Paliya Bible
यहेजकेल 10
भगवान नो वीजाळु मंदीर मे गेथु नीकळे
आनीन अळतेण मे देख्यो के करुब ना मुंडा पोर जे तारा मंडळी हती, तीनी मे नीलमणी नाम ना मोगला दगड़ान तेवु देखाव पड़्यु।1 ता यहोवा तीहया सुती ना लुगड़ा पेरला अदमी ने केदो, “फीरवा वाळा चाकटा नी वचे करुबुन हेटो जा अने तारा बेम मुठ ने करुबु नी वच मे ना ईंगाळा वेर भरीन ह़ेर पोर नाख दे।”
अने तीहयो मारी देखणते तीमनी वच मे ज्यो। जत्यार तीहयो अदमी मोय ज्यो, ता तीहया करुबु मालीक ना घोर नी जमणी ह़ोड़ उबा हय र्या हता; अने वादळु मोय वाळु आंगणु मे भरलु हतु। ता यहोवा नु वीजाळु करुबु नी उपर गेथु उठीन घोर ना अगळ ना ओट्ला पोर आय लाग्यु; अने वादळु घोर मे भराय ज्यु; अने तीहयु आंगणु यहोवा नु वीजाळु नु उजड़ सी भराय ज्यु। करुबु ना पाखड़ा नी अवाज बारला आंगणा मे तक ह़मळायती हती, तीहयी आखा मे जोर भर्या भगवान बोले तीनीन तेवो सब्द हतो।
जत्यार तीहयो सुती ना लुगड़ा पेरला अदमी ने फीरवा वाळा चाकटा नी मोय करुबु नी वच मे गेथा ईंगाळा लेवा नो हुकम आप्यो, ता तीहयो तीमनी वच मे जाय्न एक चाकटुन्तां उबो हयो। ता करुबु नी वच मे गेथु एक करुब आह़फा नो हात नाम्बो करीन, तीहयु आक्ठु मे गेथु जे करुबु नी वच मे हतु, थोड़ाक चुटीन सुती ना लुगड़ा पेरला अदमी नी मुठ मे आप देदो; अने तीहयो तीने लीन बारो जत र्यो।
करुबु ना पाखड़ान हेटु ते माणहुन हात ने तेवु कंय देखाव पड़तु हतु। ता में देख्यो, करुबुन्तां च्यार चाकटा से; मतलब एक-एक करुबुन्तां एक-एक चाकटु से, अने चाकटा फीरोजा नाम ना पपलन्या मोगला दगड़ान तेवा से। तीमनो आवो रुप से, के च्यारोव एक ह़रका देखाव पड़े, जेम एक चाकटु नी वच मे एक चाकटु हय। जत्यार तीहया चालता हता ता च्यारो-मेर तीहया वळ्या वगरेत चाल सकता हता। पण अगळ नु चाकटु जींखरली ह़ोड़ चालतु हतु, बचला चाकटा बी तीनी पसळ-पसळ जता हता, अने चालती टेमे तीहया वळता नी हता। वाहां मे, हात मे, पाखड़ा मे अने आखा डीले अने जे चाकटा करुबु ना हता, तीमनी च्यारो-मेर डोळात-डोळा हता।2 मारी ह़मळते आहया चाकटा ने चक्कर करीन केदो। मतलब फीरवा वाळा चाकटा।3
एक-एक ना च्यार-च्यार मोडा हता; एक मोडु ते करुब ने तेवु, बीजु माणेह ने तेवु, तीसरु नाहर ने तेवु, अने चोवथु घुवड़ चड़ुन तेवु।4 करुब धरती पोर गेथा उपर उठ ज्या। आहया तीहयात जीव से; जे में कबार नंदीन्तां देखलो हतो। जत्यार-जत्यार तीहया करुब चालता हता तत्यार-तत्यार तीहया चाकटा तीमनी ह़ाते-ह़ाते चालता हता; अने जत्यार-जत्यार करुब धरती पोर गेथा उपर उडवा करीन आह़फाम ना पाखड़ा उचा करता हता तत्यार-तत्यार चाकटा तीमनीन्तां गेथा सेटा नी हयता हता। जत्यार तीहया उबा हयता हता ता चाकटा बी उबा हयता हता; अने जत्यार तीहया उपर उठता हता ता चाकटा बी तीमनी ह़ाते उपर उठता हता; काहाके तीहया जीव नी आत्मा तीहया चाकटा मे हती।
यहोवा भगवान नु वीजाळु घोर ना ओट्ला पोर गेथु करुबु नी उपर जाय्न उबु री ज्यु। ता करुब आह़फाम ना पाखड़ा चवड़ा करीन मारी देखणते धरती पोर गेथा उपर उठ्या अने जत र्या; अने चाकटा बी तीमनी ह़ाते-ह़ाते जत र्या, अने तीहया आखा यहोवा ना घोर नी उगवणी धेड़ ना फाटे उबा हय ज्या; अने ईस्रायल ना भगवान नु वीजाळु तीमनी पोर उबु र्यु। आहया तीहयात जीवु से जे में कबार नंदीन्तां ईस्रायल ना भगवान नी तळे देखलो हतो, अने में जाण लेदो के तीहया बी करुब से।
आखा ना च्यारोव मोडा अने च्यारोव पाखड़ा तळे माणहु ना हात ने तेवा हात बी हता। तीमना मोडा नो रुप तेवोत हतो जे में कबार नंदी ना काठे देखलो हतो। तीमनु मोडु नी पण तीमनु डील बी तेवुत हतु। तीहया ह़ुदा आह़फा-आह़फाम नी अगळेत चालता हता।
Source notes (4)
- Cross-reference यहेजकेल 1:26; परकासीतवाक्य 4:2
- Cross-reference परकासीतवाक्य 4:8
- Cross-reference यहेजकेल 1:15-21
- Cross-reference यहेजकेल 1:10; परकासीतवाक्य 4:7
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.