Skip to content
BibleKenya

Paliya Bible

गलातीयो 3

भरहो नीता कायदा नो पाळण करवा

ए वण-अकल्‌या गलातीया, कोय तमने मनवी लेदु? तमारा ते मानो डोळा ना अगळ ईसु मसी कुरुस पोर देखाड़लो से! मे तमारी सी नीस्‌तु आहयु जाणवा चाहु, के तमु चोखली आत्‌मा ने, कायदा पाळवा सी, नीता खुस-खबर ह़मळवा सी, नीता भरहो करवा सी जड़ी? ह़ु तमु एतरा वण-अकल्‌या से, के भगवान नी आत्‌मा नी रीती पोर चालु करीन हाव डील नी रीती पोर पुरु करवा हींड र्‌या। तमु एतरो दुख फाल्‌तु झेल्‌या ह़ु? पण कदी बी फाल्‌तु नी। जे भगवान तमने आत्‌मा आपे अने तमारी मे जोरभर्‌यु काम करतो हय, तीहयो ह़ु तमु कायदा ने मानवा सी के तमु खुस-खबर ह़मळ्‌या अने भरहो कर्‌या करीन आसम करतलो? 1

जीसम अब्‌राहम नी जानकारी ना बारा मे सास्‌तर मे लीखलु से। तीहयो ते भगवान पोर भरहो कर्‌यो अने तीहया भरहा ना कारण भगवान तीने धरमी मान्‌यो। 2ता आहयु जाण लेवो, के जे भरहो करवा वाळा से, तीहयात अब्‌राहम नी अवल्‌यात से। अने चोखली सास्‌तर मे पेलेत सी देखाड़ देदलो, के भगवान आड़जात्‌या ने भरहा सी धरमी ठेरावहे, पेलेत सी अब्‌राहम ने आहयी खुस-खबर ह़मळाय देदी, के तारी मे आखा माणहु ने बरकत जड़हे। अब्‌राहम भरहो कर्‌यो अने बरकत जड़ी, तीनीन तेम जे भरहो करे तीहया बरकत हात करे।

आनी लेदे जेतरा माणहु कायदा नो पाळण करीन जीवता हय, तीहया आखा सराप ना हक मे से, काहाके सास्‌तर मे लीखलु से, जे कोय कायदा नी कीताप मे लीखली आखी वातु ने करवा मे टेकलो नी रेय, तीहयो सरापीत से। पण आहयी वात उजन्‌ती से के कायदा ना लारे भगवान ने तां कोय धरमी नी ठेरे, काहाके धरमी माणेह भरहा सी जीवत्‌लो रेहे। पण कायदा नो भरहा सी कंय रीस्‌तो नी हय; काहाके “जे तीमने मानहे, तीहयो तीमना कारण जीवत्‌लो रेहे।”

मसी जे अमारी लेदे सरापीत बण्‌यो, आमने वेचाता लीन कायदा ना सराप गेथो सोड़ायो काहाके सास्‌तर मे लीखलु से, “जे कोयने लाकड़ा ना कुरुस पोर टांग देता हय तीहयो सरापीत से।” आहयु आनीन करते हयु, के अब्‌राहम नी बरकत मसी ईसु मे आड़जात्‌या लग पुगे, अने आमु भरहा ना लारे तीहयी आत्‌मा ने हात करीया, जीनो वायदो भगवान करलो से।

कायदा अने वायदो

ए भायु अने बेन्‌या, मे तमने एक दाड़ा नो उदारण देखाड़ र्‌यो; जेम काना बे माणहु नी राजी सी बोली पक्‌की हय जाय, ता नी कोय तीने टाळे अने नी कोय तीनी मे कंय बड़ावे। अने वायदा अब्‌राहम ने अने तीनी अवल्‌यात ने आपलो से। तीहयो आहयु नी केदु के आखा जुगु; पण तीनी अवल्‌यात मे गेथा एकीत जणा जुगु वायदो करलो से; अने तीहयी अवल्‌यात मसी से। पण मे आहयु केम, जे बोली भगवान अब्‌राहम ह़ाते पेले सी पाकी करलो हतो, तीने कायदा च्‌यार ह़ो तीस साल बाद आय्‌न नी टाळ सके। 3काहाके कदी भगवान नो दान कायदा सी जड़्‌यो, ता वायदा सी नी, पण भगवाननेत अब्‌राहम ने वायदा नी लारे आप देदलो से।

कायदा नो मकसत

ता कायदा ह़ु करवा आप मेल्‌या? तीहया ते गुना ना कारण अळतेण आप मेल्‌या के तीहयी अवल्‌यात ने आवता लग रेय, जीने वायदो आपलो हतो, अने कायदा ह़रगदुत ना लारे एक वचे वाळा ना हात मे आप मेल्‌या। वचे ते बे जणान वच मे हये, पण भगवान ते एकीत से।

ता ह़ु कायदा भगवान ना वायदा ना वीरोद मे से? कदी नी! काहाके एवा कायदा आप्‌तो हतो जे जीवाय आप सके, ता ह़ाचलीन धरमीपण कायदा सी हये। पण चोखली सास्‌तर आखा ने पाप ना हक मे कर देदी, के ईसु मसी मे भरहो करवा ना लारे भरहो करवा वाळा ना लेदे दान आपवा ना वायदा पुरा हये।

पण भरहा ने आव्‌वा सी पेले कायदा ना हक मे अमारी गुवाळी हयती हती, अने तीहया भरहा ने आवते लग जे उजन्‌तु हयवा वाळु हतु, आमु तीनीत बंदण मे र्‌या। आनीन करते कायदा मसी लग पुगाड़वान लेदे अमारी मास्‌तर हयी के आमु भरहा सी धरमी ठेरे। पण जत्‌यार भरहो आयो, ता आमु हाव मास्‌तर ना हक नी र्‌या।

काहाके तमु आखा तीहया भरहा नी लारे जे ईसु मसी पोर से, भगवान ना सोरा बण जेला से। अने तमारी मे गेथा जेतरा बी मसी मे बपतीस्‌मा लेदला से तीहया मसी मे एक हय जेला से। हाव नी कोय युहदी र्‌यो अने नी युनानी, नी कोय पावोर, नी कोय अदमी नी बयर, काहाके तमु आखा मालीक ईसु मसी मे मळ जवा ना कारण तमु एक से। 4अने कदी तमु मसी ना माणहु हय, ता तमु बी अब्‌राहम नी अवल्‌यात अने वायदा ना अनसारे हकदार्‌या बी से।

Source notes (4)
  1. Cross-reference रोमीयो 4:3
  2. Cross-reference रोमीयो 4:16
  3. Cross-reference रोमीयो 4:14
  4. Cross-reference रोमीयो 4:13

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.