Paliya Bible
यहेजकेल 47
मंदीर मे गेथो वयत्लो झोर
अळतेण तीहयो मने घोर ना झापले पासो ली जती र्यो; अने घोर नी ढेहळ नी तळे गेथो झोर नीकळीन उगवणी ह़ोड़ वय र्यो हतो। घोर नु झापलु ते उगवणी ह़ोड़ हतु, अने झोर घोर नी जमणी ह़ोड़ अने वेदी नी दखणाव नी ह़ोड़ हेटो गेथो नीकळतो हतो।1 ता तीहयो मने धुराव ना फाटे माय्न बारो ली ज्यो, अने बारो-बारो फीरावीन बाहरला मतलब उगवणा मोडा वाळा फाटान्तां पुगाड़ देदो, अने दखणाव भणीन गेथु पाणी थोड़ुक-थोड़ुक वयतु हतु। जत्यार तीहयो माणेह हात मे मापवा नी दोरी लीन उगवणी ह़ोड़ नीकळ्यो, ता तीहयो घोर ने तां गेथो लगाड़ीन, हजार हात तक तीहया झोर ने माप्यो, अने मने पाणी मे चलाड़्यो, अने पाणी मांडे तक हतु। तीहयो अळी हजार हात मापीन मने पाणी मे चलाड़्यो, अने पाणी घुटणे तक हतु, अळतेण अळी हजार हात मापीन मने पाणी मे चलाड़्यो, अने पाणी केड़े तक हतु। ता अळी तीहयो एक हजार हात माप्यो, अने एवी नंदी बण जी जीनी पार मे जाय नी सक्यो, काहाके पाणी जादा हय्न तीरवा नी लायक हय ज्यु; मतलब एवी नंदी हती जीनी पार कोय जाय नी सकतु हतु। ता तीहयो मने केदो, “ए माणेह नी अवल्यात, ह़ु तु आहयु देखलो से?” ता तीहयो मने नंदी ना कापे-कापे पासो लावीन पुगाड़ देदो। पासो आयो ता आवीन में देख्यो, के नंदी नी बेम काठे ढेरेत झाड़का से। ता तीहयो मने केदो, “आहयो झोर उगवणु देस भणीन वय र्यो, अने अराबा मे उतरीन तळाव बणीन वयहे; अने घोर मे गेथो नीकळलो ह़ुदो तळाव मे भेसकाय जहे; अने तीनु पाणी गळु हय जहे। जां-जां आहयी नंदी वये, तां-तां आखी भाती ना घणा ईंडा मेकवा वाळा जीव-जन्तु जीवहे अने माछला बी घणा हय जहे; काहाके आहया झोर नु पाणी तां पुगलु से, अने तळाव नु पाणी गळु हय जहे; अने जां कंय आहयी नंदी पुगहे तां आखा जानवर पीहे। तळाव ना काठे माछला मारन्या काहर्या उबा रेहे, अने एनगदी झोर गेथा लगाड़ीन एनेग्लेम झोर तक जाळ फेलावहे, अने तीमने मोट्ली दर्या मे वाळान तेवा भाती-भाती ना गीणाय नी एतरा माछला जड़हे। पण तळाव ने तां जे दलदल अने खाडा से, तीमनु पाणी गळु नी हये; तीहया खारलात रेहे। नंदी ना बेम काठे भाती-भाती ना खावा नी लायक फालण्या झाड़का उबजहे, जीमना पान्टा नी चीमाय अने तीमनु फालनु बी कारु बंद नी हये, काहाके नंदी नु पाणी चोखला जागा मे गेथु नीकळलु से। तीमनी मे मयना डीट नवला-नवला फोळ लागहे। तीमना फोळ खावा जुगु, अने पान्टा दवा ना काम मे आवहे।”
देस नी काकड़
भगवान यहोवा आसम केय, “जे काकड़ नी मोय तमने आहयु देस आह़फाम ना बारे घोराणा नी अनसारे वाटवा पड़हे, तीहया आहया से युसुफ ने बे वाटा जड़े। तीने तमु एक-बीजा ना बराबर खुद ना वाटा मे देखहु, काहाके में ह़ाम खादलो के तीने तमारा बाहु ने आपही, करीन आहयु देस तमारो खुद नो वाटो ठेरहे।
“देस नी काकड़ आहयी रेय: मतलब धुराव नी काकड़ मोट्ली दर्या गेथी लगाड़ीन हेतलोन ह़ेर ने तां माय्न सदाद नी घाटी तक पुगे, अने तीहयी काकड़ ने तां हमात बेरोता, अने सीब्रेम जे दमीस्क अने हमात नी काकड़ नी वच मे से, हसर्हत्तीकोन तक, जे होरान नी काकड़ पोर से। आहयी काकड़ दर्या गेथी लगाड़ीन दमीस्क नी काकड़ ने तां ना हसरेनोन तक पुगे, अने तीनी धुराव नी ह़ोड़ हमात रेय। धुराव नी काकड़ आहयीत रेय।
“उगवणी काकड़ जीनी एक ह़ोड़ होरान दमीस्क; अने यरदन भणीन गीलाद अने ईस्रायल नु देस रेय; धुराव नी काकड़ गेथी लगाड़ीन उगवणा तळाव तक तीने मापजे। उगवणी काकड़ ते आहयीत रेय।
“दखणाव नी काकड़ तामार गेथी लगाड़ीन कादेस ना मरीबा नाम ना झोर तक मतलब मीस्र ना कोतड़े तक, अने मोट्ली दर्या तक पुगे। दखणाव नी काकड़ आहयीत रेय।
“बुडवणी काकड़ दखणाव नी काकड़ गेथी लगाड़ीन हमात नी घाटी नी अगळ तक नी मोट्ली दर्या रेय। बुडवणी काकड़ आहयीत रेय।
“आहयी रीते देस ने ईस्रायल ना घोराणा नी अनसारे तमारी वच मे वाट लेजो। आने तमारी वच मे अने तीहया बीजा देस वाळा ह़ाते वाट लेजो, जे तमारी वच मे रेता जाय्न सोरा पयदा करला से। तीहया तमारी नींगा मे देस ना ईस्रायलीन तेवा ठेरे, अने तमारा घोराणा नी वच मे आह़फा-आह़फाम नो वाटो हात करे। जे बीजा देस वाळो जे घोराणा ना देस मे रेतो हय, तीने तांत वाटो आपजो, भगवान यहोवा आसमेत केय।”
Source notes (1)
- Cross-reference जकर्याह 14:8; युहन्ना 7:38; परकासीतवाक्य 22:1
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.