Paliya Bible
यहेजकेल 32
मीस्र ना राजा नी बराबरी मोगर ह़ाते
बारवा साल ना बारवा मयना ना पेल्ला दाड़े यहोवा नो आहयो बोल मारीन्तां पुग्यो: “ए माणेह नी अवल्यात,” मीस्र ना राजा फीरोन ना बारा मे दुख नु गीत बणाय्न तीने ह़मळाव: राज्य-राज्य मे तु आह़फा ने जुवान नाहर ने तेवो मान्तो हतो, पण तु दर्या ना मोगर ने तेवो से; तु आह़फा ना नंद्या मे जाय्न, आह़फा ना पोगु वेर पाणी ने डोहळु कर देदलो से। भगवान यहोवा आसम केय: ढेरेत राज्य नी सबा नी लारे तारी पोर मारी जाळ फेलावही अने तीहया तने मारी मोट्ली जाळ मे हापकी लेहे। ता में तने धरती पोर छोड़ीन, अने मेदान मे नाखीन वादळा ना आखा चड़ा ने तारी पोर बहाड़ही; अने तारा मांह सी आखी धरती ना जीव-जन्तु ने अफराड़ही। में तारु मांह ने बड़ा पोर मेकही, अने घाट्या ने तारी उचाय सी भर देही। जे देस मे तु तीरे, तीने बड़ा तक में तारा लोय सी ह़ीचही; अने तीना कोतड़ा तारी सी भराय जहे। जे दाड़े में तने मीटाड़वा बाज जही, तीहयी टेमे में वादळु ने ढाकही अने तारा ने धुदळा कर देही; में दाड़ु ने वादळु वेर ह़ताड़ही, अने चांद तीनु वीजाळु नी आपे।1 ह़रग मे जेतरु वीजाळु वाळु उजड़ से, तीमने आखु ने में तारा कारण सी धुदळा कर देही, अने तारा देस मे अंदारलु कर देही, भगवान यहोवा आसमेत केय।
“जत्यार में तारा खत्तम हयवा नी खबर राज्य-राज्य मे अने तारा अंजाण्या देसु मे फेलावही, ता मोटा-मोटा देसु ना माणहु ना मन मे रीह उबजाड़ही। में घणा-ढेरका राज्य ने तारा कारण सी वहराड़ देही, अने जत्यार में तीमना राजान नी अगळ खुद नी तलवार मोकलही, ता तारा कारण सी बीहीन कापवा बाज जहे, अने तारा पड़वा ना दाड़े तीहया आह़फा-आह़फाम ना जीव जुगु कापता रेहे।”
काहाके भगवान यहोवा आसम केय: बेबीलोन नी तलवार तारी पोर चालहे। में तारी भीड़ ने एवा वारला झुमायण्या नी तलवार नी लारे मारही जे आखु राज्य मे घणा-जुदा से। तीहया मीस्र ना घमंड ने तोड़ देहे, अने तीनी आखी भीड़ खत्तम हय जहे। में तीना आखा जानवरु ने तीना नंद्या-कोतड़ा ना काठे गेथा खत्तम करही; अने आव्वा वाळी टेम मे तीहया नी ते माणहु ना पोगु वेर अने नी जानवरु ना खुर्या वेर डोहळु करे। ता में तीमनु पाणी वारलु कर देही, अने तीना नंद्या तेल ने तेम वयहे, भगवान यहोवा आसमेत केय। जत्यार में मीस्र देस ने उजाड़ देही अने जीनी सी तीहयु पुरुन पुरु से, तीनी सी तीने बांडळ्ळु कर देही, अने जत्यार में तीना आखा रेवा वाळा ने मारही, ता तीहया जाण लेहे के में यहोवा से। “माणहु जुगु दुखी हयवा करीन दुख नु गीत आहयुत से; राज्य-राज्य ना सोर्या आने गावहे; मीस्र अने तीनी आखी भीड़ ना बारा मे तीहया आहयुत दुख नु गीत गावहे, भगवान यहोवा आसमेत केय।”
मरलाम नी कळी
अळतेण बारवा साल ना पेल्ला मयना ना पंदरवा दाड़े यहोवा नो आहयो बोल मारीन्तां पुग्यो: “ए माणेह नी अवल्यात,” मीस्र नी भीड़ जुगु दुखी हय, अने तीने ताखत वाळु राज्य ना सोर्या भेळ मड़ाट्या मे गड़ायलान्तां पताळ मे उतार। तु कोय सी वारु से? तु उतरीन खतना वगर ना नी ह़ाते पड़ रे।
तीहया तलवार वेर मरलाम नी वच मे पड़हे, तीमनी जुगु तलवारेत ठेरावली से; करीन मीस्र ने तीनी भीड़ भेळ घीही ली जावो। ताखत वाळा वारला झुमायण्या तीनी ह़ाते अने तीना मदत करन्या ह़ाते वात करहे; ह़ेला खतना वगर ना माणहु ह़ेले तलवार वेर मरला पड़ र्या।
तीनी आखी सबा भेळ अस्सुरी बी तां से, तीना मड़ाट्या तीनी च्यारो-मेर से; आखान-आखा ने तलवार वेर मार नाखला से। तीना मड़ाट्या खाडा ना खुणा मे बणला से, अने तीना मड़ाट्या नी च्यारो-मेर तीनी सबा से; तीहया आखान-आखा जे जीवाय नी कळ मे बीक उबजाड़ता हता, हाव तलवार वेर मरला पड़ र्या।
ह़ेले एलाम देस से, अने तीना मड़ाट्या नी च्यारो-मेर तीनी आखी भीड़ से; तीहया आखान-आखा ने तलवार वेर मार नाखला से, तीहया खतना वगर ना पताळ मे उतर जेला से; तीहया जीवाय नी कळ मे बीक उबजाड़ता हता, पण हाव मड़ाट्या मे अने गाड़ला नी ह़ाते तीमना मोडा पोर वाक छवाय जेलो से। तीनी आखी भीड़ भेळ तीने मारला नी वच मे खाट्लु जड़्यु, तीना मड़ाट्या तीनीत च्यारो-मेर से, तीहया आखान-आखा ने जे खतना वगर ना से तलवार वेर मारला; तीहया जीवाय नी कळ मे बीक उबजाड़ला हता, पण हाव मड़ाट्या मे अने गाड़ला नी ह़ाते तीमना मोडा पोर वाक छवाय ज्यो; अने तीमने मरला नी वच मे मेकला से।
“तां आखी भीड़ भेळ मेसेक अने तुबल से, तीमनी च्यारो-मेर मड़ाट्या से; तीहया आखान-आखा ने जे खतना वगर ना से तलवार वेर मारला, काहाके तीहया जीवाय की कळ मे बीक उबजाड़ता हता। तीहया पड़ला खतना वगर ना वारला झुमायण्या भेळ तीहया पड़ी नी रेय जे आह़फा-आह़फाम ना हत्यार लीन पताळ मे उतर जेला से, तां तीमनी तलवार तीमना मुंडा नी तळे मेकली से; अने तीमना अधरम ना काम तीमना हाटका मे भरला से; काहाके जीवाय नी कळ मे तीमनी सी वारला झुमायण्या ने बीक लागती हती।
“करीन तु बी खतना वगर ना माणहु ह़ाते कचराय्न तलवार वेर मरलाम नी ह़ाते पड़ रेही।
“तां एदोम अने तीना राजा अने तीना आखा मुख्या से, जे वारला झुमायण्या हयवा पोर बी तलवार वेर मरलाम नी ह़ाते मेकला से; खाडा मे गड़ायला खतना वगर ना माणहु ह़ाते तीहया बी पड़ी रेहे।
“तां दखणाव भणी ना आखा मुख्या अने सीदोन ना बी से जे मरलाम नी ह़ाते उतर जेला; तीहया आह़फाम नी सक्ती सी बीक फेलाड़ला हता, पण तीहया हाव लाजे पड़्या अने तलवार वेर अने मरला नी ह़ाते तीहया बी खतना वगर ना पड़ र्या, अने मड़ाट्या मे बीजा गड़ायला नी ह़ाते तीमना मोडा लाजे पड़ला से।
“ईमने देखीन फीरोन बी आह़फा नी आखी भीड़ जुगु सांती हात करहे, होव फीरोन अने तीनी आखी सेना जे तलवार वेर मरली से,” भगवान यहोवा आसमेत केय।
“काहाके तीहयो बी जीवाय नी कळ मे बीक उबजाड़लो हतो; करीन तीने आखी भीड़ भेळ तलवार सी मरला अने खतना वगर ना मरला नी वच मे ह़ुवाड़हे,” भगवान यहोवा आसमेत केय।
Source notes (1)
- Cross-reference यसाया 13:10; मत्ती 24:29; मरकुस 13:24,25; लुका 21:25; परकासीतवाक्य 6:12,13; 8:12
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.