Paliya Bible
यहेजकेल 46
मुख्यो अने तीवार
भगवान यहोवा आसम केय, “मोय नु आंगणु नो उगवणो फाटो काम-काज ना छोव दाड़ा देदलो रेय, पण अराम ना दाड़े उगड़लो रेय। अने नवला चांद ना दाड़े बी उगड़लो रेय। मुख्यो बाहर गेथो फाटा ना मांडवा नी वाटे माय्न आवीन फाटा ना एक खम्बान्तां उबो हय जाय, अने पुंजारो तीनी होम बादा अने मेल-मीलाप नी बादा तीयार करे; अने तीहयो फाटा नी डेहळी पोर वांदे; ता तीहयो बारो जाय, अने फाटो ह़ांतो तक नी देवा देवो। माणहु अराम अने नवला चांद ना दाड़ा मे तीहया फाटा ना झापले यहोवा अगळ वांदे। अराम ना दाड़े जे होम बादा मुख्या यहोवा जुगु चड़ावे, तीहया गाडरा ना छोव वण-गुनाळ्ळा बच्चा अने एक वण-गुनाळ्ळा गाडरा नु रेय। अनबादा आहयी रेय: मतलब गाडरा नी ह़ाते एपा भर अन अने गाडरा ना बच्चा भेळ ईच्छा नी अनसारे अन अने एपा ह़ाते हीन भर तेल। नवला चांद ना दाड़े तीहयो एक वण-गुनाळ्ळु वाछड़ु अने गाडरु ना छोव बच्चा अने एक गाडरो; आहया आखा वण-गुनाळ्ळा रेय। वाछड़ु अने गाडरा बेम नी ह़ाते तीहयो एक-एक एपा अनबादा तीयार करे, अने गाडरा ना बच्चा ह़ाते ईच्छा नी अनसारे अन, अने एपा ह़ाते हीर भर तेल। जत्यार मुख्यो मोय जाय ता तीहयो फाटा ना मांडवा मे माय्न जाय, अने तीहयीत वाटे नीकळी जाय।
“जत्यार बीजा आखा माणहु टाकली टेम पोर यहोवा अगळ वांदवा करीन आवे, ता जे धुराव ना फाटे माय्न वांदवा मोय आवे, तीहया दखणाव ना फाटे माय्न नीकळे, अने जे दखणाव ना फाटे माय्न मोय आवे, तीहया धुराव ना फाटे माय्न नीकळे, मतलब जे, जे फाटे माय्न मोय आहयु हय, तीहयु तीहया फाटे माय्न नी पासु जाय, आह़फाम नी अगळेत ह़ुदा नीकळ जाय। जत्यार तीहया मोय आवे ता मुख्यो तीमनी ह़ाते मोय आवे, अने जत्यार तीहया नीकळे, ता तीहया एक्ठा नीकळे। तीवारु अने बीजी टाकली टेम नी अनबादा वाछड़ु ह़ाते एपा भर अने गाडरा ह़ाते एपा भर हय; अने गाडरा ना बच्चा ह़ाते ईच्छा नी अनसारे अन अने एपा ह़ाते हीन भर तेल।
“अळतेण जत्यार मुख्यो होम बादा नीता मेल-मीलाप नी बादा ने वारली बादा करीन यहोवा अगळ तीयार करे, ता उगवणा मोडा नो फाटो तीमनी जुगु उगाड़े, अने तीहया आह़फाम नी होम बादा नीता मेलबादा तेमेत तीयार करे जेम तीहयो अराम ना दाड़े करे; ता तीहयो नीकळे, अने तीने नीकळवान अळतेण फाटो देय।”
दाड़ीक नी भेट
“दाड़ीक तु सालेक नु एक वण-गुनाळ्ळु गाडरु नु बच्चु यहोवा जुगु होम बादा जुगु तीयार करजे, आहयु दाड़ीक ह़वारे तीयार करे। दाड़ीक ह़वारे तीनी ह़ाते एक अनबादा तीयार करजे, मतलब एपा नो छटवो वाटो अने मेदा मे भेसकवा करीन हीन भर तेल नो तीसरो वाटो यहोवा जुगु जलमकी अनबादा हमेसा नी रीती नी अनसारे चड़ाया करे। गाडरु नु बच्चु, अनबादा अने तेल, दाड़ीक ह़वारे हमेसा होम बादा करीन चड़ावे।”
मुख्यो अने जागा नो वाटो
भगवान यहोवा आसम केय: “कदीम मुख्यो आह़फा ना काना सोरा ने कंय आपे, ता तीहयो तीनो वाटो तीना सोरा ना सोरा ने बी जड़े; वाटा ना नेम नी अनसारे तीहयो तीमनो बी खुद नो वाटो ठेरे। पण कदीम तीहयो आह़फा ना वाटा मे गेथु कंय आह़फा ना पावर्या ने आपे, ता छुटवा ना दाड़े तक ते तीहयो तीनो रेय, पण अळतेण पासो मुख्या ने आप देय; अने तीनो खुद नो वाटोत तीना सोरा ने जड़े। माणहु नो एवो वाटो मुख्यो नी लेय, जे वेला पाड़ीन तीनी खुद नी जागा मे गेथो हापक्यो हय; आह़फा ना सोरा ने तीहयो आह़फा नी खुद नीत जागा मे गेथो वाटो आपे; आसम नी हयवा जोवे के मारा माणहु आह़फाम नी खुद नी जागा मे गेथा रीवण्या-तीवण्या हय जाय।”
मंदीर ना रांदवा ना घोर
अळतेण तीहयो मने फाटा ना एक ह़ोड़ ना झापले माय्न पुंजारा ना धुराव भणी झापला वाळा चोखला कोपरान्तां ली ज्यो; तां बुडवणी ह़ोड़ ना खुणा मे एक जागो हतो। ता तीहयो मने केदो, “आहयो तीहयो जागो से जीनी मे पुंजारा गुना नी बादा अने पापबादा नु मांह ने रांदे अने अनबादा ने रांदे, आसम नी हयवा जोवे के तीमने बारहलु आंगणु मे लीजवा सी बीजा आखा माणहु चोखला ठेरे।”
ता तीहयो मने बाहरलु आंगणु मे ली जाय्न तीहया आंगणा ना च्यारोव खुणा मे फीरायो, अने आंगणु ना आखा खुणे एक-एक ओट्लो बणली हती, मतलब आंगणु ना च्यारोव खुणे चाळीह हात नाम्बा अने तीस हात चोवड़ा ओट्ला हता; च्यारोव खुणा ना ओट्ला नी एकीत माप हती। मोय च्यारो-मेर भीड़तु हतु, अने भीड़तु नी तळे रांदवा करीन चुला बणला हता। ता तीहयो मने केदो, “रांदवा ना घोर, जां घोर ना काम करन्या माणहु नी लारे चड़ावली बादा ने रांदे, तीहया आहयात से।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.