Paliya Bible
2 कुरन्थी 9
ह़ाती मसी माणहु जुगु मदत
हाव, तमु दान आपीन युहद्या ना माणहु जुगु आहयी सेवा कर्या, तीहया दान नी सेवा ना बारा मे अळी अगु नी लीखतो। काहाके मे तमारा मन नी तीयारी ने जाणु के तमु दान आपवा तीयार से, अने जे दान नी सेवा ना बारा मे मे मकीदुनीया वाळा ईसु पोर भरहो करन्या अगळ मोटाय बी करु, के अखाया मे रेवा वाळा माणहु एक साल गेथा तीयार से, अने तमारी दान आपवा नी हेर अळी ढेरेत जणा ना मन मे बी हेर पयदा कर देदली से। पण मे ईसु पोर भरहो करन्या भाय-बेन्या ह़ाती ने आनीन करते मोकल्लो से के आमु जे तमारा बारा मे मोटाय करला हता, तीहयी मोटाय वायबार नी जवा जोवे; पण जीसम मे केदलो हतो तेमेत तमु तीयार से। कंय माय्न ईसम नी हयवा जोवे के कानो मकीदुनीया रेवा वाळो अमारी ह़ाते आवे अने तमने तीयार नी देखीन आमने अने तमने लजवायवा पड़े काहाके आमु तमारा बारा मे पेले सी भरहो कराय नाखला हता के तमु दान आपवा मे घणा वारु से। एतरे मे भायु नी लारे आहयी वात पेलेत की देवा वारु ह़मज्यो, के तीहया पेले तमारीन्तां आवीन दान आपवा ना बारा मे कीन तमने तीयार करे, जीना बारा मे तमने पेलेत की देदलो हतो, आहयु दान नु काम जोर करीन मांगवा नी जोवे पण खुसी सी आपवा जोवे।
फोम राखजो: जे कमतु वेरहे तीहयो कमतुत वाडहे, अने जे जादा वेरहे तीहयो जादा वाडहे। जे बी माणेह जेतरु बी दान आपवा नो मन मे वीच्यार कर र्यो हय तेतरुत दान आपवा जोवे, काला-वीला जीव करीन नी आपवा जोवे, अने नी आपवा नु मन हय ते बी जबरजस्ती नी आपवा जोवे, काहाके जे खुसी सी आपे भगवान तीनेत मोंग करे। अने भगवान आखी भाती नी संयबरकत तमने आप सके, जीनी सी तमु आखी वात मे अने आखी टेमे, जे जोवे तीहयु आखु तमारी पांह रेवा जोवे, अने बीजा नु भलु करवा जुगु तमारी पांह ढेरेत रेवा जोवे। जेम सास्तर केय
“तीहयो भलाय सी, गरीब ने आप देदो,
तीनी भलाय जलम बणली रेहे।”
एतरे जे वेरवा वाळा ने बीज अने खावा वाळा ने रोट्लो आपे, तीहयो तमने वेरवा करीन बीज आपहे अने तमारा भलाय ना काम नी सेवा वदाड़हे। तत्यार तमु आखी वात मे आखी भाते मालदार बणावहे; अने एम करीन के तीहया भगवान ने घणो वारु कीया करे। दान नी आहयी सेवा करवा सी भगवान ना चोखला माणहु नी जरवत पुरी हये, अने तीमना मन मे भगवान ने घणो वारु से केवा नु मन हयतु जाय। आहया दान नी सेवा भगवान वगे गेथीत से करीन तीहया भगवान ना गुण गावहे, काहाके तमु ईसु मसी नी खुस-खबर ने मन मे उतारीन तीनी वात मानीन तीना हक मे रेवो, अने ईसु मसी नी अने नीचळा मन सी दान आपीन आखा नी मदत करवा तीयार रेवो। अने एम करीन तीहया बी तमारी जुगु वीन्ती करे; अने तमारी पोर भगवान नी संयबरकत उजन्ती हयी करीन तमारी हेर बी करे। एतरे आवो, आपणु भगवान ने घणो वारु से कीया जीनी कीमत गीणाये नी एतरी से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.