Paliya Bible
यहेजकेल 5
नीम्बाळा बोड़ीन यहेजकेल नी लारे यरुसलेम नु खत्तम हयणु देखाड़नु
“ए माणेह नी अवल्यात, एक वेताळी तलवार ले, अने तीने नावटु नी पावड़ीन तेम काम मे लीन आह़फा नी डाडी अने मुंडे ना नीम्बाळा बोड़ दे, ता तोलवा नो काटो लीन तीना तीन वाटा पाड़। जत्यार ह़ेर ना घेराबन्दी ना दाड़ा पुरा हय जाय, ता ह़ेर मे तीन वाटा ना एक वाटा ने लीन आक्ठु वेर धपाड़जे, अने बीजा वाटा लीन ह़ेर नी च्यारो-मेर तलवार वेर टुकड़ा-टुकड़ा करजे; अने तीसरा वाटा ने लीन वाहळा मे उडाड़जे, अने में तलवार हापकीन तीनी पसळ चलाड़ही। ता आमनी मे गेथा थोड़ाक नीम्बाळा लीन आह़फा ना लुगड़ा नी कोर्ये बांदजे। अळतेण आमनी मे गेथा बी थोड़ाक लीन आक्ठु नी वच मे नाखजे के तीहया धप जाय, ता तीनी मे गेथुत एक आक्ठु नीकळीन ईस्रायल ना आखा घोराणा मे फेल जहे।”
मालीक यहोवा आसम केय: यरुसलेम आसवुत से; में तीने बीजा राज्य नी वच मे वहाड़लो से, अने तीहयु च्यारो-मेर देसु सी घेरवायलु से। यरुसलेम ह़ेर मारा नेमु ना वीरोद मे काम करीन बीजा राज्य सी जादा गलत काम करलु से, अने मारी रीती ना वीरोद मे च्यारो-मेर ना देसु ना माणहु ह़ाते जादा बुराय करला से; काहाके तीहया मारा नेम ने नी मान्या, अने तीहया मारी रीती पोर नी चाल्या। करीन मालीक यहोवा आसम केय: तमु जे तमारी च्यारो-मेर ना राज्य सी जादा बकबक करला से, अने नी मारी रीती पोर चालता, अने नी मारा नेमु ने मान्ता अने तमारी च्यारो-मेर ना राज्य ना नेमु नी अनसारे बी नी कर्या, करीन मालीक यहोवा आसम केय: देख, में खुद तारा वीरोद मे से; अने बीजा राज्य नी देखणते में तारी वच मे नीयाव ना काम करही। तारा आखा गलत कामु ना कारण सी में तारी वच मे आसम करही, जेम हजु तक नी कर्यो, अने नी अगो चालीन अळी करु। ह़मळो, तारी वच मे सोरा आह़फा-आह़फाम ना बाह नु, अने बाह आह़फा-आह़फाम ना सोरा नु मांह खाहे; अने मे तने डंड आपही, अने जे माणहु बच जहे, तीमने में च्यारो-मेर खोळवी देही।
करीन मालीक यहोवा आसम केय: के मारी जीवाय नी ह़ाम, आनीन करते के तु मारा चोखला जागा ने तारा ह़ीगी आवे एवा मुरत्या अने आखा ह़ीगी आवे एवा कामु सी वीटाळला से, में तने कम करही, अने तारी पोर दया नी नींगा नी करु, अने तारी पोर कंय बी भलाय नी करु। तारी मे नो तीसरा वाटा मे गेथो एक वाटो ते गरा सी मरहे, तीहया तारी वच मे भुक सी मर मीटहे; बीजो वाटो तारी आड़े-धेड़े तलवार वेर मरहे; अने बचला तीसरा वाटा ने मे च्यारो-मेर तीतर-बीतर करही अने तलवार हापकीन तीमनी पसळ पाड़ही।
“आहयी रीते मारी रीह ठंडी पड़हे, अने मारी रीह तीमनी पोर पुरी नीकाळीन सांती हात करही; अने जत्यार में मारी रीह तीमनी पोर पुरी रीते नीकाळ लेही, ता तीहया जाण लेहे के में यहोवात रीह मे आवीन आहयु केदलो से। में तने तारी च्यारो-मेर नी जाती नी वच मे, आखा आव्वा-जवा वाळा नी देखणते उजाड़ही, अने तारो वाक कडाड़ही।
“करीन जत्यार में तने रीह, खीज अने काठी डाट भेळ डंड आपही, ता तारी च्यारो-मेर ना राज्य अगळ ह़ीगी, वाक, ठट्टा, अने नामबद्दी हयहे, काहाके में यहोवा आहयु केदलो से। आहयु तीहयी टेमे हयहे, जत्यार में तीहया माणहु ने खत्तम करवा करीन तारी पोर काळ ना बीलखा चलाड़ीन, तमारी वच मे काळ लावही, अने तमारु खाणु पीणु ने बंद करही। में तमारी वच मे काळ अने जन्तु मोकलही जे तमारा सोरा ने खाय जहे; अने गरा अने मोत तमारी वच मे चालता रेहे; अने में तमारी पोर तलवार चलाड़ही, में यहोवा आहयु केदलो से।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.