Paliya Bible
यहेजकेल 37
ह़ुकला हाटका नी घाटी
यहोवा नी सक्ती मारी पोर हयी, अने तीहयो मारी मे आह़फा नी आत्मा ने ह़माड़ीन बाहर ली ज्यो अने मने घाटी नी वच मे उबो कर देदो; तीहयी घाटी हाटका सी भरली हती। ता तीहयो मने च्यारो-मेर फीरव्यो, अने घाटी नी जागा पोर घणा हाटका हता; अने तीहया घणा ह़ुकला हता। ता तीहयो मने पुछ्यो, “ए माणेह नी अवल्यात, ह़ु आहया हाटका जीव सके?”
में केदो, “ए भगवान यहोवा, तुत जाणे।”
ता तीहयो मने केदो, “आहया हाटका ने भगवान वगे गेथी वात कीन के, ए ह़ुकला हाटका भगवान नो बोल ह़मळो। भगवान यहोवा तमु हाटका ने आसम केय: देखो, में खुद तमारी मे ह़ाह़ ह़माड़ही, अने तमु जीव उठहु। में तमारी नेह उबजाड़ीन हाटका मे मांह भरही। अने तमु ने चामड़ु वेर ढाकही; अने तमारी मे ह़ाह़ ह़माड़ही, ता तमु जीव उठहु; अने तमु जाण लेहु के में यहोवा से।”
आहया हुकम नी अनसारे में भगवान वगे गेथी वात केवा बाज ज्यो; अने में भगवान वगे गेथी वात केवात बाज र्यो हतो, ता एक अवाज ह़मळायी, अने ज्योरेत अवाज आयी, अने तीहया हाटका एक्ठा हय्न हाटकु सी हाटकु जोड़ाय ज्या। में देखतो र्यो, के तीमनी मे नेहटा अने मांह भराय ज्यु, अने तीहया आखा उपर चामड़ा वेर ढकाय ज्या; पण तीमनी मे जीवाय नी ह़ाह़ नी हती।
ता तीहयो मने केदो, “ए माणेह नी अवल्यात, ह़ाह़ ने भगवान वगे गेथी वात करीन के, ए ह़ाह़ भगवान यहोवा आसम केय: च्यारो-मेर गेथी आवीन आहया आखा मारला मे ह़माय जा के आहया जीव उठे।”
तीना आहया हुकम नी अनसारे में भगवान वगे गेथी वात केदो, ता ह़ाह़ तीमनी मे आय जी, अने तीहया जीवीन आह़फा-आह़फाम ना पोगु ना भरहे उबा हय ज्या; अने एक घणी मोटी सेना बण जी।1
अळतेण तीहयो मने केदो, “ए माणेह नी अवल्यात, आहया हाटका मानो ईस्रायल नु आखु घोराणु से। तीहया केय, अमारा हाटका ह़ुक ज्या, अने अमारी आह खत्तम हय जी; आमु पुरी रीते खत्तम हय जेला से। करीन भगवान वगे गेथी वात करीन तीमने के, भगवान यहोवा आसम केय: ए मारा माणहु, देखो, में तमारा मड़ाट्या उगाड़ीन तमने तीमनी मे गेथा नीकाळही, अने ईस्रायल ना देस मे पुगाड़ देही। एतरे जत्यार में तमारा मड़ाट्या उगाड़ु, अने तमु ने तीमनी मे गेथा नीकाळही, ता ए मारा माणहु, तमु जाण लेहु के में यहोवा से। में तमारी मे मारी आत्मा ह़माड़ही, अने तमु जीवहु; अने तमने तमारा खुद ना देस मे वहाड़ही; ता तमु जाण लेहु के में यहोवात आहयु केदलो, अने करलो बी से, यहोवा आसमेत केय।”
यहुदा अने ईस्रायल एकीत राज्य
अळतेण यहोवा नो आहयो बोल मारीन्तां पुग्यो: “ए माणेह नी अवल्यात,” एक लाकड़ी लीन तीनी पोर लीख, “यहुदा नी अने तीनी ह़ाते वाळा ईस्रायल नी, अने अळतेण बीजी लाकड़ी लीन तीनी पोर लीख, ‘युसुफ नी मतलब एप्रेम नी, अने तीनी ह़ाते वाळा ईस्रायल नी लाकड़ी।’ अळतेण तीहया लाकड़्या ने एक बीजी ह़ाते जोड़ीन एकीत बणाय लेय के तीहयी तारा हात मे एकीत लाकड़ी बण जाय। जत्यार तारा माणहु तने पुछे, ‘ह़ु तु आमने नी देखाड़े के आनु ह़ु मतलब से?’ ता तीमने केजे, भगवान यहोवा आसम केय: देखो, में युसुफ नी लाकड़ी ने जे एप्रेम ना हात मे से, अने ईस्रायल ना जे घोराणा तीना ह़ाते वाळा से, तीमने लीन यहुदा नी लाकड़ी ह़ाते जोड़ीन तीनी ह़ाते एकीत लाकड़ी बणाय देही; अने बेम मारा हात मे एकीत लाकड़ी बणहे।
“जे लाकड़्या पोर तु आसम लीखही, तीहया तीमनी अगळ तारा हात मे रेय। ता तु तीहया माणहु ने के, भगवान यहोवा आसम केय देखो, में ईस्रायलीम ने तीहया राज्य मे गेथो लावीन जीमनी मे तीहया जत रेला से, च्यारो-मेर गेथा एक्ठा करही; अने तीमना खुद ना देस मे पुगाड़ही। में तीमने तीहया देस मतलब ईस्रायल ना बड़ा पोर एकीत राज्य बणाय देही; अने तीहया आखा नो एकीत राजो रेहे; अने तीहया अळतेण बे नी रेय अने नी बे राज्य मे कारु बी वटाये। अळतेण तीहया मुरत्या, अने गलत कामु नीता आह़फाम ना काना भाती ना पापु नी लारे आह़फाम ने नी वीटाळे; पण में तीमने तीहया आखा जागा मे गेथा, जां तीहया पाप करता हता, नीकाळीन चोखा करही, अने तीहया मारा माणहु रेहे, अने में तीमनो भगवान रेही। मारो चाकर्यो दावुद तीमनो राजो रेहे; अने तीहया आखा नो एकीत गुवाळ्यो रेहे। तीहया मारा नेम पोर चालहे अने मारा रीत्या ने मानीन तीमनी अनसारे चालहे।2 तीहया आहया देस मे रेहे, जीने में मारा चाकर्या याकुब ने आपलो हतो; अने जीनी मे तमारा आड़ा-बुड़ा रेता हता, तीनी मे तीहया अने तीमना सोरा अने सोरा ना सोरा जलम वह़ला रेहे; अने मारो चाकर्यो दावुद जलम तीमनो मुख्यो रेहे। में तीमनी ह़ाते सांती नो वायदो करही; तीहयो जलम नो वायदो ठेरहे; अने में तीमने जागो आपीन गीनती बड़ावही, अने तीमनी वच मे मारो चोखलो जागो जलम बणाय राखही। मारु रेवा नु तम्बु तीमनी वच मे रेहे; अने में तीमनो भगवान रेही, अने तीहया मारा माणहु रेहे।3 जत्यार मारो चोखलो जागो तीमनी वच मे जलम जुगु रेहे, ता आखु राज्य जाण लेहे के में यहोवा ईस्रायल ने चोखो करवा वाळो से।”
Source notes (3)
- Cross-reference परकासीतवाक्य 11:11
- Cross-reference यहेजकेल 34:24
- Cross-reference 2 कुरन्थी 6:16; परकासीतवाक्य 21:3
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.