Paliya Bible
गलातीयो 2:20
Verse 20 is marked below, with the whole chapter around it. Read from the start
बीजा
चोवदे साल बाद मे बरनाबास नी ह़ाते यरुसलेम मे ज्यो अने तीतुस ने बी ह़ाते लीन ज्यो। अने मारु जवा नु भगवान ना वीजाळु ना लारे हयु अने जे खुस-खबर मे आड़जात्या मे परच्यार करु, तीने मेत तीमने देखाड़ देदो, पण एखला मे तीमने जे मोटा ह़मजता हता, काहाके आसम नी हये, के मारी आहयी टेम नी, नीता पासलो दवड़ो अमथो ठेरे। बाखीन तीतुस ने बी जे मारो ह़ाती भाय बी हतो अने आड़जात्यो से; खतनु करवा करीन मजबुर नी कर्या। अने आहयु तीहया झुटा भायु ना कारण सी हयु, जे चोराये अमारी वच मे भराय्न आय लागला हता, के तीहयी छुट ना जे ईसु मसी मे आमने जड़ली से, जाणीन आमने पावर्यो बणावे। तीना हक मे रेवा आमु जरीक वार बी नी मान्या, आनीन करते के खुस-खबर नी सच्चाय तमारी मे बणली रेय। अळी जे माणहु खास लागत्ला तीहया जे कोय बी हता, मने तीनी सी कंय फरक नी पड़े, भगवान कोय नु मोडु देखीन नीयाव नी करे तीमनी सी मने कंय बी फायदो नी हयो। पण तीना उलटु तीहया देख्या, के जीसम खतनु करला माणहु ना लेदे खुस-खबर नु काम पतरस ने ह़ोप मेक्यु, तेमेत खतनु नी करला माणहु ना लेदे खुस-खबर ह़मळाव्वा मने ह़ोप मेक्यु। काहाके जे भगवान पतरस ने खतनु करला माणहु मे नेवताळो बणाय्न सेवा नु काम करायो, तीहयोत मने बी आड़जात्या माणहु मे काम करायो। अने जत्यार तीहया ते दया ने जे मने जड़ली हती जाण लेदा, ता याकुब अने केफा, अने युहन्नो ने मंडळी ना डायला अगवा ह़मजता हता, मने अने बरनाबास ने ह़ंगात नो जमणो हात आपीन ह़ाती कर लेदा, के आमु आड़जात्यान तां जीया, अने तीहया खतना करलाम नी तां। नीस्तु आहयु केदु, के आमु गरीब नी खबर लेवो, अने आहयुत काम ने करवा नु मे आह़फोत बी कोसीस करतो हतो।
पोलुस नी लारे पतरस नो वीरोद
पण जत्यार पतरस अंताकीया मे आयो ता मे आखा माणहु नी अगळ तीनु वीरोद कर्यो, काहाके तीहयो पुरी रीती सी गलत हतो। आनीन करते के याकुब भणी गेथा थोड़ाक माणहु आञे आव्वा सी पेले, पतरस आड़जात्या भरहो करन्या ना ह़ाते खाया-पीया करतो हतो। पण जत्यार तीहया माणहु पुग्या, ता पतरस खतनु करला माणहु नी बीक ना लेदे तीमनी सी सेटो हय ज्यो अने एक धेड़े हयवा बाज ज्यो। अने तीनी ह़ाते बचला युहदी माणहु आहया ढोंग मे बी पतरस नो सात देदा अने कपट कर्या, आनी लेदे बरनाबास बी तीमना ढोंग मे पड़ ज्यो। पण जत्यार मे देख्यो, के तीहया खुस-खबर नी सच्चाय पोर ह़ुदी चाल नी चालता, ता मे आखा नी अगळ पतरस सी केदो, तु युहदी हय्न बी आड़जात्यान तेम चाले अने युहदीन तेम नी चाले ता तु आड़जात्या ने युहदीन तेम चाल चालवा काहा केतलो।
आमु जे पयदा सी युहदी से, अने पापी आड़जात्या मे गेथा नी हय। 2ते बी आहयु जाणीन के माणेह कायदा ना कामु सी नी, पण ईसु मसी पोर भरहो करवा ना लारे धरमी ठेरे, आमु ईसु मसी पोर भरहो कर्या, के आमु कायदा ना कामु सी नी पण मसी पोर भरहो करवा सी धरमी ठेर्या; आनीन करते के कायदा ना काम सी कोय माणेह धरमी नी ठेरे आमु जे मसी मे धरमी ठेरवा चाह र्या, कदी आड़जात्या नी तेम पापी नकळ्या, ता ह़ु मसी पाप नो पावर्यो से? कदी नी! काहाके जे कंय मे पाड़ देदो, कदी तीनेत फीर सी बणावु, ता मे आह़फा ने गुनाळ्ळो ठेरावु। मे ते कायदा ना लारे कायदा ना लेदे मर ज्यो, के भगवान ना लेदे जीवु। मे मसी ना ह़ाते कुरुस पोर चड़ावलो से, अने हाव मे जीवत्लो नी र्यो, पण मसी मारी मे जीवत्लो से। अने मे डील मे हाव जे जीवत्लो से ता नीस्तो तीहयात भरहा सी जीवत्लो से, जे भगवान ना सोरा पोर से, जे मारी सी मोंग कर्यो, अने मारी लेदे आह़फा ने आप देदो। मे भगवान नी दया ने नी नीकारतो। काहाके कदीम कायदा नी लारे माणेह ने धरमी ठेरावे, ता मसी नु मरवु फाल्तु से।
Source notes (2)
- Cross-reference नेवताळा ना काम 11:30; 15:2
- Cross-reference रोमीयो 3:20; रोमीयो 3:22
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.