Skip to content
BibleKenya

Paliya Bible

यहेजकेल 6

भगवान नी लारे मुर्‌ती पुजान वाक काडणु

अळतेण यहोवा नो आहयो बोल मारीन्‌तां पुग्‌यो: “ए माणेह नी अवल्‌यात, आह़फा नु मोडु ईस्‌रायल ना बड़ा भणीन करीन तीमना वीरोद मे भगवान वगे गेथी वात के, अने के, ए ईस्‌रायल ना बड़ा, मालीक यहोवा नो बोल ह़मळो! मालीक यहोवा बड़ा अने बड़ी सी, अने कोतड़ा अने घाट्‌या ने आसम केय: देखो में तमारी पोर तलवार चलाड़ही, अने तमारा पुजा ना उचा जागा ने खत्‌तम करही। तमारी वेद्‌या उजड़हे अने तमारा दाहड़ु ना मुरत्‌या तोड़ देहे; अने में तमारी मे गेथा मारला ने तमारा मुरत्‌या अगळ नाख देही। में ईस्‌रायली माणहु ना धोड़ ने तीमना मुरत्‌या अगळ मेकही, अने तीमना हाटका ने तमारा वेद्‌या नी आड़े-धेड़े खोळवी देही। तमारा जेतरा वहाड़ला ह़ेर से, तीहया आखा आसम उजड़ जहे, के तमारा पुजा नी उची जागा बी उजड़ जहे, तमारा वेद्‌या उजड़ी जहे अने ओदार देहे, तमारा मुरत्‌या तोड़ देहे अने तमारा दाड़ु ना मुरत्‌या टुकड़ा-टुकड़ा कर देहे; अने तमारी आखी कारीगरी मीटाड़ देहे। तमारी वच मे धोड़ ना ढेर रेहे, अने तमु जाण लेहु के में यहोवा से।

“ते बी में थोड़ाक ने बचाड़ीन राखही। एतरे जत्‌यार तमु देस-देस मे तीतर-बीतर हयहु, ता राज्‌य-राज्‌य नी वच मे तमारा थोड़ाक माणहु तलवार सी बच जहे। तीहया बचला माणहु, तीहया राज्‌य नी वच मे, जीनी मे तीहया गुलामी मे रेहे, मने फोम करहे; अने आहयु बी के अमारु छीनाळ्‌यु मन यहोवा पोर गेथु केम सेटु हय जेलु से, अने छीनाळ्‌याण ने तेम अमारा डोळा मुरत्‌या पोर कीकम जाय टेक्‌या, जीनी सी यहोवा नु मन टुटलु से। आहयी रीते तीहयी बुराय ना कारण, जे तीहया आह़फाम ना आखा ह़ीगी आवे एवा काम करला से, तीहया आह़फाम नी नींगा मे ह़ीगी आवे एवा ठेरहे। ता तीहया जाण लेहे के में यहोवा से, अने तीमनु आखु नुकसान करवा करीन जे में केदलो से, तीने उदड़ेत नी केदो।”

मालीक यहोवा आसम केय: “आह़फा नो हात मड़ीन अने आह़फा नो पोग हेटो आंहटीन के, ईस्‌रायल ना घोराणा ना आखा ह़ीगी आवे एवा कामु पोर गरा आय पड़े, गरा आय पड़े, काहाके तीहया तलवार, भुक, अने गरा सी खत्‌तम हय जहे। जे सेटा हय तीहया गरा सी मरहे, अने जे ह़ाते हय तीने तलवार सी मारहे; अने जे बचीन ह़ेर मे घेरवाय जहे, तीहयो भुक सी मरहे। आहयी रीते मारी आखी रीह तीमनी पोर पुरी रीते नीकाळही। जत्‌यार एक-एक बड़ी अने बड़ा नी एक-एक चोट्‌ली पोर, अने एक-एक लील्‌ला झाड़ नी तळे, अने एक-एक झाजला वांज्‌या नाम ना झाड़ ना साहळा मे, जां-जां तीहया आह़फाम ना मुरत्‌या ने वारु घटाळ्‌ळा अने वारु गंदायण्‌या मसाला चड़ावता हता, तां तीमना मारला माणहु तीमना वेद्‌या नी आड़े-धेड़े तीमना मुरत्‌या नी वच मे पड़ी रेहे; ता तमु जाण लेहु के में यहोवा से। में मारो हात तीमना वीरोद मे नाम्‌बो करीन तीहया देस ने आखा घोरु भेळ जंगल गेथो लगाड़ीन रीबला ह़ेर तक उजाड़ेत-उजाड़ कर देही। ता तीहया जाण लेहे के में यहोवा से।”

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.