Skip to content
BibleKenya

Paliya Bible

यहेजकेल 8

भगवान ना बारा मे यहेजकेल नो बीजो दरसन

(8:1–10:22)

यरुसलेम मे मुरती पुजा

अळतेण छटवा साल ना छटवा मयना ना पांचवा दाड़े जत्‌यार में मारा घोर बह रेलो, अने यहुदीम ना डायला माणहु मारी अगळ बहला हता, ता मालीक यहोवा नी सक्‌ती तांत मारी पोर उजन्‌ती हयी। ता में देख्‌यो के आक्‌ठुन तेवो एक रुप देखाव पड़े; तीना केड़्‌या गेथु हेटु आक्‌ठु से, अने तीना केड़्‌ये गेथु उपर चमकाड़लु पीतळ नी चमक ने तेवु कंय से। तीहयो हात ने तेवु कंय नाम्‌बु करीन मारा मुंडे ना नीम्‌बाळा धर्‌यो; ता आत्‌मा मने धरती अने वादळा नी वच मे उचलीन भगवान ना देखाड़ला दरसन मे यरुसलेम ना मंदीर नी मोय, आंगणु ना तीहया झापले पुगाड़ देदो जीनु मोडु धुराव भणी से; अने जीनी मे तीहयी रीह पयदा करवा वाळी मुर्‌ती नो जागो हतो जीना कारण सी वीरोद पयदा हये।1

अळतेण तां ईस्‌रायल ना भगवान नु वीजाळु तेवुत हतु जेवु में कबार नंदी ना काठे देखलो हतो। तीहयो मने केदो, “ए माणेह नी अवल्‌यात, तारा डोळा धुराव भणी उचा करीन देख।” अने में मारा डोळा धुराव भणी उचा करीन देख्‌यो के वेदी नु झापलु नी धुराव भणी मोय भरायवा ना जागेत तीहयी रीह पयदा करवा वाळी मुर्‌ती से।

ता तीहयो मने केदो, “ए माणेह नी अवल्‌यात, ह़ु तु देखे के आहया माणहु ह़ु करवा बाज र्‌या? ईस्‌रायल नु घोराणु ह़ु ह़ीगी आवे एवु आञे काम कर र्‌यु, आनी करते के में मारा चोखला जागा मे गेथो सेटो हय जाम; पण तु आनी सी बी जादा ह़ीगी आवे एवा काम देखही।”

ता तीहयो मने आंगणु ना झापले ली ज्‌यो, अने में देख्‌यो, के भीतड़ु मे एक डुचो से। ता तीहयो मने केदो, “ए माणेह नी अवल्‌यात, भीतड़ु ने फोड़” करीन में भीतड़ु ने फोड़ीन ह़ु देख्‌यो के एक झापलु से। तीहयो मने केदो, “मोय जाय्‌न देख के आहया माणहु आञे केवा-केवा अने घणा ह़ीगी आवे एवा काम कर र्‌या।” अने में मोय जाय्‌न देख्‌यो के च्‌यारो-मेर नु भीतड़ु पोर भाती-भाती ना घीहाय्‌न चालवा वाळा जन्‌तु अने ह़ीगी आवे जानवर अने ईस्‌रायल ना घोराणा ना आखा मुरत्‌या ना चीत्‌रा बणावला हता। ईस्‌रायल ना घोराणा ना डायला माणहु मे गेथा सत्‌तर अदमी जीमनी वच मे सापान नो सोरो याजन्‌याह बी से। तीहया आहया चीत्‌रा नी अगळ उबा हय र्‌या, अने एक-एक अदमी आह़फा-आह़फाम ना हात मे धुप-अगरबत्‌ती लेदला से, अने धुप-अगरबत्‌ती नो धुकरो उपर उड र्‌यो। ता तीहयो मने केदो, “ए माणेह नी अवल्‌यात, ह़ु तु देखलो से के ईस्‌रायल ना घोराणा ना डायला माणहु आह़फा-आह़फाम ना हात वेर बणावला फुटक्‌या सी भरला खोल्‌या नी मोय मतलब अंदारलु मे ह़ु करवा बाज र्‌या? तीहया केय के यहोवा आमने नी देखतो; यहोवा देस ने छोड़ देदलो से।”

अळतेण तीहयो मने केदो, “तु आमनी सी अळी बी जादा ह़ीगी आवे एवा काम देखही जे तीहया करे।” ता तीहयो मने यहोवा ना घोर ना तीहया फाटा ना झापलान्‌तां लीज्‌यो जे धुराव भणी हतु अने तां बयरा बहीन तम्‌मुज नाम ना देवता जुगु रड़वा बाज री हती।

ता तीहयो मने केदो, “ए माणेह नी अवल्‌यात, ह़ु तु आहयु देखलो से? अळतेण आमनी सी बी जादा ह़ीगी आवे एवा काम तु देखही।” ता तीहयो मने यहोवा ना मोय ना घोर ना मोय ना आंगणा मे ली ज्‌यो; अने तां यहोवा ना घोर ना झापलान्‌तां मांडवा अने वेदी नी वच मे पच्‌चीहेक अदमी आह़फाम ना वाहां यहोवा ना घोर भणीन करीन अने आह़फाम ना मोडा उगवणी ह़ोड़ करला हता; अने तीहया उगवणी ह़ोड़ दाहड़ु ने वांदवा बाज र्‌या हता।

ता तीहयो मने केदो, “ए माणेह नी अवल्‌यात, ह़ु तु आहयु देख्‌यो? ह़ु यहुदा ना घोराणा जुगु ह़ीगी आवे एवा कामु नु करनु जे तीहया आञे करे नानी वात से? तीहया आह़फाम नु देस ने झगड़ा सी भर देदा, अने अळतेण आञे आवीन मने रीह लगाड़े। अने मानो तीहया मोडु चड़ाय्‌न मारो वाक काडे। करीन में बी रीह भेळ काम करही, नी में दया करु अने नी में भोळाय करु, भले तीहया मारा कांटा मे ज्‌योरे आड़े, ते बी में तीमनी वात नी ह़मळु।”

Source notes (1)
  1. Cross-reference यहेजकेल 1:28

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.