़मळे, अने नवला लाडा ना बोल सी घणो खुस हये, तीसम हाव मारी खुसी पुरी हय जी। आसम हयवा जरुड़ी से के तीहयो बड़े अने मे घटु।
तीहया जे ह़रगे गेथो उतर्यो
जे उपर गेथो आवे तीहयो आखा मे गेथो मोट्लो से, पण जे धरती पोर गेथु आवे, तीहयु धरती नु से, अने धरती नी वात केय, जे ह़रग मे गेथु आवे, तीहयु आखु सी उपर से। जे कंय तीहयो देख्यो, अने ह़मळ्यो, तीनीत गवाय देय, पण कोय तीनी गवाय ने नी मान्ता। जे कोय तीनी गवाय ने मान लेदा तीहया आहयी वात पोर गवा दी र्या के भगवान खरलो से। काहाके जीने भगवान मोकल्लो से, तीहयो भगवान नी वात केय, काहाके तीहयो आत्मा मापी-मापीन नी आवतलो। 3बाह आह़फा ना बेटा ने मोंग करे, अने तीहयो आह़फा ना बेटा ना हात मे आखो हक आप देदलो से। बेटा ईसु पोर भरहो करे, अमर जीवाय तीनीत से; पण जे ईसु ने नी माने तीने अमर जीवाय कदी नी जड़े, पण भगवान नी रीह तीनी पोर रेहे।
Source notes (3)
- Cross-reference मत्ती 14:3; मरकुस 6:17; लुका 3:19,20
- Cross-reference युहन्ना 1:20
- Cross-reference मत्ती 11:27; लुका 10:22
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.