Paliya Bible
2 कुरन्थी 12
पोलुस नो दरसन
मोटाय करवा वारु नी हय, ते बी मोटाय करवात पड़ र्यु; एतरे मालीक ईसु मने जे सेलभात्याण चीज अने वण-देख्याण चीज देखाड़्यो, तीहया चीज ना बारा मे मे वात करही। मे ईसु मसी पोर भरहो करन्या एक माणेह ने जाणु, जे आज गेथो चोवदे साल पेलो, आखान उचा ह़रग मे उचलाय जेलो जां ह़ारीक भगवान रेय जे तीसरो ह़रग से। मालम नी डील भेळे उचलाय जेलो, के डील वगर नीस्तो आत्मा भेळे उचलाय जेलो, आहयी वात ने ते भगवानेत जाणे। मे तीहया माणेह ने जाणु, मालम नी डील भेळे, के डील वगर नीस्तो आत्मा मे, आहयी वात ते भगवानेत जाणे। ह़रग मे उचलाय जेलो जां ह़ारीक भगवान रेय, अने आहयो माणेह एवी वात ह़मळ्यो, जे वात बीजा ने ह़मळावे एवी नी हय; होव, जे वात ने मोडे लाव्वा माणहु जुगु वारु नी हय। आहयी ह़रग नी वात मोटाय करे एवी से, पण मे ते मारी कमजोरी पोरेत मोटाय करही, आहयी कमजोरी नी वात ने सोड़ीन कानी बी वात पोर मोटाय नी करु। कदीम मे मोटाय करवा बी हींडु ते बी गांडो नी केवायु, काहाके मे जे बी देख्यो अने ह़मळ्ळो हतो तीहयुत ह़ाची हतु; ते बी मे तीहयीत वात ने केवा मे होगो री जाम; कंखर माय्न आसम नी हय जाय के, जे कोय मने देखे अने मारी ह़मळे तीहयो मने आहयी वात ने सेकीन नी मानवा जोवे। मे भगवान ना वण-देख्या अने सेल-भात्याण चीज ने देखलो से करीन मोटाय नी करवा जोवे करीन भगवान मारा डील मे घोदलायण्यो दुख पयदा करलो से। पोलुस आह़फा पोर भरहो करीन मोटाय नी करवा जोवे करीन भगवान मारीन्तां, भुतड़ा नो एक दुत मोकल्लो से, जे मने घोदल्या करे। आना बारा मे मे मालीक ईसु पांह तीन कावा वीन्ती कर्यो, के आहयो दुख मारीन्तां गेथो सेटो कर। पण मालीक ईसु मने केदो, “मारी दया तारी जुगु रेट से; काहाके तारी लुलखाय मे मारो जोर उजन्तो मालम पड़े।” एतरे मे, खुस हय्न मारी कमजोरी पोर मोटाय करही, आनीन करते के ईसु मसी नो जोर मारी उपर साहळो करतो रेय। एतरे मे ईसु मसी नी लेदो मारी कमजोरी मे, नामबद्दी करे ते बी, गरबाय मे बी, आफत मे आवे ते बी, अने जबरजस्ती करे ते बी, खुस रेम; काहाके जत्यार मे कमजोर रेम ता ते मे जोरभर्यो हय जाम।
कुरन्थी वाळा ईसु पोर भरहो करन्या जुगु पोलुस नी फीकर
मे गांडो ते बण ज्यो, पण तमुत मने जबरजस्ती गांडो बणाय देदा, तमु मारी जीवाय देखीन मारा बारा मे बीजा अगळ आहयो घण वारु से केवा हतु भले माणहु केय “मे कंय नी हय” ते बी मे तीहया मोट्ला नेवताळा गेथो कम नी हय। ईसु ना नेवताळा नी सेलाणी घण-जबर गम भेळे तमारी वच मे मारी लारे सेलाणी नी, अने सेल-भात्या काम नी लारे, अने भगवान ना ताखत वाळा काम नी लारे देखाव पड़ी। बीजी मंडळी ना माणहु तमने कमजोर काहा ह़मज्या, आनीन करते ह़मज्या काहाके मे तमारी पोर बोजो नी बण्यो? अने आहयी मारी भुल मने माफी आपो।
हाव मे तीसरी कावा तमारीन्तां आव्वा करीन तीयार से, अने मे तमारी पोर बोजो नी बणु, काहाके मने तमारी कानी बी चीज नी जोवती, पण तमु जोवे। काहाके सोरा-सोरी आय्ह़-बाहा जुगु धन भेळु नी करे, पण आय्ह़-बाहा सोरा-सोरी जुगु धन भेळु करे। मे खुस हय्न तमारी जुगु मारी पांह जे कंय से तीहयु आखु खरचो करही अने आह़फोत खरचो हय जही, मे ते तमने घण-जबर मोंग करु ता तमारी वगे गेथो कम मोंग जड़वा जोवे ह़ु?
तमने मालम के मे तमारी पोर भार नी बण्यो, पण बीजा माणहु केहे के मे कदर करीन तमने फसाड़ लेदो। मे जे माणहु ने तमारीन्तां मोकल्लो तीमनी लारे तमारी पांह कंय ली लेदलो ह़ु? कदी नी। मे तीतुस ह़ाते ईसु पोर भरहो करन्यो एक-बीजा भाय ने बी मोकल्लो। तीतुस कंय तमारी पांह ठगीन मांग्यो ह़ु? कदी नी। अने आमु बी तीहयीत ह़ीकाड़ली वाट्ये नी चाल्या ह़ु?
तमु हजु लग आहयुत ह़मजी र्या हहे के आमु तमारी अगळ अमारोत बचाव करवा करीन की र्या, ए मोंगाळ्ळा भाय अने बेन्या, आमु ते भगवान नी हजरी मे ईसु मसी ना हक मे बोलया, अने आखी वात तमारा नफा नी करते कीया। काहाके मने बीक से के कंखर माय्न मे तमने देखवा नी हेर कर र्यो तेम नी देखु अने जेम तमु मने देखवा नी हेर कर र्या तेम मे नी देखायु। अने कंखर माय्न आसम नी हय जाय के मे तमारी मे झगड़ो, आंबा-सांबा वाक काडवा, वात मे जखड़ी पड़वा, अने चुगली अने मोटाय अने खुन-खराबो देखु। अने कंखर माय्न आसम नी हय जाय के मे तमारीन्तां आवु ता मारो भगवान तमारी अगळ नीचळो बणाय देय अने मे तीहया आखा जुगु दुखी हयु जे वीत्या दाड़ा मे पाप कर्या अने गलत काम कर्या, चंगलाय कर्या अने छीनाळु कर्या ते बी पाप नी माफी मांगीन भगवान भणी नी वळ्या।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.