Paliya Bible
उबजणाय कीताप 5
आदम नो कुळी वेलो
(1 ईतीहास 1:1-4)
आदम नी पीड़ी आहयी से। जत्यार भगवान माणेह ने बणायो तत्यार आह़फा ना रुप मे तीने बणायो।1 तीहयो अदमी अने बयर करीन माणेह ने बणायो अने तीमने संयबरकत आप्यो, अने तीमने बणाव्वा ना दाड़े तीमनु नाम आदम पाड़्यो।2 जत्यार आदम एक ह़ोव तीस साल नो हयो, तत्यार तीनी लारे तीनीन तेम तीना सीका मे तीनी लारे एक सोरो पयदा हयो। तीहयो तीनु नाम सेत पाड़्यो। अने सेत ने पयदा हयवान बाद आदम आंठ ह़ोव साल जीवत्लो र्यो, अने तीना अळी बी सोरा-सोरी पयदा हया। आहयी रीते आदम ना आखा साल नव ह़ोव तीस साल हया, अळतेण तीहयो मर ज्यो।
जत्यार सेत एक ह़ो पांच साल नो हयो, तत्यार तीनी सी एनोस पयदा हयो। एनोस ना पयदा हयवान बाद सेत आंठ ह़ोव ह़ात साल जीवत्लो र्यो, अने तीना अळी बी सोरा-सोरी पयदा हया। आसम करीन सेत ना आखा मेळीन नव ह़ोव बारे साल हया, अळतेण तीहयो मर ज्यो।
जत्यार एनोस नब्बे साल नो हयो, तत्यार तीनी सी केनान पयदा हयो। केनान ना पयदा हयवान बाद एनोस आंठ ह़ोव पंदरे साल जीवत्लो र्यो, अने तीना अळी बी सोरा-सोरी पयदा हया। आहयी रीते एनोस ना आखा मेळीन नव ह़ोव पांच साल हया; अळतेण तीहयो मर ज्यो।
जत्यार केनान सत्तर साल नो हयो, तत्यार तीनी सी महलेल पयदा हयो। महलेल ने पयदा हयवान बाद केनान आंठ ह़ोव चाळीह साल जीवत्लो र्यो, अने तीना अळी बी सोरा-सोरी पयदा हया। आहयी रीते केनान नी आखी मेळीन उमर नव ह़ोव दह साल नी हयी; अळतेण तीहयो मर ज्यो।
जत्यार महलेल पंयसट साल नो हयो, तत्यार तीनी सी येरेद पयदा हयो। येरेद ने पयदा हयवान बाद महलेल आंठ ह़ोव तीस साल जीवत्लो र्यो, अने तीना अळी बी सोरा-सोरी पयदा हया। आहयी रीते महलेल नी उमर आखी मेळीन आंठ ह़ोव पींच्यानु साल नी हयी; अळतेण तीहयो मर ज्यो।
जत्यार येरेद एक ह़ोव बासठ साल नो हयो, जत्यार तीहयो हनोक ने पयदा कर्यो। हनोक ने पयदा हयवान बाद येरेद आंठ ह़ोव साल जीवत्लो र्यो, अने तीना अळी बी सोरा-सोरी पयदा हया। आहयी रीते येरेद नी आखा मेळीन नव ह़ोव बासठ साल जीवत्लो र्यो; अळतेण तीहयो मर ज्यो।
जत्यार हनोक पंयसट साल नो हयो, तत्यार तीनी सी मतुसेलह पयदा हयो। मतुसेलह ना पयदा हयवान बाद हनोक तीन ह़ोव साल तक भगवान ह़ाते–ह़ाते चालतो र्यो, अने तीना अळी बी सोरा-सोरी पयदा हया। आहयी रीते हनोक आखा मेळीन तीन ह़ोव पंयसट साल जीवत्लो र्यो। हनोक भगवान नी ह़ाते-ह़ाते चालतो हतो; अळतेण तीहयो गायप हय ज्यो काहाके भगवान तीने उपर हाकली लेदो।3
जत्यार मतुसेलह एक ह़ोव सत्यासी साल नो हयो, तत्यार तीनी सी लेमेक पयदा हयो। लेमेक ने पयदा हयवान अळतेण मतुसेलह ह़ात ह़ोव बय्यासी साल जीवत्लो र्यो, अने तीना अळी बी सोरा-सोरी पयदा हया। आहयी रीते मतुसेलह नी आखी जीवाय नव ह़ोव उन्सत्तर साल नी हयी; अळतेण तीहयो मर ज्यो।
जत्यार लेमेक एक ह़ोव बय्यासी साल नो हयो, तत्यार तीनी सी एक सोरु पयदा हयु। लेमेक आहयु कीन तीनु नाम नुह4 पाड़्यो, के “यहोवा जे धरती ने सराप आपलो से, तीना बारा मे आहयु सोरु अमारु काम करहे, अने तीहयी काठी मेहनत मे जे आमु कर्या, आमने सांती आपे।” नुह ना पयदा हयवान बाद लेमेक पांच ह़ोव पींच्यानु साल जीवत्लो र्यो, अने तीना अळी बी सोरा-सोरी पयदा हया। आहयी रीते लेमेक नी आखी जीवाय ह़ात ह़ोव सतोत्तर साल नी हयी; अळतेण तीहयो मर ज्यो।
अने नुह पांच ह़ोव साल नो हयो; अने नुह सी सेम, हाम अने येपेत पयदा हया।
Source notes (4)
- Cross-reference उबजणाय कीताप 1:27
- Cross-reference उबजणाय कीताप 1:27-28
- Cross-reference ईब्रानीयो 11:5; युहन्ना 14; परकासीतवाक्य 4:10; 2 राजा 2:11
- Footnote नुह नुहा नु मतलब अराम आपवा वाळो केदलु से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.