Paliya Bible
यहेजकेल 4
यरुसलेम नी घेराबन्दी ने देखाड़नु
“ए माणेह नी अवल्यात, तु एक ईटड़ु ले अने तीने तारी अगळ मेकीन तीनी पोर एक ह़ेर, मतलब यरुसलेम नु चीत्र बणाव; अळतेण तीने घेर मतलब तीना वीरोद मे एक कीलो बणाव अने तीनी अगळ कोतड़्या खोद; अने पड़ावो नाख, अने तीनी च्यारो-मेर झुमायवा ना हत्यार लगाड़। ता तु लुहड़ा नो तवो लीन तीने लुहड़ा नु भीतड़ु मानीन तारी अने तीहया ह़ेर नी वच मे उबो कर, ता तारु मोडु तीनी अगळ करीन तीनी घेराबन्दी कर, आहयी रीते तु तीने घेरवीन राखजे। आहयु ईस्रायल ना घोराणा जुगु सेलाणी ठेरहे।
“अळतेण तु डाखरी ह़ोड़ केड़ दीन ह़ुवीन ईस्रायल ना घोराणा नो अधरम आह़फा पोर मेक, काहाके जेतरा दाड़ा तु तेम केड़ दीन ह़ुय रेही, तेतरा दाड़ा तक तीहया माणहु ना अधरम नो भार वेठतो रेही। में तीमना अधरम ना साल नी बराबर तारी जुगु दाड़ा ठेरावलो से, मतलब तीन ह़ो नब्बे दाड़ा; एतरा दाड़ा तक तु ईस्रायल ना घोराणा ना अधरम नो भार वेठतो रे। जत्यार एतरा दाड़ा पुरा हय जाय, ता तु जमणी ह़ोड़ केड़ दीन ह़ुवीन यहुदा ना घोराणा ना अधरम नो भार वेठ लेजे; में तीनी जुगु बी अने तारी जुगु एक साल नी बदले एक दाड़ो मतलब चाळीह दाड़ा ठेरावलो से।
“तु यरुसलेम नी घेराबन्दी जुगु बाथ उगाड़ीन आह़फा नु मोडु तींखर करीन तीना वीरोद मे भगवान वगे गेथी वात केजे। देख, में तने दोड़ा वेर कसही, अने जत्यार तक तीना घेराबन्दी ना दाड़ा पुरा नी हये, तांह तक तु केड़ नी दी सके।
“तु गम, जुवार, वटळ्या, मसुर, बाजरी, अने जळगम, लीन एक ठाहरु मे मेकीन तीमनी वेर रोट्लो बणाया करजे। जेतरा दाड़ा तक केड़ दीन ह़ुय रेही, तेतरा मतलब तीन ह़ो नब्बे दाड़ा तक तीने खाया करजे। जे खाणु तु खाय, तीने तोली-तोलीन खाजे, मतलब दाड़ीक बे ह़ो तीस ग्राम1 खाया करजे, अने तीने टेम-टेम पोर खाजे। पाणी बी तु मापीन पीया करजे, मतलब दाड़ीक बे गीलास, अने तीने बी तु ठेरावली टेम पोर पीजे। तारु खाणु जळगम ना रोल्टान तेम बणाय्न खाया करजे, अने तीने माणहु ना हगार ना छाणा पोर तीमनी देखणते ह़ेकजे।”
अळतेण यहोवा केदो, “आहयी रीते ईस्रायल तीहया राज्य नी वच मे आह़फा-आह़फा ना वीटळ्ळा रोट्ला खाया करहे, जां में तीमने जबरजस्ती पुगाड़ही।”
ता में केदो, “गरा आय पड़े, यहोवा भगवान देख, मारु मन कारु बी नी वीटळ्यु, अने नी में नान्लो हतो तां गेथो लगाड़ीन हजु तक मरला पाळला-जानवरु नु, अने नी जंगली जानवरु नी लारे मारला नु मांह खादो, अने नी कानी भाती नु ह़ीगी आवे एवु मांह मारा मोडा मे कारु बी जेलु हय।”
ता तीहयो मने केदो, “देख, में तारी जुगु माणहु ना हगार ना छाणा नी बदले ढुरु ना छाण ना छाणा ठेरावलो से, अने तीनीत वेर तु तारा रोट्ला ह़ेकजे।”
अळतेण तीहयो मने केदो, “ए माणेह नी अवल्यात, देख, में यरुसलेम मे खाणु-पीणु बंद करही; करीन तां ना माणहु तोली-तोलीन अने चीन्ता करी-करीन रोट्ला खाया करहे; अने ह़ोह़ मे पड़ी-पड़ीन पाणी पीया करहे। अने आनी सी तीमने रोट्ला अने पाणी नी कमी हयहे; अने तीहया आखान-आखा घबरायहे, अने आह़फाम ना अधरम मे फसीन खत्तम हय जहे।”
Source notes (1)
- Footnote बे ह़ो तीस ग्राम 20 सेकेल
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.