Paliya Bible
यहेजकेल 30
भगवान मीस्र देस ने डंड आपहे
अळतेण यहोवा नो आहयो बोल मारीन्तां पुग्यो: “ए माणेह नी अवल्यात,” भगवान वगे गेथी वात कीन के, भगवान यहोवा आसम केय: छाती ठोकीन रड़ो: गरा आय पड़े! गरा नो दाड़ो आय पड़्यो! काहाके तीहयो दाड़ो मतलब यहोवा नो दाड़ो ह़ाते से; तीहयो वादळा नो दाड़ो, अने राज्य ना डंड नी टेम रेहे। मीस्र मे तलवार चालहे, अने मीस्र मे माणहु टुटी-टुटीन पड़हे, ता कुस देस मे बी बीक भराय जहे, माणहु मीस्र देस ने लुट लीजहे, अने तीनी नीव ने ओदार देहे। कुस, पुत, लुद, अने दोगले अने कुब देस ना माणहु ने, अने वायदो करला देस मे रेवा वाळा ने, मीस्री माणहुम नी ह़ाते तलवार वेर मार नाखहे। “यहोवा आसम केय: मीस्र ना ह़माळवा वाळा बी पड़ जहे, अने आह़फाम नी जे ताखत पोर मीस्री माणहु घमंड करे, तीहयी टुटहे; मीगदोल ह़ेर गेथा लगाड़ीन सवेने ह़ेर तक तीना रेवा वाळा ने तलवार वेर मारहे, भगवान यहोवा आसमेत केय। तीहया उजड़ला देस नी वच मे उजड़ला ठेरहे, अने तीमना ह़ेर उजाड़ करला ह़ेरु मे गीणायहे। जत्यार में मीस्र मे आक्ठु धपाड़ही अने तीना आखा मदत करन्या खत्तम हयहे, ता तीहया जाण लेहे के में यहोवा से।
“तीहयी टेमे मारी अगळ गेथा दुत ढुंड्या पोर चड़ीन बीह्या वगर जहे अने कुस देस वाळा ने बीहाड़हे; अने तीमनी पोर एवी वेला आय पड़हे जेम के मीस्री माणहु ना डंड नी टेमे आवली; काहाके देख, तीहयो दाड़ो आवे!” भगवान यहोवा आसम केय: “में बेबीलोन ना राजा नबुकदनेस्सर ना हात सी मीस्री नी भीड़ ने खत्तम कराय देही। तीहयो आह़फा ना माणहु भेळ, आखु राज्य मे घणो-जुदो से, तीहयो देस ने खत्तम करवा करीन आवहे। अने तीहया मीस्र देस ना वीरोद मे तलवार हापकीन देस ने मरला सी भर देहे। में नंद्या ने ह़ुकाड़ देही, अने देस ने बुरा माणहु ना हात मे ह़ोप देही; अने में बीजा देस वाळा नी लारे देस ने, अने जे कंय तीनी मे से, उजाड़ कराय देही; में यहोवात आहयु केदलो से।” “भगवान यहोवा आसम केय: में नोप ह़ेर मे गेथा मुरत्या ने खत्तम करही अने तीनी मे ना मुरत्या ने रेवा नी देम; अळतेण कोय बी मुख्यो मीस्र देस मे नी उठे; अने में मीस्र देस मे बीक उबजाड़ही। में पत्रोस ह़ेर ने उजाड़ही, अने सोवन ह़ेर मे आक्ठु धपाड़ही, अने नो ह़ेर ने डंड आपही। सीन ह़ेर जे मीस्र देस नो कीलो से, तीनी पोर मारी रीह नीकाळही। अने नो ह़ेर नी भीड़ ने खत्तम कर देही। में मीस्र देस मे आक्ठु धपाड़ही; सीन ह़ेर घणु थतरहे; अने नो ह़ेर ना भीतड़ा मे चीह पड़ जहे अने नो ह़ेर ना वीरोदी दीहुत उठहे। आवेन ह़ेर अने पीवेसेत ह़ेर ना जुवान ने तलवार वेर मारहे, अने आहया ह़ेर गुलामी मे जत रेहे। जत्यार में मीस्री माणहु ना राज्य ने तहपन्हेस मे खत्तम करही, ता तीनी मे दीहु अंदारु रेहे, अने तीनी ताखत जीनी पोर तीहयु घमंड करे, तीहयी खत्तम हय जहे; तीनी पोर वादळु छवाय जहे अने तीना सोर्या गुलामी मे जत रेहे। आहयी रीते मे मीस्री माणहु ने डंड आपही। ता तीहया जाण लेहे के में यहोवा से।”
मीस्र ना राजा नी टुटली सक्ती
अळतेण ग्यारवा साल ना पेल्ला मयना ना ह़ातवा दाड़े यहोवा नो आहयो बोल मारीन्तां पुग्यो: “ए माणेह नी अवल्यात, में मीस्र ना राजा फीरोन ना हात तोड़ नाखलो से; अने देख, नी तीने जोड़्या, अने नी तीनी पोर वारु हयवा करीन पट्टी बांदी। तीनी मे एतरी ताखत नी हये के तीहयो तलवार चुट सके। करीन मालीक यहोवा आसम केय: देख, में मीस्र ना राजा फीरोन ना वीरोद मे से, अने तीनो वारलो अने टुटलो बेम हात ने तोड़ही; अने तलवार ने तीना हात मे गेथी पाड़ देही। में मीस्री माणहु ने राज्य-राज्य मे रीवण्या-तीवण्या करही, अने देस-देस मे खोळवी देही। में बेबीलोन ना राजा ना हातु ने मजबुत करीन मारी तलवार तीना हात मे आपही; पण फीरोन ना हातु ने तोड़ही, अने तीहयो तीनी अगळ आसम कंजारहे जेम घाव लागलो मरन्यो कंजारे। में बेबीलोन ना राजा ना हातु ने ह़माळही, अने फीरोन ना हातु ढीला पड़ जहे, ता तीहया जाणहे के में यहोवा से। जत्यार में बेबीलोन ना राजा ना हात मे मारी तलवार आपही, ता तीहयो तीने मीस्र देस पोर चलाड़हे; अने में मीस्री माणहु ने राज्य-राज्य मे रीवण्या-तीवण्या करही अने देस-देस मे खोळवी देही। ता तीहया जाण लेहे के में यहोवा से।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.