Paliya Bible
यहेजकेल 48
घोराणा मे जागो वाटणु
घोराणा ना वाटा आहया रेय धुराव नी काकड़ ने चोटायतो हेतलोन नी वाट ने तां गेथो हमात नी घाटी तक, अने दमीस्क नी काकड़ ने तां ना हसरेनान गेथो धुराव नी ह़ोड़ हमात ने तां तक एक वाटो दान नो रेय; अने तीनी उगवणी अने बुडवणी काकड़ बी रेय। दान नी काकड़ ने चोटायतो उगवणो गेथो बुडवणो तक आसेर नो वाटो रेय। आसेर नी काकड़ ने चोटायतो, उगवणो गेथो बुडवणो तक नप्ताली नो वाटो रेय। नप्ताली नी काकड़ ने चोटायतो उगवणो गेथो बुडवणो तक मनस्से नो वाटो रेय। मनस्से नी काकड़ ने चोटायतो उगवणो गेथो बुडवणो तक एप्रेम नो एक वाटो रेय। एप्रेम नी काकड़ ने चोटायतो उगवणो गेथो बुडवणो तक रुबेन नो वाटो रेय। रुबेन नी काकड़ ने चोटायतो उगवणो गेथो बुडवणो तक यहुदा नो एक वाटो रेय।
देस नी वच मे जागा नो खास वाटो
यहुदा नी काकड़ ने चोटायतो उगवणो गेथो बुडवणो तक तीहयो ह़ोपलो वाटो रेय, जीने तमने ह़ोपवा पड़हे, तीहयो पच्चीह हजार टोकरा चवड़ो अने उगवणो गेथो बुडवणो तक काना एक घोराणा ना वाटा नी बराबर रेय, अने तीनी वच मे चोखलो जागो रेय।
जे वाटो तमने यहोवा ने आपवा नो रेहे, तीनी लम्बाय पच्चीह हजार टोकरा अने चवड़ाय दह हजार टोकरा रेय। आहयो ह़ोपलो चोखलो वाटो पुंजारा ने जड़वा जोवे; तीहयो धुराव नी ह़ोड़ पच्चीह हजार टोकरा नाम्बो, बुडवणी ह़ोड़ दह हजार टोकरा चवड़ो, उगवणी नी ह़ोड़ दह हजार टोकरा चवड़ो, दखणाव नी ह़ोड़ पच्चीह हजार टोकरा नाम्बो रेय; अने तीनी वचा-वच यहोवा नो चोखलो जागो रेय। आहयो खास चोखलो जागो सादोक नी अवल्यात ना तीहया पुंजारा नो रेय जे मारा हुकम ने मान्ता र्या, अने ईस्रायलीम ने भटक जवा नी टेमे लेवीम ने तेम नी भटकला हता। करीन देस ना ह़ोपला वाटा मे गेथो आहयो तीमनी जुगु ह़ोपलो वाटो मतलब आखा गेथु चोखलु देस ठेरे; अने लेवीम नी काकड़ ने चोटायतु रेय। पुंजाराम नी काकड़ ने चोटायतो लेवीम नो वाटो रेय, तीहयो पच्चीह हजार टोकरा नाम्बो अने दह हजार टोकरा चवड़ो रेय। पुरी लम्बाय पच्चीह हजार टोकरा नी अने चवड़ाय दह हजार टोकरा नी रेय। तीहया तीनी मे गेथा नी ते कंय वेचे, नी बीजी जागा बदले; अने नी जागा नी पेल्ली मेर अळी बीजा ने आपे। काहाके तीहयो यहोवा जुगु चोखलो से।
चवड़ाय ना पच्चीह हजार टोकरा नी अगळ जे पांच हजार बच रेहे, तीहयो ह़ेर अने घोरु अने चारवा ना जागा जुगु आखा बीजा वाटान तेवो रेय; अने ह़ेर तीनी वच मे रेय। ह़ेर नी आहयी माप रेय, मतलब धुराव, दखणाव, उगण, अने बुडवणी ह़ोड़ साड़ी च्यार-च्यार हजार हात रेय। ह़ेर नी ह़ाते धुराव, दखणाव, उगण अने बुडणली ह़ोड़ चारवा नी जागा रेय। जे ढाय-ढाय ह़ोव हात चवड़ी रेय। ह़ोपला चोखला वाटान्तां नी मे गेथो जे कंय बचे, मतलब उगवणी अने बुडवणी ह़ोड़ बेम ह़ोड़ दह-दह हजार टोकरा जे ह़ोपला वाटान्तां हय, तीनी मेर ह़ेर मे मेहनत करवा वाळा नी खावा जुगु रेय। ईस्रायल ना आखा घोराणा मे गेथा जे ह़ेर मे मेहनत करे, तीहया तीनी खेती कर्या करे।
आखो ह़ोपलो वाटो पच्चीह हजार टोकरा नाम्बो अने पच्चीह हजार टोकरा चवड़ो रेय; तमने च्यार खुट्यो चोखलो वाटो ह़ोपवा नु रेहे जीनी मे ह़ेर नी खास जागा रेय।
जे वाटो री जाय, तीहयो मुख्या ने जड़े। चोखला ह़ोपला वाटा ना, अने ह़ेर नी खास जागा नी बेम ह़ोड़ मतलब तीमनी उगवणी ह़ोड़ अने बुडवणी ह़ोड़ नी पच्चीह-पच्चीह हजार टोकरा नी चवड़ाय ने तां, जे घोराणा ना वाटान्तां रेय, तीहयो मुख्या ने जड़े। ह़ोपलो चोखलो वाटो अने घोर नो चोखलो जागो तीमनी वच मे रेय। जे मुख्या नो वाटो रेय, तीहयो लेवीम नी वच मे अने ह़ेरु नी खास जागा रेय। मुख्या नो वाटो यहुदा अने बीन्यामीन नी काकड़ नी वच मे रेय।
बीजा घोराणा नो वाटो
बीजा घोराणा नो वाटो आहयी भाते रेय उगवणो गेथो बुडवणो तक बीन्यामीन नो एक वाटो रेय। बीन्यामीन नी काकड़ ने चोटायतो उगवणो गेथो बुडवणो तक सीमोन नो एक वाटो रेय। सीमोन नी काकड़ ने चोटायतो उगवणो गेथो बुडवणो तक ईस्साकार नो एक वाटो रेय। ईस्साकार नी काकड़ ने चोटायतो उगवणो गेथो बुडवणो तक जबुलुन नो एक वाटो रेय। जबुलुन नी काकड़ ने चोटायतो उगवणो गेथो बुडवणो तक गाद नो एक वाटो रेय।
गाद नी काकड़ ने तां दखणाव नी ह़ोड़ नी काकड़ तामार गेथो लगाड़ीन कादेस तक मरीबा नाम झोर तक, अने मीसर ना कोतड़े अने मोट्ली दर्या तक पुगे।
जे देस तमने ईस्रायल ना घोराणा ने वाटवा नु रेहे “तीहयु आहयुत से, अने तीमना वाटा बी आहयात से, भगवान यहोवा आसमेत केय।”
ह़ेर ना झापला
ह़ेर नी नीकळवा नी वाट आहयी रेय, मतलब धुराव नी ह़ोड़ जीनी लम्बाय साड़ी च्यार हजार टोकरा नी रेय। तीनी मे तीन फाटा रेय; मतलब एक रुबेन नो फाटो, एक यहुदा नो फाटो, अने एक लेवी नो फाटो रेय; काहाके ह़ेर ना फाटा नु नाम ईस्रायल ना घोराणा ना नाम पोर राखवा पड़हे। उगवणी ह़ोड़ नी काकड़ साड़ी च्यार हजार टोकरा नाम्बी रेय; ने तीनी मे तीन फाटा रेय; मतलब एक युसुफ नो फाटो, एक बीन्यामीन नो फाटो, अने एक दान नो फाटो रेय। दखणाव नी ह़ोड़ काकड़ साड़ी च्यार हजार टोकरा नाम्बी रेय, अने तीनी मे तीन फाटा रेय; मतलब एक सीमोन नो फाटो, एक ईस्साकार नो फाटो, अने एक जबुलुन नो फाटो रेय; बुडवणी ह़ोड़ नी काकड़ साड़ी च्यार हजार टोकरा नाम्बी रेय, अने तीनी मे तीन फाटा रेय; मतलब एक गाद नो रेय, एक आसेर नो फाटो अने एक नप्ताली नो फाटो रे।1 ह़ेर नी च्यारो-मेर नी घेराव अट्ठारे हजार टोकरा नी रेय, अने तीहयात दाड़े गेथु अगु ह़ेर नु नाम “यहोवा साम्मा2 रेहे।”
Source notes (2)
- Cross-reference परकासीतवाक्य 21:12,13
- Footnote यहोवा साम्मा मतलब, मालीक आञे से
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.