Skip to content
BibleKenya

Paliya Bible

यहेजकेल 12

भगवान वगे गेथी वात केवा वाळा, नु गुलामी मे जवान सेलाणी

अळतेण यहोवा नो आहयो बोल मारीन्‌तां पुग्‌यो, “ए माणेह नी अवल्‌यात, तु बकबक करवा वाळा घोराणा नी वच मे रेय, जीमना देखवा नी करते डोळा ते से, पण नी देखता, अने ह़मळवा करीन कान्‌टा ते से पण नी ह़मळता; काहाके तीहया बकबक करवा वाळा घोराणा ना से।1

“करीन ए माणेह नी अवल्‌यात, दीहु गुलामी मे जवा नु ह़मान तीयार करीन तीमनी देखणते उठ जजो, अने तीमनी देखणते तमारा जागे गेथा बीजा जागे जत रेजो। तीहया बकबक करवा वाळा घोराणा ना से, ते बी पक्‌का तीहया धीयान देय। करीन तु दीहु तीमनी देखणते गुलामी मे जवा वाळा नु ह़मान ने तेम तारु ह़मान नीकाळजे, अने तु ह़ांतो गुलामी मे जवा वाळान तेम तीमनी देखणते उठ जजे। तीमनी देखणते तारा घोर नु भीतड़ु फोड़जे तीनी मेत तारु ह़मान नीकाळजे। तीमनी देखणते ह़मान ने तारा खांदा पोर उचलीन अंदारलु मे नीकळजे, अने तारु मोडु ढाकीन राखजे के तने धरती नी देखाव पड़े; काहाके में तने ईस्‌रायल ना घोराणा जुगु एक सेलाणी ठेरावलो से।”

तीहया हुकम नी अनसारे मे तेमेत कर्‌यो। दीहु में मारु ह़मान गुलामी नु ह़मान ने तेम नीकाळ्‌यो, अने ह़ांतो मारा हात सी भीतड़ु ने फोड़्‌यो; अळतेण अंदारलु मे ह़मान ने नीकाळीन, तीमनी देखणते मारा खांदा पोर उचलीन जत र्‌यो।

ह़वारे यहोवा नो आहयो बोल मारीन्‌तां पुग्‌यो, “ए माणेह नी अवल्‌यात,” ह़ु ईस्‌रायल नु घोराणु मतलब तीहया बकबक करवा वाळा नु घोराणु तने आहयु नी पुछ्‌यु, आहयु तु ह़ु करे? तु तीमने के, मालीक यहोवा आसम केय: आहयो जोर-भर्‌यो बोल यरुसलेम ना मुख्‌या अदमी अने ईस्‌रायल नु आखु घोराणु ना बारा मे से जीमना वच मे तीहया रेय। तु तीमने के, में तमारी जुगु सेलाणी से; जेम में करलो से, तेमेत ईस्‌रायली माणहु ह़ाते करहे; तीमने उठीन गुलामी मे जवा पड़हे। तीमनी वचमे जे मुख्‌यो से, तीहयो अंदारला मे आह़फा ना खांदा पोर भार उचलीन नीकळहे; तीहयो आह़फा नु ह़मान नीकाळवा करीन भीतड़ु ने फोड़हे, अने आह़फा नु मोडु ढाकीन राखहे के तीने धरती नी देखाव पड़वा जोवे। में तीनी पोर मारी जाळ नाखही, अने तीहयो मारी जाळ मे फसहे; अने में तीने कसदीम ना देस मे बेबीलोन ह़ेर मे पुगाड़ देही; तीहयो तीहया ह़ेर मे मरी जहे ते बी तीहयु ह़ेर ने देखी नी सके।2 जेतरा तीना मदत करन्‌या तीनी आड़े-धेड़े रेहे, तीमने अने तीमना आखा टोळा ने मे च्‌यारो-मेर रीवण्‌या-तीवण्‌या कर देही; अने तलवार हापकीन तीमनी पसळ मोकलही।

“जत्‌यार में तीमने राज्‌य-राज्‌य मे रीवण्‌या-तीवण्‌या कर देही, अने देस-देस मे खोळवी देही, ता तीहया जाण लेहे के में यहोवा से। पण में तीमनी मे गेथा थोड़ाक माणहु ने तलवार, काळ अने गरा सी बचाड़ीन राखही; अने तीहया आह़फाम ना ह़ीगी आवे एवा काम नी तीहया राज्‌य मे वात करहे जीनी वचमे तीहया पुगहे; ता तीहया जाण लेहे के में यहोवा से।”

कापत्‌ला भगवान वगे गेथी वात केवा वाळा नी सेलाणी

ता यहोवा नो आहयो बोल मारीन्‌तां पुग्‌यो, “ए माणेह नी अवल्‌यात,” “कापतो जीन तारो रोट्‌लो खाजे अने थतरतो जीन अने चीन्‌ता करतो जीन तारु पाणी पीजे; अने आहया देस ना माणहु ने केजे, के मालीक यहोवा यरुसलेम अने ईस्‌रायल ना देस ना रेवा वाळा ना बारा मे आसम केय: तीहया तीमनो रोट्‌लो चीन्‌ता करता जीन खाहे, अने तीमनु पाणी बीहता जीन पीहे; काहाके देस तीना आखा रेवा वाळा ना गलत कामु ना कारण ठारलु हय जहे। वहला ह़ेर उजड़ जहे, अने देस बी उजाड़ हय जहे, ता तमु जाण लेहु के में यहोवा से।”

खत्‌तम हयणु ह़ाते से

अळतेण यहोवा नो आहयो बोल मारीन्‌तां पुग्‌यो, “ए माणेह नी अवल्‌यात, आहयी ह़ु कहावत से जे तमु ईस्‌रायल देस मे कीया करो, ‘दाड़ा जादा हय जेला से, अने दरसन नी कानी वात पुरी नी हयी?’ करीन तीमने के, ‘मालीक यहोवा आसम केय: में आहयी कहावत ने बंद करही; अने आहयी कहावत ने ईस्‌रायल में अळी नी करे।’ तु तीमने के, के तीहयो दाड़ो ह़ाते आय जेलो से, अने दरसन नी आखी वात पुरी हयवा वाळी से।

“काहाके ईस्‌रायल ना घोराणा मे नी ते अळी झुटा दरसन नी कानी वात अने नी कानी फसाड़वा वाळी वात अळी केय। काहाके में यहोवा से, जत्‌यार में बोलु, ता में जे बोल केम, तीहयो पुरो हय जहे। तीनी मे वार नी लागे, पण ए बक-बक करवा वाळा घोराणा, तमारात दाड़ा मे में बोल कीही, अने तीहयो पुरो हय जहे, मालीक यहोवा आसम केय।”

अळतेण यहोवा नो आहयो बोल मारीन्‌तां पुग्‌यो, “ए माणेह नी अवल्‌यात, देख, ईस्‌रायल ना घोराणा ना माणहु आहयु की र्‌या, ‘जे दरसन तीहयो देखे, तीहयु घणा दाड़ा मे पुरु हयवा वाळु से; अने तीहयो नाम्‌बे नी टेम ना बारा मे भगवान वगे गेथी वात केय।’ करीन तु तीमने के, मालीक यहोवा आसम केय, मारा काना बी बोल ने पुरो हयवा मे अळी टेम नी लागे, पण जे बोल में केम तीहयो पक्‌को पुरो हयहे, मालीक यहोवा आसमेत केय।”

Source notes (2)
  1. Cross-reference यसाया 6:9-10; यीरम्‌या 5:21; मरकुस 8:18
  2. Cross-reference 2 राजा 25:7; यीरम्‌या 52:11

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.