Paliya Bible
यहेजकेल 39
गोग राजा नु हारनु
अळतेण ए “माणेह नी अवल्यात, गोग ना वीरोद मे भगवान वगे गेथी वात करीन आहयु के, ए गोग, ए रोस, मेसेक, अने तुबल राज्य ना मुख्या, भगवान यहोवा आसम केय: में तारा वीरोद मे से। में तने फीराय लावही, अने धुराव ना नाम्बे-नाम्बे ना देस गेथा चड़ाय लावही, अने ईस्रायल ना बड़ा पोर पुगाड़ही, तां में तारी धंदली तारा डाखर्या हात मे गेथी पाड़ही, अने तारा बीलखा ने तारा जमणा हात मे गेथा पाड़ देही। तु आह़फा ना आखी सेना अने आह़फा नी ह़ाते नु आखु राज्य भेळ ईस्रायल ना बड़ा पोर मर जही; में तने भाती-भाती ना मांह खाण्या चड़ा अने जानवरु नु खाणु बणाय देही। तु खेतर मे पड़ही, काहाके मेत आसम केदलो से, भगवान यहोवा आसमेत केय। में मागोग ह़ेर मे अने टापु मे बीह्या वगर रेवा वाळा नी वच मे आक्ठु धपाड़ही; अने तीहया जाण लेहे के में यहोवा से। में मारा माणहु ईस्रायल नी वच मे मारु नाम उजन्तु करही; अने मारु चोखलु नाम ने अळी वीटळवा नी देम; ता राज्य-राज्य ना माणहु बी जाण लेहे के में यहोवा ईस्रायल नो चोखलो भगवान से।”
आहयु हयवा वाळु से, “अने आहयु पक्कु हयहे, भगवान यहोवा आसमेत केय। आहयो तीहयोत दाड़ो से जीना बारा मे, में वात करलो से। ता ईस्रायल ना ह़ेरु मे रेवा वाळा नीकळहे अने हत्यार ने धपाड़ देहे, नान्ली मोट्ली ढाळ, धंदली, अने बीलखा, अने लाकड़ी, भाला, आखु ने तीहया ह़ात साल तक धपाड़ता रेहे। आहया कारण सी तीहया मेदान मे लाकड़ा ने ह़ोदवा नी जरवत नी पड़े। नी जंगल मे वाडे, काहाके तीहया हत्यार नेत धपाड़्या करहे, तीहया आह़फाम ने लुटवा वाळा ने लुटहे, अने आह़फाम नी पांह हापकवा वाळा पांह हापकहे,” भगवान यहोवा आसमेत केय।
गोग ने गाड़नु
“तीहयी टेमे में गोग ने ईस्रायल मे मड़ाट्यु आपही, तीहयु तळाव नी उगवणी ह़ोड़ रेहे; तीहयु आव्वा जवा वाळा नी घाटी केवायहे, अने आव्वा जवा वाळा ने तां उबा रेवा पड़हे; तां आखी भीड़ भेळ गोग ने वगे करहे अने तीहया जागा नु नाम गोग नी भीड़ नी घाटी पड़हे। ईस्रायल नु घोराणु तीने ह़ात मयना लग वगे करतु रेहे आनीन करते के आह़फा नु देस ने चोखु करे। देस ना आखा माणहु मेळीन तीमने वगे करहे; अने जे टेमे मारी बड़ाय हयहे, तीहयी टेमे तीमनु बी नाम मोटु हयहे, भगवान यहोवा आसमेत केय। ता तीहया माणहु ने टाळहे, जे लगातार आहयात काम मे लागला रेहे, मतलब देस मे फीरी-फीरीन आव्वा-जवा वाळा नी ह़ाते मेळीन देस ने चोखु करवा करीन तीमने जे जागा पोर पड़ला रेहे, वगे करहे; अने ह़ात मयना वीतते तक तीहया ह़ोदी-ह़ोदीन आहयु काम करता रेहे। देस मे आव्वा-जवा वाळा मे गेथा जत्यार कोय काना माणेह नु हाटकु ने देखहे, ता तीनीन्तां एक सेलाणी उबी करहे, आहयी सेलाणी तत्यार तक रेहे जत्यार तक वगे करवा वाळा तीने गोग नी भीड़ नी घाटी मे गाड़ नी देय। तां ना ह़ेर नु नाम बी ‘हमोना’ से। आहयी रीते देस चोखु करहे।
“अळतेण ए माणेह नी अवल्यात, भगवान यहोवा आसम केय: भाती-भाती ना आखा चड़ा अने आखा जंगल ना जानवरु ने हुकम आप, आखा एक्ठा हय्न आवो, मारु आहयु मोट्लु बादा नु खाणु मे जे मे तमारी जुगु ईस्रायल ना बड़ा पोर तीयार करु, च्यारो-मेर गेथा एक्ठा हयो के तमु मांह खावो अने लोय पीवो। तमु वारला झुमायवा वाळा नु मांह खाहु, अने धरती ना मुख्या नु लोय पीहु अने गाडरा, गाडरा ना बच्चा, बोकड़ा अने बोळद्या नु बी जे आखान-आखा बासान देस ना तीयार करला रेहे। मारु तीहयु बादा नु खाणु नी चर्बी वेर जे में तमारी जुगु तीयार करु, तमु खाता-खाता आफरी जहु, अने तीनु लोय पीता-पीता छाक जहु। तमु मारी खावा नी टेबल पोर घोड़ा, घोड़ा पोर बहण्या, वारला झुमायण्या, अने आखा भाती ना झुमायण्या सी आफरहु, भगवान यहोवा आसमेत केय।1
ईस्रायल नु पासु अळी बणावणु
“में राज्य-राज्य नी वच मे मारी बड़ाय उजन्ती करही, अने राज्य-राज्य ना आखा माणहु मारा नीयाव ना काम जे में करही, अने मारो हात जे तीमनी पोर पड़हे, देख लेहे। तीहया दाड़े गेथा अगा ईस्रायल नु घोराणु जाण लेहे के यहोवा अमारो भगवान से। राज्य-राज्य ना माणहु बी जाण लेहे के ईस्रायल नु घोराणु आह़फाम ना अधरम ना कारण गुलामी मे जेलु हतु; काहाके तीहया मारी ह़ाते आसम धोको कर्या के में मारु मोडु तीमनी भणी गेथु सेटु कर लेदो अने तीमने तीमना वेरी ना हात मे कर देदो, अने तीहया आखा तलवार वेर मर ज्या, में तीमनी वीटळ अने गुना नीत अनसारे तीमनी ह़ाते वेहवार करीन तीमनी भणी गेथु मारु मोडु फीरवी लेदलो हतो।
“करीन भगवान यहोवा आसम केय: हाव में याकुब ने गुलामी मे गेथो पासो ली आवही, अने ईस्रायल ना आखा घोराणा पोर दया करही; अने मारा चोखला नाम जुगु मने रीह लागहे। ता तीहया आखा धोका ना कारण सी जे तीहया मारा वीरोद मे करला लजवाहे; अने आह़फाम ना देस मे बीह्या वगर रेहे; अने कोय तीमने नी बीहाड़े। जत्यार में तीमने राज्य-राज्य मे गेथा पासा ली आवही, अने तीहया वेरीम ना देसु मे गेथा एक्ठा करही, ता घणा राज्य नी नींगा मे तीमनी लारे चोखलो ठेरही। ता तीहया जाण लेहे के यहोवा अमारो भगवान से, काहाके में तीमने राज्य-राज्य मे गुलाम बणावीन मोकलीन पासो तीमना आह़फाम ना देस मे एक्ठा करलो से। में तीमनी मे गेथा कोय ने बी अळी बीजा देस मे नी रेवा देम, अने तीमनी भणी गेथु मोडु अळी कदी नी फीरवु, काहाके में ईस्रायल ना घोराणा पोर मारी आत्मा रेचवलो से, भगवान यहोवा आसमेत केय।”
Source notes (1)
- Cross-reference परकासीतवाक्य 19:17,18
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.