Paliya Bible
गलातीयो 1
पोलुस भणी गेथी, जे मने नेवताळो बणवा करीन टाळलो से। जे नी माणहु भणी गेथु अने नी माणेह ना लारे, बाखीन ईसु मसी अने भगवान बाह ना लारे, जे तीने मरला मे गेथो जीवाड़लो से। अने आखा भाय-बेन्या भणी गेथी, जे मारी ह़ाते से; गलातीया ना मंडळ्या ने वारला से के कीया।
अमारा भगवान बाह अने मालीक ईसु मसी नी भणी गेथी तमने दया अने सांती जड़ती रेय।
तीहयोत आह़फा ने अमारा पाप नी लेदे आप देदो, काहाके अमारा भगवान अने बाह नी मरजी ना अनसारे आपणु ने हमणे नी बुरी कळी सी छोड़ावे। तीनीत बड़ाय जलमकी हयती रेय। आमीन।
एकीत खुस-खबर
मने घणु जुदु लागे, के जे तमने मसी नी दया सी बोलायो तीनी सी तमु एतरा सोटा भटकीन बीजी भाती नी खुस-खबर भणी वळवा बाज ज्या। बाखीन तीहयी बीजी खुस-खबर हय नी, पण वात आहयी से, के केतरा आसवा से, जे तमने घबराड़ देय, अने मसी ना खुस-खबर ने बदलवा हींड र्या। बाखीन कदीम आमु नीता ह़रग सी कानो दुत बी तीहयी खुस-खबर ने सोड़ीन जे आमु तमने ह़मळावला से, कोय अळी खुस-खबर ह़मळावे, ता सरापीत हये। जेम आमु पेला की देदला से, हेमेत मे हमणे अळी केम, तीहयी खुस-खबर ने सोड़ीन जीने तमु ली लेदला से, कदीम कोय बीजी खुस-खबर ह़मळावतो हय ता सरापीत हये।
हाव मे ह़ु माणहु ने मानु के भगवान ने? ह़ु मे माणहु ने खुस करवा हींड र्यो? कदीम मे हमणे तक माणहु नेत खुस करतो रेतो, ता मसी नो पावर्यो नी रेतो।
भगवान लारे पोलुस नो बोलावो
ए भायु, मे तमने देखाड़ देम, के जे खुस-खबर मेत ह़मळावलो से, तीहयी माणेह नी बणावली नी हय। काहाके तीहयो मने माणेह नी भणी गेथो नी पुग्यो, अने नी मने ह़ीकाड़्या, पण ईसु मसी मारी पोर उजन्तु कर्यो। 1
युहदी-धरम मे जे पेले मारो चाल-चलण हतो, तमु ह़मळी लेदला से; के मे भगवान नी मंडळी ने घणोत वेला पाड़त्लो अने खत्तम करतो हतो। 2अने मे युहदी-धरम मे आपणा ह़ाती युहद्या सी वदु अगो वदतो हतो अने आपणा आड़ा-बुड़ा नी रीती-रीवाज मे घणोत होह हतो। 3
बाखीन भगवान नी जत्यार मरजी हयी, तीहयो मारी आह्य ना पेट मेत गेथो मने ठेरावलो से अने आपणी दया सी बोलाय लेदो। जत्यार तीहयो वीच्यार कर्यो के मारी मे आपणा सोरा ने उजन्तो करे के मे आड़जात्या मे तीनी खुस-खबर ह़मळावु, ता मे काना माणहु सी ह़ला नी लेदो। अने नी यरुसलेम मे तीमनीन्तां मळवा ज्यो, जे मारी सी पेले नेवताळा हता, पण तत्यारुत अरब मे जत र्यो अने अळी तां गेथो दमीस्क मे आवती र्यो। 4अळी तीन साल अळतेण मे पतरस सी भेटवा करीन यरुसलेम मे ज्यो, अने तीनी ह़ाते पन्दरे दाड़ा लग र्यो। पण मालीक ना भाय याकुब ने सोड़ीन अने बीजा चेला मे कोयने नी भेट्यो।
जे वातु मे तमने लीखु, भगवान नी हजरी जाणीन केम के तीहयी झुटी नी हय।
तीनी अळतेण मे सीरीया अने कीलीकीया ना देस मे आयो। पण युहद्या नी मंडळ्या ने जे मसी मे हती, तीने कदी नी भेट्यो अने मारु मोडु कदी नी देखला हता। पण मार बारा मे आहयुत जाणता हता अने ह़मळ्या जे पेले आमने वेला पाड़तो हतो, तीहयो हाव तीनात भरहा नी खुस-खबर ह़मळावे, जीने पेले खत्तम करतो हतो। अने तीहयी मंडळी मारा बारा मे भगवान नी बड़ाय कर्या करती हती।
Source notes (4)
- Cross-reference नेवताळा ना काम 8:3; 22:4,5; 26:9-11
- Cross-reference नेवताळा ना काम 22:3
- Cross-reference नेवताळा ना काम 9:3-6; 22:6-10; 26:13-18
- Cross-reference नेवताळा ना काम 9:26-30
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.