Paliya Bible
दानीयल 1
दानीयल अने तीना ह़ाती
(दानीयल 1:1–6:28)
च्यार अदमी नबुकदनेस्सर नी राज्यसभा मे
यहुदा ना राजा यहोयाकीम ना राज्य ना तीसरा साल मे बेबीलोन नो राजा नबुकदनेस्सर यरुसलेम पोर हमलो करीन तीने घेर लेदो।1 तत्यार मालीक भगवान यहुदा ना राजा यहोयाकीम ने भगवान ना मंदीर ना ढेरेत ठाहरा भेळ नबुकदनेस्सर ना हात मे ह़ोप देदो। अने तीहयो तीहया ठाहराम ने सीनार देस मे आह़फा ना देवता ना मंदीर मे ली जाय्न, आह़फा ना देवता ना ह़मान मेकवा नु घोर मे मेल देदो।2
तत्यार तीहयो राजा आह़फा ना मुख्या नीयाव करवा वाळा असपनज ने हुकम आप्यो के ईस्रायल देस ना राजा ना घोराणा ना अने मोट्ला घोराणाम ना माणहु मे गेथा कंय जुवान्याम ने लाव, तीहया वण-गुनाळ्ळा, घटाळा अने आखी भाती नी अक्कल मे ह़मजदार, अने ह़ीकापण सी भरला अने ताखत वाळा, अने राजा ना राजवाड़ा मे सेवा करवा नी लायक हय; अने तीमने कसदी माणहु नी भणवा-लीखवा नी अने भासा नी ह़ीकापण आपो।3 राजा हुकम आप्यो के तीमनु खाणु अने पीवा ना अंगुर नो माणलो रोह मे गेथु तीमने दाड़ीक खावा-पीवा आपो। आहयी रीते तीन साल तक तीमनो पाळण-पोसण हयतो रेय; तत्यार तीनी बाद तीमने राजा नी अगळ सेवा मे हजुर करजो। तीमनी मे यहुदा नी अवल्यात मे गेथा टाळला दानीयल, हनन्याह, मीसायेल, अने अजर्याह नाम ना यहुदी हता। मुख्यो खोजो4 असपनज तीमना बीजा नाम पाड़्यो; मतलब दानीयल नु नाम तीहयो बेलतसस्सर, हनन्याह नु सद्रक, मीसायेल नु मेसक, अने अजर्याह नु नाम अबेदनगो पाड़्यो।
पण दानीयल आह़फा ना मन मे ठान लेदो के तीहयो राजा नु खाणु खाय्न, अने तीमना पीवा ना अंगुर ना माणला रोह ने पीन नी वीटळे; करीन तीहयो खोजा ना मुख्या पांह वीन्ती कर्यो के तीने वीटळवा नी पड़े। भगवान मुख्या खोजा ना मन मे दानीयल ना लेदे गीण अने दया भर देदो। असपनज दानीयल ने केदो, “मे मारा मालीक राजा सी बीहु, काहाके तमारु खावा-पीवा नु तीहयोत ठेरावलो से, कंय माय्न आसम नी हय जाय के तीहयो तारु मोडु तारा ह़ाते वाळा जुवान्या गेथु उतरलु अने नराज देखे अने मारु मुंडु ने तोड़ नाखे।”
मुख्यो खोजा असपनज, दानीयल, हनन्याह, मीसायेल, अने अजर्याह नु खाणु नी जुगाड़ करवा करीन एक मुख्या ने टाळलो हतो, दानीयल तीहया मुख्या ने केदो, “में तारी पांह वीन्ती करु, के तारा चाकर्या ने दह दाड़ा तक भाजी-पालो खावा अने पीवा करीन पाणी आपीन पारख। ता दह दाड़ा अळतेण अमारा मोडा ने अने जे जुवान्या राजा नु खाणु खाय तीमना मोडा ने देखजे, अने जीसम तने देखाव पड़े, तीनी अनसारे आह़फा ना पावर्या ह़ाते वेहवार करजे।”
तीमनी आहयी वात तीहयो मान लेदो, अने दह दाड़ा लग तीमने पारखतो र्यो। दह दाड़ान अळतेण राजा नु खाणु खावा वाळा आखा जुवान्या गेथु तीमनु मोडु वारु अने तीहया माता देखाव पड़्या। तत्यार तीहयो खाणु नो जुगाड़ करवा वाळो मुख्यो तीमनी जुगु खावा अने पीवा जुगु ठेरावलो अंगुर नो रोह, बेम छोड़ीन, तीमने भाजी-पालो आपवा बाज ज्यो।
भगवान तीहया च्यारोव जुवान्याम ने आखा भणवा-लीखवा अने आखी भाती ना ग्यान मे अक्कल अने हुनर आप्यो; अने दानीयल आखा भाती ना दरसन अने ह़पना नु मतलब बी ह़मजवा बाज ज्यो।
राजो नबुकदनेस्सर आहयो हुकम आपलो हतो के ईस्रायल माणहु मे गेथा आखा जुवान तीन साल नी अळतेण तीनी अगळ राजवाड़ा मे हजुर करे। जत्यार आहयी टेम पुरी हयी ता मुख्यो खोजा असपनज तीमने राजवाड़ा मे लीज्यो। अने तीहयो तीमने राजा नी अगळ हजुर कर्यो। राजो तीमनी ह़ाते वात कर्यो; अने दानीयल, हनन्याह, मीसायेल, अने अजर्याह नी बराबर तीमनी मे गेथो कोय नी ठेर्यु; एतरे राजा तीमने आह़फा नी सेवा कराव्वा करीन टाळ लेदो। अक्कल अने आखी भाती नी ह़मज ना बारा मे जे कंय राजा तीमने पुसतो हतो तीनी मे तीहया पुरा राज्य ना आखा जानकारु अने जादु-टोना करन्या गेथा दह गुणा हुस्यार ठेरता हता। दानीयल बेबीलोन ना राजवाड़ा मे कुस्रु राजा ना राज्य नी टेम ना पेल्ला साल तक बणीन र्यो।
Source notes (4)
- Cross-reference 2 राजा 24:1; 2 ईतीहास 36:5-7
- Cross-reference 2 राजा 20:17-18; 24:10-16; 2 ईतीहास 36:10; यसाया 39:7-8
- Cross-reference 2 राजा 20:17,18; 24:10-16; 2 ईतीहास 36:10; यसाया 39:7,8
- Footnote खोजो गतराड़ो
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.