Paliya Bible
यहेजकेल 7
ईस्रायल नो डंड ह़ाते से
अळतेण यहोवा नो आहयो बोल मारीन्तां पुग्यो, “ए माणेह नी अवल्यात,” मालीक यहोवा ईस्रायल नी धरती ना बारा मे आसम केय: खत्तम हयु; च्यारोव खुणा भेळ देस खत्तम हयणु आय जेलु से।
“ए ईस्रायल, तारु खत्तम हयणु बी आय जेलु से, अने में मारी रीह तारी पोर नीकाळीन तारी चाल-चलण नी अनसारे तने डंड आपही; अने तारा आखा ह़ीगी आवे एवा काम नो फोळ में तने आपही। मारी भलाय नी नींगा तारी पोर नी रेय, अने नी में भोळाय करु, अने जत्यार तक तारा ह़ीगी आवे एवा पाप तारी मे बणीन रेहे तांह तक में तारी चाल-चलण नो फोळ तने आपही। ता तु जाण लेही के में यहोवा से।”
मालीक यहोवा आसम केय: “गरा से, एक मोट्ली गरा से! देखो तीहयी आवे। खत्तम हयणु आय जेलु से, आखा नु खत्तम हयणु आय जेलु से; तीहयो तारा वीरोद मे जागलो से। देखो तीहयो आवे। ए ईस्रायल देस ना रेवा वाळा! तमारी खत्तम हयवा नी टेम आय लागी। तमारी जुगु मोत नी चक्री फीरी जेली से, खत्तम हयवा नो दाड़ो ह़ाते आय लागलो से; तीहयो बड़ा पोर खुसी ना सब्द नो नी, पण एथान-एथा दवड़वा नो दाड़ो रेहे।
“हाव थोड़ाक दाड़ा मे, में मारी रीह तारी पोर नीकाळही, अने तारी पोर आखी खीज नीकाळही अने तारा चाल-चलण नी अनसारे तने डंड आपही। ता आखा ह़ीगी आवे एवा काम नो फोळ में तने भुकताड़ही। मारी भलाय नी नींगा तारी पोर नी रेय अने नी में तारी पोर भोळाय करु। में तने तारी चाल-चलण नो फोळ भुगताड़ही, अने तारा ह़ीगी आवे एवा पाप तारी मे बणीन रेहे। ता तमु जाण लेहु के में यहोवा डंड आपवा वाळो से।”
देखो, तीहया दाड़ा ने देखो, तीहयो आवे! चक्री फीर जेली से, अने वेला पाड़वा नी घड़ी बड़ जेली से, अने तारो घमंड बड़ जेलो से। कोहराय बड़ती-बड़ती बुराय नो डंड बण जेली से; तीमनी मे गेथु कोय बी नी वचे, अने नी तीमनी भीड़-भाड़, अने नी तीमना धन मे गेथु कंय रेय; अने नी तीमनी मे गेथा कोय जुगु कलपवु ह़मळाये।
टेम आय जेली से, दाड़ो ह़ातेत आय जेलो से; नी ते वेचातु लेवा वाळो खुसी मनावे अने नी वेचवा वाळो दुखी हये, काहाके तीमनी आखी भीड़ पोर मालीक नी रीह आय पड़हे। भले तीहया जीवत्ला रेय, ते बी वेचवा वाळो वेचली चीज ने तां कारु बी पासो नी जाय सके; काहाके केदली आहयी आखी वात देस नी आखी भीड़ पोर पुरी हयहे, कोय बी पासु नी आवे; कोय बी माणेह जे अधरम मे जीवत्लु रेय, तीहयो खुद ने ह़माळ नी सके। तीहया फेपार्या वगाड़्या अने आखु कंय तीयार कर देदा; पण झुमायवा कोय बी नी जतु काहाके देस नी आखी भीड़ पोर मारी रीह आय पड़ली से।
ईस्रायल ना पापु नो डंड
“बाहर तलवार अने मोय काळ अने गरा से; जे मेदान मे हय तीहयु तलवार सी मरहे, अने जे ह़ेर मे हय तीहयु भुक अने काळ सी मरहे। तीमनी मे गेथा जे बच नीकळहे तीहया बची ते जहे पण आह़फा-आह़फाम ना अधरम मे फसीन रीन घाटी मे रेवा वाळा पारवान तेम बड़ा पोर कलपता रेहे। आखा ना हात ढीला अने आखा ना घोटणा कमजोर हय जहे। तीहया केड़ मे गोंटा ना लुगड़ा पेरहे, अने तीहया माणहु कापवा बाज जहे, अने आखा ना मोडा ह़ुक जहे अने आखा ना मुंडा ने बोड़ देहे। तीहया आह़फाम नु चांदी ह़ड़क पोर नाख देहे, अने तीमनु ह़ोनु वीटळ्ळु चीज ठेरहे; यहोवा नी रीह ना दाड़े तीमनु ह़ोनु-चांदी तीमने बचाड़ी नी सके, अने नी तीनी सी तीमनो जीव खुस हये, अने नी तीमना पेट भराय। काहाके तीहयु तीमना अधरम ना ठोकर नो कारण बणलु से। तीमनु देस जे घटाळ्ळु अने वजन वेर ह़ींगारलु हतु, तीना वारा मे तीहया वारुत-वारु कीन तीनी मे ह़ीगी आवे एवी चीज ना मुरत्या, अने ह़ीगी आवे एवा चीज बणाय्न राख र्या, करीन में तीने तीमनी जुगु वीटळ्ळा चीज ठेरावलो से।
“में तीने लुटवा करीन बीजा देस वाळा ना हात मे, अने धन लुटवा करीन धरती ना वेरी माणहु ना हात मे कर देही, अने तीहया तीने वीटाळ देहे। में तीमनी भणी गेथो मोडु फीरवी लेही, ता तीहया मारा वारला जागा ने वीटाळ देहे; डाकु तीनी मे भराय्न तीने वीटाळहे।
“एक ह़ाकळ बणाय दे, काहाके देस वेला नी मोत सी, अने ह़ेर गलत कामु सी भरायलु से। मे राज्य-राज्य ना बुरा सी बुरा माणहु ने लावही, जे तीमना घोरु ना मालीक बण जहे; अने में हीम्मत वाळान हीम्मत तोड़ देही अने तीमना चोखला जागा वीटाळ देहे। दुख-वेला आव्वा पोर तीहया सांती ने ह़ोदहे, पण तीमने सांती नी जड़े। गरा पोर गरा आवहे अने आनी वात पोर वात ह़मळायहे; अने माणहु भगवान वगे गेथी वात केवा वाळा ने दरसन नी वात पुछहे, पण पुंजारा पांह गेथो नेम, अने डायला माणहु पांह गेथी ह़ला आपवा नी सक्ती जत रेहे। राजा ते दुखी हयहे, अने पोमत्ला ह़ोह़ मे पड़ रेहे, अने देस ना माणहु ना हात ढीला पड़हे। में तीमनी चाल-चलण नी अनसारे तीमनी ह़ाते वेहवार करही, अने तीमनी कमाय ने तेम तीमने डंड आपही; ता तीहया जाण लेहे के में यहोवा से।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.