Paliya Bible
यहेजकेल 11
यरुसलेम नो वाक
ता भगवान नी आत्मा मने उपर उचलीन यहोवा ना घोर ना उगवणी ह़ोड़ ना फाटान्तां जीनु मोडु उगवणी ह़ोड़ भणीन से, पुगाड़ देदो; अने तां में ह़ु देख्यो, के मोय भरायवा ना फाटेत पच्चीह अदमी से। में तीमनी वच मे अज्जुर ना सोरा याजन्याह ने अने बनायाह ना सोरा पलत्याह ने देख्यो, जे माणहु ना मुख्या हता।
ता भगवान मने केदो, “ए माणेह नी अवल्यात, जे माणेह आहया ह़ेर मे गलत सोच अने बुरी ह़ला आपे तीहया आहयात से। आहया केय, ‘घोर बणाव्वा नी टेम ह़ाते नी हय, आहयु ह़ेर हांडलु अने आमु तीनी मे नु मांह से।’ करीन ए माणेह नी अवल्यात, आमना वीरोद मे भगवान वगे गेथी वात के, भगवान वगे गेथी वात।”
ता यहोवा नी आत्मा मारी पोर उतरी, अने मने केदी, “आसम के, यहोवा आसम केय: ए ईस्रायल ना घोराणा, तमु आसमेत केदला से; जे कंय तमारा मन मे आवे, तीने में जाणु। तमु ते घणा ने आहया ह़ेर मे मार नाख्या अने आनी ह़ड़क ने धोड़ सी भर देदा।
“करीन मालीक यहोवा आसम केय: जे माणहु तमु आनी मे मार नाखला से, तीमना धोड़ेत आहया ह़ेर ह़रका हांडला मे नु मांह से; अने तमु ने आनी मे गेथा नीकाळ देहे। तमु तलवार सी बीहो, अने में तमने तलवार वेरेत मारही, मालीक यहोवा आसमेत केय। में तमने आनी मे गेथा नीकाळीन बीजा देस वाळा ना हात मे ह़ोप देही, अने तमने डंड अपाड़ही। तमु तलवार सी मरीन पड़हु, में तमने ईस्रायल देस नी काकड़ पोर डंड आपही, ता तमु जाण लेहु के में यहोवा से। आहयु ह़ेर तमारी जुगु हान्लु नी बणे, अने नी तमु आनी मे नु मांह बणहु; में तमने ईस्रायल देस नी काकड़ पोर डंड आपही। ता तमु जाण लेहु के में यहोवा से; तमु ते मारी रीती पोर नी चाल्या, अने मारा नेमु ने तमु नी मान्या; पण आह़फाम नी च्यारो-मेर ना राज्य नी रीती पोर चालला से।”
में आहयी भाती नी भगवान वगे गेथी वात केवा बाज र्यो हतो के बनायाह नो सोरो पलत्याह मर ज्यो। ता में मोडा ना भरहे पड़ीन ज्योरेत आड़ी पड़्यो, अने केदो, “गरा आय पड़े मालीक यहोवा, ह़ु तु ईस्रायल ना बचला ने खत्तम कर देही?”
गुलामी मे ना माणहु ह़ाते भगवान नो वायदो
ता यहोवा नो आहयो बोल मारीन्तां पुग्यो, “ए माणेह नी अवल्यात,” यरुसलेम ना रेवा वाळा तारा ह़ाते वाळा भायु ने अने ईस्रायल ना आखा घोराणा ने बी केदला से के, तमु यहोवान्तां गेथा सेटा हय जावो, आहयु देस अमारात हक मे आपलु से।
“पण तु ईमने के, ‘मालीक यहोवा आसम केय: में तमने नाम्बे-नाम्बे ना राज्य मे वहाड़्यो अने देस-देस मे रीवण्या-तीवण्या कर देदलो से ईमनी मे गेथा तमने एक्ठा करही, अने तमने ईस्रायल नो जागो आपही।’
“करीन तीमने के, ‘मालीक यहोवा आसम केय: में तमने राज्य-राज्य ना माणहु नी वच मे गेथा भेळा करही, अने जे देस मे तमने रीवण्या-तीवण्या करला से, तीमनी मे गेथा तमने एकठा करही, अने तमने ईस्रायल नो जागो आपही।’ तीहया तां पुगीन तीहया देस नी आखी ह़ीगी आवे एवा मुरत्या अने आखा ह़ीगी आवे एवा काम बी तीहया देस मे गेथा सेटा करहे। में तीमनु मन एक कर देही, अने तीमनी मे नवली आत्मा पयदा करही, अने तीमना डील मे दगड़ा ह़रकु दील नीकाळीन तीमने माह नु दील आपही,1 जीनी सी तीहया मारी रीती पोर हमेसा चाल्या करे अने मारा नेमु ने मान्या करे; अने तीहया मारा माणहु ठेरहे, अने में तीमनो भगवान ठेरही। पण तीहया माणहु जे आह़फाम ना ह़ीगी आवे एवा मुरत्या अने ह़ीगी आवे एवा काम मे मन लगाड़ीन चालता रेहे, तीमने में आसम करही के तीमना गलत कामु नो फोळ तीमनात मुंडा पोर नाखही। मालीक यहोवा आसमेत केय।”
भगवान नु वीजाळु यरुसलेम मे गेथु नीकळे
करुब आह़फाम ना पाखड़ा उचा कर्या, अने चाकटा तीमनी ह़ाते-ह़ाते चाल्या, अने ईस्रायल ना भगवान नु वीजाळु तीमनी उपर हतु। ता यहोवा नु वीजाळु ह़ेर नी वच मे गेथु नीकळीन तीहया बड़ा पोर जाय्न उबु री ज्यु जे ह़ेर गेथो उगवणो से। अळतेण आत्मा मने उचली, अने भगवान नी आत्मा नी सक्ती सी दरसन मे कसदी देस मे गुलामी मे वाळान्तां पुगाड़ देदी। जे दरसन मे देखलो हतो तीहयु उलुप हय ज्यु। ता जेतरी वात यहोवा मने देखाड़लो हतो, तीहयी में गुलामी मे वाळा ने देखाड़ देदो।
Source notes (1)
- Cross-reference यहेजकेल 36:20-28
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.