Paliya Bible
यहेजकेल 9
यरुसलेम ने डंड आपणु
अळतेण तीहयो मारा कांटा मे ज्योरेत आड़ीन केदो, “ह़ेर ने डंड आपवा वाळा आह़फा-आह़फाम ना हात मे हत्यार लीन मारीन्तां आवो।” ता छो अदमी धुराव भणी उपरला झापला नी वाटे माय्न आह़फा-आह़फाम ना मारवा ना हत्यार लीन आया, अने तीमनी वच मे सुती ना लुगड़ा पेरीन, केड़ मे लीखवा नी संय नी डब्बी बांदीन एक अळी अदमी हतो; अने तीहया आखा घोर मे जाय्न पीतळ नी वेदीन्तां जाय्न उबा हया।
ता ईस्रायल ना भगवान नो ह़ेक करुबु पोर गेथो, जीमनी पोर तीहयो रीया करतो हतो, घोर ना मांडवा पोर उठ आवलो हतो; अने तीहयो तीहया सुती ना लुगड़ा पेरला अदमी ने जे केड़ मे संय नी डब्बी बांदीन हतो, आड़्यो। अने यहोवा तीने केदो, “आहया यरुसलेम ह़ेर नी मोय एथोन-एथो जाय्न जेतरा माणहु तीहया आखा ह़ीगी आवे एवा कामु ना कारण सी जे तीनी मे करे, कपले अने दुख नी मारे आड़े, तीमना मुंडा पोर सेलाणी लगाड़ दे।”1
ता तीहयो मारी ह़मळते बीजाम ने केदो, “ह़ेर मे तीमनी पसळ-पसळ चालीन मारता जावो; कोय पोर बी दया नी करजो अने नी भोळाय सी काम करजो। डायला, जुवान्या, कुवारी सोरी, बाळ-बच्चा, बयरा, आखा ने मारीन खत्तम करो, पण जे कोय माणेह ना मुंडा पोर तीहयी सेलाणी हय, तीनी ह़ाते नी जजो। मारा चोखला जागान्तां गेथात सुरु करो।” अने तीहया ते डायलाम ने तां गेथा सुरु कर्या जे मालीक ना घोर नी अगळ हता।
अळतेण तीहयो तीमने केदो, “घोर ने वीटाळ देवो, अने आंगणु ने धोड़ सी भर देवो। चालो, बाहर नीकळो।” ता तीहया नीकळीन ह़ेर मे मारवा बाज ज्या।
जत्यार तीहया मारवा बाज र्या हता, अने में एखलो री ज्यो, ता में मोडा ना भरहे पड़्यो अने आड़ीन केदो, “गरा आय पड़े यहोवा! ह़ु तु तारी रीह यरुसलेम पोर नीकाळीन ईस्रायल ना आखा बचला ने बी खत्तम करही?”
ता तीहयो मने केदो, “ईस्रायल अने यहुदा ना घोराणा नो अधरम घणो जादा से, आञे तक के देस मोत सी अने ह़ेर गलत काम सी भराय जेलु से; काहाके तीहया केय, ‘यहोवा धरती ने छोड़ देदलो से, अने यहोवा कंय बी नी देखतो।’ करीन तीमनी पोर दया नी हये, अने नी में भोळाय करु, अने तीहया जेम बीजा ह़ाते कर्या तेमेत तीमनी ह़ाते बी करही।”
ता में ह़ु देख्यो, के जे अदमी सुती ना लुगड़ा पेरीन अने केड़ मे संय नी डब्बी बांदलो हतो, तीहयो आहयु कीन खबर आप्यो, “जेम तु हुकम आपलो, में तेमेत करलो से।”
Source notes (1)
- Cross-reference परकासीतवाक्य 7:3; 9:4; 14:1
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.