Paliya Bible
2 कुरन्थी 10
पोलुस नो हक
हाव मे तीहयोत पोलुस, जे तमारी अगळ ईसु मसीन तेम नीचळो अने भोळो से, पण तमारी मे एवा माणहु बी से जे आहयु कीन गुनो लगाड़े के जत्यार पोलुस तमारी अगळ रेय ता नीचळो अने भोळो हय जाय पण जत्यार तमारीन्तां गेथो जत रेय ता चीट्ठी मे लीखीन आहयु देखाड़े के मे घण डहवाळो से। एतरे मे तमारी पांह वीन्ती करु के तमारी अगळ मने डहवाय नी करवा पड़े; जेम मे ढेरेत माणहु अगळ डहवाय करवा नो वीच्यार करु जे आमने कळी नी रीतीन अनसारे माणहुन तेवा जीव्वा वाळा ह़मजे। भले आमु कळी मे रीन जीवया ते बी कळी नी अनसारे झगड़ो नी करया। काहाके अमारा झगड़ा नो हत्यार डील नी रखवाळी करन्या हत्यार ह़रकु नी हय, पण भुतड़ा ना वण-देख्या ठीया ने ओदारवा करीन भगवान नी लारे आपला ताखत वाळा वण-देख्या हत्यार से। ह़ाचलीन, आमु आहया हत्यार नी लारे माणहु ना एक-एक मोटाय ना वीच्यार ने अने भगवान ने जाणवा नी देवा वाळा माणहु ना वीच्यार ने, अने आखा गलत वीच्यार ने बांदीन मसी नो हुकम मानवा वाळा बणाय दीया। एम करीन तमु ईसु ना आखा हुकम पाळहु ता जे हुकम नी माने तीमनो आमु बदलो ली लेहु।
तमु ते तीहयी चीज ने एतरात देखो जे तमारा डोळा अगळ देखाये, मन नी वात तमु नी जाणो। कदीम तमारी माय्न कोयने आहयो भरहो से के मे ईसु मसी नो से, ता तीहयो आहयु बी जाण लेवा जोवे के जेम तीहयो ईसु मसी नो से तेमेत आमु बी से। मालीक ईसु जे हक आमने आपलो से तीहयो हक तमने बगाड़वा करीन नी पण ह़ुदारवा करीन आपलो से मे आहया हक पोर मोटाय करही अने लजवायु नी। मे आनीन करते की र्यो के तमने आसम नी लागवा जोवे के तमने मारी चीट्ठी नी लारे बीहाड़ र्यो। काहाके तीमनु केणु पड़े के “तीना चीट्ठ्या ते घणा जुदा अने घणा ताखत वाळा से; पण जत्यार तीहयो आवीन वात देखाड़्यो ता कमजोर अने कोयने गमे नी एवी से।” एतरे जे बी आसम की र्या, तीहया आहयु जाण लेवा जोवे के आमु सेटा रीन जे बी चीट्ठ्या मे लीखया; तीहयु आमु तमारीन्तां आवया ता तेमेत काम करीन बी देखाड़या।
आमु तीहया माणहु ह़ाते गीणायवा हीम्मत नी करया जे आह़फा ने वारु ह़मजे; पण जत्यार तीहया आह़फा ने आह़फा ना ह़ाते तोले ता तीमने मालम पड़ जाय के तीहया केतरा वण-अकल्या से। पण आमने जेतरी वात करवा जोवे तेतरीत करहु वात ना गोफण-गोळा सोड़ीन मोटाय नी करया पण भगवान आमने जे-जे केवा नु काम ह़ोप देदलो से तीहयुत केहु; आहयीत वात तमने बी की देदला से अने आहयी वात मेत मोटाय करया। आमु जेतरी जागे खुस-खबर नु काम करला से तीहयी वात पोर एतरात मोटाय करहु, आमु तमारी पोर बी मोटाय करहु काहाके आमु तमारीन्तां मसी नी खुस-खबर पेले लाया। जां ह़ारीक बीजा माणहु जाय्न खुस-खबर ह़मळाया तीहयी वात पोर आमु मोटाय नी करया, अने आमने आह से के जेम-जेम तमारो भरहो ईसु पोर वदतो जहे तेम-तेम तमारी लारे भरहो वदहे। तेम-तेम भरहा मे तमारी लारे वदती जहे। अने आमु तमारी काकड़ सेकीन बी खुस-खबर ह़मळावहु, अने जां ह़ारीक बीजा खुस-खबर ह़मळावा नु काम कर्या तीहया कामु पोर मोटाय नी करया।
जेम खरला सास्तर मे बी लीखलु से, “मोटाय करवा हय, ता मालीक भगवान पोरेत करो।” काहाके जे आह़फा नी बड़ाय आह़फोत करे तीनी पोर नी; पण जीनी बड़ाय मालीक करे भगवान तीनेत अवरे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.