Skip to content
BibleKenya

Paliya Bible

2 कुरन्‌थी 13

आखरी चेतावणी

तमारीन्‌तां मे तीसरी कावा आव्‌वा बाज र्‌यो। एक-एक सच्‌चाय ने पुरी करवा करीन बे नीता तीन गवा नी जरवत रेय। जेम मे बीजी कावा तमारी ह़ाते हतो, तेमेत हाव सेटो रीन तीहया माणहु ने जे पेले पाप करला, अने बीजा आखा माणहु ने बी हाव पेले गेथोत की देम के मे कदीम अळी आवही ता नी सोड़ु, काहाके ईसु मसी मारी मे रीन बोले आहयी वात नो तमु गवा ह़ोद र्‌या। आहयो ईसु मसी कमजोर नी हय: पण तीहयो तमने ह़ुदारवा करीन तमारी वच मे जोर वाळो से। ह़ाचलीन, तीहयो जाण बुजीन कमजोर बण जेलो, अने तीने कुरुस पोर चड़ाय देदला हता, ते बी भगवान ना जोर नी लारे तीहयो मर्‌या-ह़र्‌या मे गेथो जीवतो हय जेलो। ईसुन तेमेत आमु बी कमजोर से; पण भगवान ना जोर नी लारे जीवता रीन तमारी सेवा करवा करीन आमु जोर वाळा से।

आह़फा ना मन ने पारखो के तमु ईसु पोर भरहो कर र्‌या के नी करता? तमु आह़फा नी जीवाय ने पारखो के तमारी मे आहयी वात नो पुरावो हय के नी हय। तमरात बारा मे तमने मालम नी हय ह़ु? तमारी मे ईसु मसी नी हय ह़ु? नी हय, ता ते तमु पारख मे खोटला नीकळ्‌या। पण मारी आह से तमु आह़फा ने पारखहु ता जाण लेहु के आमु रीकामा नी हय। अने आमु आपणा भगवान पांह तमारी जुगु आहयी वीन्‌ती करया के तमु कानी बी कुहराय ना करो; एम करीन मे आहयु नी केतो के आमु खरला देखाव पड़या, पण आनीन करते के तमु भलाय करो, भले माणहु आमने रीकामा केवा जोवे। काहाके आपणु ने सच्‌चाय ना वीरोद मे कंय बी नी कराये, पण सच्‌चाय जुगुत कंय बी कराये। जत्‌यार आमु कमजोर रीया अने तमु जोर वाळा रेवो, ता आमु खुस हवया, अने आहयी वीन्‌ती बी करया के तमु पक्‌का हय जावो। एतरे मे सेटो रीन बी आहयी वात ने तमारी जुगु लीख र्‌यो के जत्‌यार मे तमारी वच मे आवु ता मने मालीक ईसु नी लारे आपला हक नी लारे तमने वडवा पड़े ते बी तीहयु तमारा नुकसान जुगु नी पण तमारा फायदा जुगु।

आखरी काव वारला से के केम

आखरी मे। भायु अने बेन्‌या, खुस रेवो। पक्‌का हयता जावो; हीम्‌मत राखो; एक-मन्‌या हय्‌न रेवो; हेळी-मेळीन रेवो, ता मोंग अने सांती आपण्‌यो भगवान तमारी ह़ाते रेहे।

चोखला मन सी कुको दीन एक-बीजा नो आव-भाव करो।

आखा भगवान ना भगत माणहु तमने आवही अने आवजो की र्‌या। अमारा मालीक ईसु नी संयबरकत अने भगवान नो मोंग अने चोखली आत्‌मान ह़ात-ह़ंगात तमु आखा भेळती रीया करे।

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.