Paliya Bible
उबजणाय कीताप 36
एसाव नो कुळी वेलो
(1 ईतीहास 1:34-37)
एसाव जे एदोम बी केवाये, तीनो आहयो कुळी वेलो से। एसाव ते कनानी सोर्याम सी वेवा कर्यो; आहया तीना बयरा हता: हीत्ती एलोन नी सोरी आदा ने, अने ओहोलीबामा ने जे अना नी सोरी, अने हीव्वी सीबोन ना सोरी नी सोरी नी सोरी हती।1 अळतेण तीहयो ईस्माएल नी सोरी बासमत ने बी, जे नबायोत नी बेनेह हती, वेवा कर लेदो।2 आदा एसाव नी लारे एलीपज ने, अने बासमत रुएल ने पयदा करी। अने ओहोलीबामा ने युस, अने यालाम, अने कोरह ने पयदा करी। एसाव ना आहयात सोरा कनान देस मे पयदा हया।
तत्यार एसाव आह़फा नी लाड्यु ने, अने सोरा-सोरीम ने, अने घोर ना आखा जानवरुम, अने गाडरा अने बोकड़्या, अने गाय-बोळद्या अने आखा जानवरु, अने आह़फी आखी धन-दवलत ने, जे तीहयो कनान देस मे भेळी करलो हतो, लीन आह़फा भाय याकुब नी पांह गेथो बीजा देस जत र्यो। काहाके तीनी धन-दवलत एतरी हय जी हती, के तीहया एकठा नी री सक्या; अने जानवरु ढेरेत हयवा नी कारण तीहया देस मे, जां तीहया परदेसी हय्न रेता हता, ते एकठा नी री सक्या। एसाव जे एदोम बी केवाये, सेईर नाम ना बड़ा वाळा देस मे रेवा लाग्यो।
सेईर नाम ना बड़ा ना देस मे रेवा वाळा एदोमीया ना मुख्या अदमी एसाव नी पीड़ी आहयी से। एसाव ना सोराम ना नाम आहया से; एसाव नी लाडी आदा नो सोरो एलीपज, अने तीहयात एसाव नी लाडी बासमत नो सोरो रुएल। अने एलीपज ना सोरा हया; तेमान, ओमार, सपो, गाताम, अने कनज। एसाव ना सोरा एलीपज नी तीम्ना नाम नी एक पावर्याण हती तीने तीहयो राखी र्यो हतो; जे एलीपज नी लारे अमालेक ने पयदा करी: एसाव नी लाडी आदा नी अवल्यात मे आहयात हया। रुएल ना आहया सोरा हया; नहत, जेरह, सम्मा, अने मीज्जा एसाव नी लाडी बासमत नी अवल्यात मे आहयात हया।
ओहोलीबामा जे एसाव नी लाडी, अने सीबोन नी सोरा नी सोरी अने अना नी सोरी, हती तीना आहया सोरा हया: तीहयी एसाव नी लारे युस, यालाम अने कोरह ने पयदा करी।
एसाव ना घोराणा ना मुख्या आहया हया: एसाव नो मोट्लो सोरो एलीपज नी अवल्यात मे सी ते तेमान मुख्यो, ओमार मुख्यो, सपो मुख्यो, कनज मुख्यो, कोरह मुख्यो, गाताम मुख्यो, अमालेक मुख्यो एलीपज अवल्यात मे सी, एदोम देस मे आहयात मुख्या हया: अने आहयात आदा ना अवल्यात हया।
एसाव ना सोरा रुएल नी अवल्यात मे आहया हया; नहत मुख्यो, जेरह मुख्यो, सम्मा मुख्यो, मीज्जा मुख्यो रुएल ना घोराणा मे सी, एदोम देस मे आहयात मुख्या हया; अने आहयात एसाव नी लाडी बासमत नी अवल्यात मे हया।
एसाव नी लाडी ओहोलीबामा नी अवल्यात मे आहया हया; युस मुख्यो, यालाम मुख्यो, कोरह मुख्यो, अना नी सोरी ओहोलीबामा जे एसाव नी लाडी हती तीनी अवल्यात मे आहयात हया। एसाव जे एदोम बी केवायत्लो से, तीनी अवल्यात आहयात से, अने तीमना मुख्या बी आहयात हया।
सेईर नो कुळी वेलो
(1 ईतीहास 1:38-42)
सेईर जे होरी नाम नी जाती नो हतो, तीना आहया सोरा तीहया देस मे पेले सी रेता हता; लोतान, सोबाल, सीबोन, अना, दीसोन एसेर, अने दीसान: एदोम देस मे सेईर ना आहयात होरी जाती ना मुख्या हया।
लोतान ना सोरा, होरी अने हेमाम हया; अने लोतान नी बेनेह तीम्ना हती।
सोबाल ना आहया सोरा हया: आल्वान, मानहत, एबाल, सपो, अने ओनाम।
अने सीदोन ना आहया सोरा हया: अय्या, अने अना; आहयी तेत अना से जीने उजाड़ी बड़ा मे आह़फा ना बाह सीबोन ना गदड़ा ने चारते-चारते उन्ला पाणी ना झोर जड़्या। अने अना नो दीसोन नाम नो सोरो हयो, अने तीहयी अना नो ओहोलीबामा नाम नी सोरी हयी। दीसोन ना आहया सोरा हया: हेमदान, एसबान, यीत्रान, अने करान।
एसेर ना आहया सोरा हया: बील्हान, जावन, अने अकान।
दीसान ना आहया सोरा हया: उस, अने अरान।
होरीयो ना मुख्या आहया हया: लोतान मुख्यो, सोबाल मुख्यो, सीबोन मुख्यो, अना मुख्यो, दीसोन मुख्यो, एसेर मुख्यो, दीसान मुख्यो; सेईर देस मे होरी जाती वाळा आहयात मुख्या हया।
एदोम नो राजा
(1 ईतीहास 1:43-54)
अळतेण जत्यार ईस्रायली माणहु पोर कानो बी राजा राज्य नी करलो हतो, तत्यार बी एदोम ना देस मे आहया राजा हया; बोर नो सोरो बेला एदोम मे राज्य कर्यो, अने तीनी राजधानी नु नाम दीन्हाबा से। बेला ने मरवा बाद, बोस्रा मे रेवा वाळो जेरह नो सोरो योबाब तीना जागा पोर राजा बण्यो। योबाब ने मरवा बाद, तेमानीयो ना देस मे रेवा वाळो हुसाम तीनी जागा पोर राजा बण्यो। अळतेण हुसाम ने मरवा बाद, बदद नो सोरो हदद तीनी जागा पोर राजा बण्यो आहयो तेत से जे मीद्यानीयो ने मोवाब ना देस मे हराय देदो, अने तीनी राजधानी नु नाम अबीत से। हदद ने मरवा नी बाद, मस्रेका ह़ेर मे रेवा वाळो सम्ला तीनी जागा पोर राजा बण्यो। अळतेण सम्ला ने मरवा नी बाद साउल जे मोट्ली नंदी नी धेड़े वाळा रहोबोत ह़ेर नो हतो, तीहयो तीनी जागा पोर राजा बण्यो। साउल ने मरवा नी बाद, अकबोर नो सोरो बाल्हानान तीनी जागा पोर राजा बण्यो। अकबोर ना सोरा बाल्हानान ने मरवा नी बाद, हदर तीनी जागा पोर राजा बण्यो अने तीनी राजधानी नु नाम पाउ से; अने तीनी लाडी नु नाम महेतबेल से, जे मेजाहब नी सोरा नी सोरी से अने मत्रेद नी सोरी हती।
अळतेण एसाव ना घोराणा ना मुख्याम ना घोराणाम, अने जागा नी अनसारे तीमना नाम आहया से तीम्ना मुख्यो, अल्वा मुख्यो, यतेत मुख्यो, ओहोलीबामा मुख्यो, एला मुख्यो, पीनोन मुख्यो, कनज मुख्यो, तेमान मुख्यो, मीबसार मुख्यो, मग्दीएल मुख्यो, ईराम मुख्यो एदोम मे रेवा वाळा जे देस ने आपणु कर लेदला हता, तीमना रेवा वाळा जागा मे आहयात मुख्या हया; अने एदोमी जाती नो डायलो बाह एसाव से।
Source notes (2)
- Cross-reference 1 ईतीहास 1:34-37
- Cross-reference उबजणाय कीताप 28:9
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.