यहेजकेल 45

देस नी जागा मे भगवान नो वाटो

1जत्‌यार तमु चीट्‌ठी नाखीन देस ने वाटो, ता देस मे गेथो एक वाटो चोखलो जाणीन यहोवा ने ह़ोपजो; तीनी लम्‌बाय पच्‌चीह हजार टोकरा रेय अने चवड़ाय दह हजार टोकरा रेय, तीहयो वाटो तीनी च्‌यारो-मेर नी काकड़ तक चोखलो ठेरे। 2तीनी मे गेथो चोखला जागा जुगु पांच ह़ोव टोकरा नाम्‌बो अने पांच ह़ोव टोकरा चवड़ो जागो रेय, अने तीनी च्‌यारो-मेर पचाह-पचाह हात चवड़ो जागो छुट्‌लो पड़लो रेय। 3तीहया चोखला जागा मे तमु पच्‌चीह हजार टोकरा नाम्‌बो अने दह हजार टोकरा चवड़ो जागो मापजो; अने तीनीत मे चोखलो जागो बणावजो, जे आखा गेथो चोखलो ठेरे। 4जे पुंजारो चोखला जागा नी सेवा-चाकरी करे अने यहोवा नी सेवा-चाकरी करवा करीन ह़ाते आवे, तीहयो तीमनीत जुगु रेय; तां तीमना घोरु जुगु जागो रेय अने चोखला जागा जुगु चोखलो ठेरे। 5अळतेण पच्‌चीह हजार टोकरा नाम्‌बो, अने दह हजार टोकरा चड़वो एक वाटो, घोर नी सेवा-चाकरी करवा वाळा लेवीम ना वीह कोपरा जुगु रेय।

6अळतेण ह़ेर जुगु, ह़ोपला चोखला जागान्‌तां तमु पांच हजार टोकरा चड़वो अने पच्‌चीह हजार टोकरा नाम्‌बो, खास जागो ठेरावजो; तीहयो ईस्‌रायल ना आखा घोराणा जुगु रेय।

मुख्‌या जुगु जागो

7मुख्‌या नो खुद नो वाटो चोखला ह़ोपला वाटा अने ह़ेर ना खास जागा नी बेम ह़ोड़ मतलब बेम नी बुडवणी अने उगवणी ह़ोड़ बेम वाटा नी अगळ हय; अने तीनी लम्‌बाय बुडवणी गेथी लगाड़ीन उगवणी ह़ोड़ तक तीहया बे वाटा मे गेथो काना बी एक नी बराबर हय। 8ईस्‌रायल ना देस मे मुख्‌या नो आहयोत खुद नो जागो रेय। मारा ठेरावला मुख्‌या मारा माणहु ने अळी वेला नी पाड़े; पण ईस्‌रायल ना घोराणा ने तीमना घोराणा नी अनसारे देस जड़े।

मुख्‌या जुगु नेम

9भगवान यहोवा आसम केय, “ए ईस्‌रायल ना मुख्‌या! रेवा देवो, वेला पाड़वा अने दमवा छोड़ देवो, अने नीयाव अने धरम ना काम कर्‌या करो; मारा माणहु ने नीकाळवा छोड़ देवो, भगवान यहोवा आसमेत केय।

10“तमारी ताकड़ी, माप-तोल ना बाट अने मापवा नु ठाहरु खरलु रेय।1

11“एपा2 अने बाट बेम एकीत माप ना रेय, मतलब बेम मे होमोर नो दह़वो वाटो ह़माय; बेम नी माप होमोर ना हीसाप सी रेय।

12“सेकेल3 वीह गेरा4 नो रेय; अने तमारा मानेह5 वीह, पच्‌चीह, नीता पंदरे सेकेल नी रेय।

13“तमारी भेट आहयी रेय, मतलब गम ना होमेर6 वेर एपा नो छटवो वाटो, अने जळगम ना होमेर मे गेथा एपा नो छटवो वाटो आपजो। 14तेल नो ठेरावलो वाटो कोर7 ते दह बत8 मतलब एक होमेर नी बराबर से, काहाके होमेर दह बाट नो रेय। 15ईस्‌रायल ना वारला-वारला चारवा ना जागा मे गेथा बे-बे ह़ो गाडरा-बोकड़ा मे गेथा एक गाडरु नीता बोकड़ु आपे। आहयु आखु ह़मान अनबादा, होम बादा अने मेल-मीलाप नी बादा जुगु आपे जीनी सी तीमनी जुगु पछतावो करे, भगवान यहोवा आसमेत केय।

16“ईस्‌रायल ना मुख्‌या जुगु देस ना आखा माणहु आहयी भेट आपे। 17तीवार, नवला चांद ना दाड़ा, अराम ना दाड़ा अने ईस्‌रायल ना घोराणा नी आखी ठेरावली टेम मे होम बादा, अनबादा, अने रेचव्‌वा नी बादा आपवा मुख्‌या नुत काम रेय। ईस्‌रायल ना घोराणा जुगु पछतावो करवा करीन तीहयी पापबादा, अनबादा, होम बादा अने मेल-मीलाप नी बादा तीयार करे। ईस्‌रायल ना घोराणा जुगु पछतावो करवा करीन तीहयी पापबादा, अनबादा, होम बादा अने मेलबादा तीयार करे।”

तीवार

(नीरगमन 12:1-20; लेव्‌यवेवस्‌था 23:33-43)

18भगवान यहोवा आसम केय, “पेल्‌ला मयना ना पेल्‌ला दाड़े तु एक वण-गुनाळ्‌ळु वाछड़ु लीन चोखला जागा ने चोखो करजे। 19आहयी पापबादा नी लोय मे गेथु पुंजारो थोड़ुक लीन घोर नी चवखट ना खम्‌बे, अने वेदी ना पाञा ना च्‌यारोव खुणा, अने मोय नु आंगणु ना फाटा ना खम्‌बा पोर लगाड़े। 20अळतेण भुलीन नीता गलती सी पाप कर्‌या हय तीमनी जुगु मयना ना ह़ातवा दाड़े बी आसमेत करजे; आहयीत रीते घोर जुगु पछतावो करजे।

21“पेल्‌ला मयना ना चोवदवा दाड़े तमारो तीवार हया करे, तीहयो ह़ात दाड़ा नो तीवार रेय अने तीहया तीवार मे खमीर वगर ना रोट्‌ला खाय। 22तीहया दाड़े मुख्‌यो आह़फा अने आखा माणहु जुगु एक वाछड़ु पापबादा जुगु तीयार करे। 23तीवार ना ह़ातोव दाड़ा तीहयो यहोवा जुगु होम बादा तीयार करे, मतलब एक-एक दाड़े ह़ात-ह़ात वण-गुनाळ्‌ळा वाछड़ा अने ह़ात-ह़ात वण-गुनाळ्‌ळा गाडरा अने दाड़ीक एक-एक बोकड़ो पाप नी बादा जुगु तीयार करे। 24आखा वाछड़ा अने गाडरा ह़ाते तीहयो एपा भरीन अनबादा, अने एपा पसळ हीन9 भर तेल तीयार करे।

25“ह़ातवा मयना ना पंदरवा दाड़े गेथा लगाड़ीन ह़ात दाड़ा तक मतलब तीवार ना दाड़ा मे तीहयो पापबादा, होम बादा, अनबादा अने तेल नी भेट आहयीत रीती नी अनसारे कर्‌या करे।”