Skip to content
BibleKenya

Paliya Bible

2 कुरन्‌थी 11

पोलुस अने झुटा नेवताळा

भले मारी मोटाय नी वात तमने गंडवायला माणहु ह़रकी लागे, ते बी मारी गंडवायली वात ने वेठ लेवो। काहाके मे तमारी जुगु भगवान ने तेम घण-जबर फीकर कर र्‌यो। काहाके मे एकीत माणेह ह़ाते तमारी ह़गाय करवा नी बोली करलो से अने तीहयु माणेह मसी से, मे आनीन करते आहयी वेवा नी वात करलो से मे एक कुवारी चोखली सोरीन तेम तीना हात मे ह़ोप देम। पण मने बीक लाग री के कंखर माय्‌न जेम गड़हो पेल्‌ना वारा मे जेम हवा ने कदर करीन ठग लेदलो तेम तमने ते नी ठग लेय अने तमारा मन ने ईसु मसी नी चोखली भक्‌ती गेथा सेटा ते नी कर देय। काहाके कदीम कोय आवीन बीजा ईसु ना बारा मे केय, जीना बारा मे आमु कोयने नी केदा; नीता कदीम बीजी आत्‌मा जड़ जाय, जे पेले नी जड़ी हय; नीता कंखर माय्‌न बीजीत खुस-खबर ह़मळ्‌या हय, जे खुस-खबर ने तमु पेले नी मान्‌या हय; ता तमु तीनी वात ह़ेल्‌येत मान लेवो।

मे आहयु ह़मजु के मे कानी बी वात मे मोटा सी मोटा नेवताळा गेथो कम नी हय। भले मने वारु बोलाये नी; ते बी अक्‌कल वाळो से, मे आहयी सच्‌चाय नी वात, आखी भाते ह़ीकापण नी लारे, पुरावो दीन तमारी आखा अगळ उजन्‌ती कर देदलो से।

तमने भगवान नी नींगा मे मोट्‌ला बणाव्‌वा करीन मे पय्‌हा लेदा वगर, भगवान नी खुस-खबर तमने ह़मळायो; अने आह़फा ने नानो अने हेटो कर देदो, जरीक वीच्‌यार करो ईसम करीन मे कंय पाप कर्‌यो ह़ु? ईसु नी बीजी वेगळे वाळी मंडळी पांह गेथु जे बी मने भेट जड़लु तीहया भेट ना पय्‌हा मे तमारी पोर खरचो करीन तमारी सेवा कर्‌यो। 1अने जत्‌यार मे तमारीन्‌तां हतो, ता मने पय्‌हा जोय पड़ला, तत्‌यार मे तमारी माय्‌न कोय पांह बी पय्‌हा नी मांग्‌यो, पण मकीदुनीया जीला नी मंडळी वाळा आवीन भाय-बेन्‌या मने पय्‌हा आपीन मने मदत कर्‌या: अने मे तमारी गेथो अलग रीन तमारी पांह कंय नी मांग्‌यो, अने मांगु बी नी। ईसु मसी नी सच्‌चाय मारी मे से, एतरे अखाया परगणा मे कोय बी आहयी वात पोर मोटाय करवा सी मने नी रोके। काहा नी रोके? मे तमने मोंग नी करु करीन ह़ु? भगवान आहयी वात ने जाणे, के मे तमने मोंग करु।

जे काम मे करतो आय र्‌यो तीहयु करतोत रेही, के जे मोट्‌ला चेला केवाड़े, अने मोखो ह़ोद र्‌या, तीमने मे मोखो नी आपु, के जे वात मे आमु घमंड करया तीहयी वात मे तीहया बी घमंड कर सके। काहाके एवा माणहु झुटा नेवताळा, अने ठगण्‌या, अने मसी ना नेवताळा नो रुप लेवा वाळा से। आहयी वात ह़मळीन तमने वहराय्‌न भुले नी पड़वा जोवे काहाके भुतड़ो आह़फोत पपलन्‌या ह़रगदुत नो नकली वेह़ लीन ढोंगड़ा करे अने भुले पाड़े। एतरे कदीम भुतड़ा ना चाकर्‌या बी धरम ना चाकर्‌या नो वेह़ लीन ढोंगड़ा करे, ता आहयु देखीन वहराय्‌न भुले नी पड़वा जोवे, पण आखरी मे तीमना काम नी अनसारे तीमनो नीयाव हयहे अने डंड जड़हे।

पोलुस आह़फा ना दुख झेले

मे अळी केम, कोय मने गांडो ना ह़मजो; पण गांडो ह़मजीत र्‌या ता गांडोत ह़मजीन मारी वात मानो, आनीन करते के मे बी थोड़ीक वात मे मोटाय कर सकु। मे जे की र्‌यो तीहयु मालीक ईसु नी मरजी सी नी केतो, पण गांडा नी तेम आत्‌मा ना भरहा ना मोटाय मे की र्‌यो। ढेरेत माणहु डील नी अनसारे मोटाय करे ता मे बी मोटाय काहा नी करु? तमु ते अक्‌कल वाळा बणीन गांडा नी गंडाय, खुसी सी वेठ लेवो! देखो, जत्‌यार तमने कोय गुलाम बणाय लेय नीता तमने बरबात कर देय नीता तमारी पांह फायदो लेय नीता आह़फा ने तमारी वच मे मोटो बणावे नीता तमारा गाल्‌ये थापड़ देय, ता तमु तीनी वेठ लेवो। मे लजवाय्‌न आहयु केम के आपणु आंबा-सांबा मे वारु तु नी वारु कीन कमजोर हय जेला से, पण कानो कानी वात मे हीम्‌मत करतो हय, पण मे बी गंडवायेत केम ता मे बी तेतरीत हीम्‌मत करु। तीहया एतरात ईब्‌रानी जाती वाळा से ह़ु? मे बी से। तीहया एतरात ईस्‌रायली जाती वाळा से ह़ु? मे बी से। तीहया एतरात अब्‌राहम नी अवल्‌यात से ह़ु? मे बी से। 2तीहया एतरात मसी ना चाकर्‌या से ह़ु? मे गंडवायलान तेम केम के मे तीमनी गेथो सेकीन से, जादा मेहनत करवा मे, ईसु नी लेदे वळ-वळीन जेल मे जवा मे, गीणाये नी एतरी कावा कुटायवा मे, ढेरेत कावा मरतो-मरतो बचवा मे। युहदी माणहु मने पांच काव एक कम चाळीह़-चाळीह़ ह़ड़का देदा। 3तीन कावा मने ह़ोटी वेर देदा, एक कावा दगड़ाट्‌या, तीन कावा मारी ढुंड्‌या मे घणी वीती एक रात अने दाड़ो मे दर्‌या मे र्‌यो। 4मे वळ-वळीन आञे अने ह़ेले जतो र्‌यो, नंद्‌या मे बी वेला कर्‌यो, मारा देस वाळात मने वेला पाड़्‌या, ह़ेर वाळा बी वेला पाड़्‌या, डाकु माणहु बी मने वेला पाड़्‌या, युहदी अने आड़जात्‌या बी वेला पाड़्‌या, बड़ा मे बी वेला कर्‌यो, दर्‌या मे बी वेला कर्‌यो, झुट मेलन्‌या भायु नी लारे बी वेला कर्‌यो। मे काम करी-करीन अने वेला करी-करीन दाड़ा काट्‌यो, आखी रात जागीन रात काट्‌यो, भुकलो अने तरहेलो दाड़ा काट्‌यो काय केतरी कावा उपाह़ पाळ्‌यो, बारो रीन टाड वेठ्‌यो। आहयी आखी वात ने सोड़ीन मने दाड़ीनेत ईसु नी मंडळी नी फीकर आवे। कोय कमजोर हये अने मे कमजोर नी हयु? कोय पाप करे अने मे दुखी नी हयु?

कदीम मने मोटाय करवात पड़े ता मे मारी कमजोरी पोरेत करही। मालीक ईसु नो भगवान बाह, जे जलम जुगाळो से, तीहयो जाणे के मे झुट नी मेल्‌तो। 5दमीस्‌क ह़ेर नो अरीतास राजो जे राज करतो हतो, तीहयो मने धराव्‌वा करीन दमीस्‌क ह़ेर ना झापला पोर सीपायड़ा नो पेहरो बहाड़ र्‌यो हतो। तत्‌यार मारा ह़ाती मने चार्‌या मे बहाड़ीन कीला ना भीतड़ा नी खीड़की मे गेथा दोड़ु बांदीन उतार देदा अने मे तीमने नी धरायो अने मे नाह ज्‌यो।

Source notes (5)
  1. Cross-reference फीलीपीयो 4:15-18
  2. Cross-reference नेवताळा ना काम 16:23
  3. Cross-reference नेवताळा ना काम 16:22; नेवताळा ना काम 14:19
  4. Cross-reference नेवताळा ना काम 9:23; नेवताळा ना काम 14:5
  5. Cross-reference नेवताळा ना काम 9:23-25

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.