Skip to content
BibleKenya

Paliya Bible

यहेजकेल 31

मीस्‌र नी बराबरी देवदारु ना झाड़का सी

ग्‌यारवा साल ना तीसरा मयना ना पेल्‌ला दाड़े यहोवा नो आहयो बोल मारीन्‌तां पुग्‌यो: “ए माणेह नी अवल्‌यात,” मीस्‌र ना राजा फीरोन अने तीनी भीड़ ने के, तारी बड़ाय मे तु कोय ने तेवु से। देख, अस्‌सुर ते लबानोन नु एक देवदार नाम नु झाड़ हतु जीना घटाळ्‌ळा-घटाळ्‌ळा डाळ्‌या हता; अने तीना सींडा वादळे तक पुगता हता। पाणी तीने वदाड़्‌यु, अने उंडु पाणी ना कारण सी तीहयु उचु हयु, जीनी सी नंद्‌या तीनी च्‌यारो-मेर वयती हती; अने तीना कोतड़्‌या नीकळीन मेदान ना आखा झाड़ुन्‌तां पुगता हता। आहया कारण सी तीनी उचाय मेदान ना आखा झाड़ु सी जादा हयी; तीना डाळ्‌या घणा नीकळ्‌या, अने तीना डाळ्‌या नाम्‌बा हय ज्‌या, काहाके जत्‌यार तीहया नीकळ्‌या, ता तीमने घणु पाणी जड़्‌यु। तीना डाळ्‌या पोर वादळा ना आखा चड़ा पोतरो बांदता हता, अने तीना डाळ्‌या तळे मेदान ना आखा भाती ना जीव-जन्‌तु पयदा हयला हता; अने तीना छाहळा मे आखा मोट्‌ला राज्‌य रेता हता। तीहयु तीनी लम्‌बाय अने तीना डाळ्‌या नी लम्‌बाय का कारण सी घटाळु हयु; काहाके तीना मुळ्‌या घणु पाणी नी ह़ाते हता। भगवान नी वाड़ी ना देवदारु झाड़ बी तीने नी ढाक सकता हता, सनोवर झाड़ तीना डाळ्‌यान बराबर बी नी हता, अने नी अर्‌मोन झाड़ तीना डाळ्‌यान तेवु हतु; भगवान नी वाड़ी नु कानु बी झाड़ तीनी बराबर घटाळ्‌ळु नी हतु। में तीने ढेरका डाळ्‌या वेर घटाळ्‌ळु बणावलो हतो, आञे तक के अदन ना आखा झाड़ जे भगवान नी वाड़ी मे हता, तीनी सी रीह करता हता।

करीन मालीक भगवान आसम केदलो से: तीनी उचाय जे बड़ जेली से, तीनी सींडी जे वादळे तक पुगली से, अने तीनी उचाय ना कारण सी तीनु मन घमंड सी भराय जेलु से, करीन राज्‌य मे जे ताखत वाळु से, में तीनात हात मे तीने कर देही, अने तीहयो पक्‌को तीनी ह़ाते गलत वेहवार करहे। तीना गलत कामु का कारण सी में तीने नीकाळ देदलो से। बीजा देस वाळा, जे राज्‌य मे घणा-जुदा माणहु से, तीहया तीने तोड़ीन छोड़ देहे, तीना डाळ्‌या बड़ा पोर, अने आखा घाट्‌या मे पाड़ देहे, अने तीना डाळ्‌या देस ना आखा कोतड़ा मे टुटला पड़ रेहे, अने राज्‌य-राज्‌य ना आखा माणहु तीना छाहळा ने छोड़ीन जत रेहे। तीहया पड़ला झाड़ पोर वादळा ना आखा चड़ा पोतरो बांदे, अने डाळ्‌या नी उपर मेदान ना आखा जीव-जन्‌तु चड़वा बाज जहे। आहयु आनीन करते हयु के पाणीन्‌तां ना झाड़ु मे गेथु कानु बी झाड़ आह़फु नी उचाय नी बड़ावे, अने नी सींडी ने वादळा मे तक पुगाड़े, अने तीमनी मे जेतरा पाणी हात करीन मजबुत हय जेला से तीहया उचा हयवा ना कारण सी मुंडु नी उचु कर्‌या; काहाके तीमने बी आखान-आखा ने मड़ाट्‌या मे गड़ायला माणहुन तेम मोत ना हक मे आपीन पताळ मे नाख देहे। भगवान यहोवा आसम केय: जे दाड़े तीहयु पताळ मे उतरी ज्‌यु, तीहया दाड़े में दुख करायो अने उंडलु पाणी ने ढाक देदो, अने नंद्‌या नु घणु पाणी रोकाय ज्‌यु, अने तीना कारण सी में लबानोन ने दुख मे डुबाड़ देदो, अने मेदान ना आखा झाड़ चीमाय ज्‌या। जत्‌यार में तीने मड़ाट्‌या मे गाड़लान्‌तां पताळ मे नाख देदो, ता तीनी पड़वा नी अवाज सी राज्‌य-राज्‌य काप उठ्‌यु, अने अदन ना बगीचा ना आखा झाड़ मतलब लबानोन ना वारला-वारला जेतरा झाड़का ने तीनी मे गेथु पाणी जड़तु हतु, तीहया आखा पताळ मे सांती हात कर्‌या। तीहया बी तीनी ह़ाते तलवार वेर मारलान्‌तां पताळ मे उतर ज्‌या; मतलब तीहया जे तीना हात हता, अने राज्‌य-राज्‌य नी वच मे तीना छाहळा मे रेता हता। “करीन महीमा अने बड़ाय ना बारा मे अदन बगीचा ना झाड़ु मे गेथु तु कोय ने तेवु से? तने ते अदन बगीचा ना बीजा झाड़का ह़ाते पताळ मे उतार देहे, अने खतना वगर ना माणहु नी वच मे तलवार वेर मारला नी ह़ाते पड़ रेही। फीरोन अने तीना माणहु नो हाल आसमेत हयहे, भगवान यहोवा आसमेत केय।”

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.