Paliya Bible
यहेजकेल 17
घुवड़ु नो अने अंगुर ना वेला नो दाखलो
यहोवा नो आहयो बोल मारीन्तां पुग्यो, “ए माणेह नी अवल्यात, ईस्रायल ना घोराणा ने आहयो वारतो अने दाखलो के: मालीक यहोवा आसम केय, एक नाम्बला पाखड़ा वाळी, पीखड़ा सी भरली अने रंगाळी मोट्ली घुवड़ लबानोन देस जाय्न एक देवदार नाम ना झाड़ नी सींडी तोड़ लेदी। ता तीहयी तीहया सींडी नी आखा गेथी उपर नी डाळ ने तोड़ लेदी, अने तीने लेन-देण करवा वाळा ना देस मे ली जाय्न वेपारीम ना एक ह़ेर मे रोप देदी। ता तीहयी देस नु एक बीज लीन वारला खेतर मे चोपी, अने तीने घणु पाणी भरला जागा मे मजनु नाम ना झाड़ ने तेम चोपी। तीहयु बीज उगीन नान्ला फेलवा वाळो अंगुर नो वेलो बण ज्यो जीना डाळ्या घुवड़ भणीन वळ्या, अने तीना मुळ्या तीनी तळेत फेल्या, आहयी रीते तीहयो अंगुर नो वेलो बण ज्यो अने डाळ्या अने पान्टा सी भरायवा बाज ज्यो।
“एक अळी नाम्बा पाखड़ा वाळी अने पीखड़ा सी भरली एक मोट्ली घुवड़ हती; अने तीहयो अंगुर नो वेलो जां तीने चोपलो हतो तीहया जागे गेथो तीहयी बीजी घुवड़ भणीन तीना मुळ्या फेलाव्वा बाज ज्यो अने तीना डाळ्या बी तीनी भणीन वाळवा बाज ज्यो, के तीहयी घुवड़ तीने पाणी आप्या करे। पण तीने ते आनीन करते वारला जागा मे घणु पाणीन्तां चोपलो हतो, के डीरा फोड़े, अने फाले, अने वारला अंगुर नो वेलो बणे।
“करीन तु आहयु के, मालीक यहोवा आसम पुछे: ह़ु तीहयो वेलो फुलहे-फालहे? ह़ु तीहयो तीने थुड़े गेथो नी उखड़े, अने तीना फोळ ने नी झाड़ देय के तीहयो वेलो तीना आखा लील्ला पान्टा भेळ ह़ुक जाय? आने थुड़े गेथो उखड़वा करीन जादा ताखत अने ढेरका माणहु नी जरवत नी पड़े। भले तीहयो चोपलो बी रेय, ते बी तीहयो ह़ु फुलहे-फालहे? जत्यार उगवणु नु वाहळु तीने लागहे, ता ह़ु तीहयो वेलो पुरोत ह़ुकी नी जाय? तीहयो ते जां उगलो से तीहयात जागा मे ह़ुक जहे।”
दाखला नु मतलब
अळतेण यहोवा नो आहयो बोल मारीन्तां पुग्यो: “तीहया बक-बक करवा वाळा घोराणा ने के, ह़ु तमु आहयी वातु नु मतलब नी ह़मजता? अळतेण तीमने के, बेबीलोन नो राजो यरुसलेम जाय्न यरुसलेम ना राजा अने बीजा मुख्याम ने बांदीन आह़फान्तां बेबीलोन मे पुगाड़्यो। तीहयो राज घोराणा ना एक अदमी ने लेदो अने तीनी ह़ाते वायदो कर्यो, अने तीने हक मे रेवा नी ह़ाम खवाड़्यो, अने देस ना ताखत वाळा अदमी ने ली ज्यो। के तीहयु राज्य कमजोर रेय अने मुंडु उचु नी कर सके, अने वायदा ने मानवा मे बणीन रेय। ते बी तीहयो घोड़ा अने सेना ना माणहु मांगवा करीन तीना माणहु ने मीस्र मे मोकलीन तीनी ह़ाते धोको कर्यो। ह़ु तीहयो फुलहे-फालहे? ह़ु आवु काम ने करवा वाळो बचहे? ह़ु तीहयो आह़फा नो वायदो तोड़वा पोर बी बच जहे?1
“मालीक यहोवा आसम केय, मारी जीवाय नी ह़ाम” जे राजा नी खवाड़ली ह़ाम ने तीहयो कमजोर जाण्यो, अने तीहयो वायदो तीहयो तोड़्यो, तीनीन्तां जीने तीहयो राजो बणावलो हतो, मतलब बेबीलोन मेत तीहयो तीनीन्तांत मर जहे। जत्यार तीहया घणा जीव ने खत्तम करवा करीन हालर बांदे, अने कीलो बणावे, ता फीरोन आह़फा नी मोट्ली सेना अने घणा नी मंडळी रेहे ते बी झुमायवा मे तीनी मदत नी करे। काहाके तीहयो ह़ाम ने फालतु ह़मज्यो, अने वायदा ने तोड़्यो; देखो, तीहयो वायदो करवा पोर बी एवा-एवा काम करलो से, करीन तीहयो बची नी सके।
मालीक यहोवा आसम केय: “मारी जीवाय नी ह़ाम, तीहयो मारी ह़ाम ने फालतु ह़मज्यो, अने मारो वायदो तोड़लो से; आहयो पाप में तीनात मुंडा पोर नाखही। में मारी जाळ तीना मुंडा पोर फेलावही अने तीहयो मारी फांद मे फसहे; अने में तीने बेबीलोन मे पुगाड़ीन तीहया भरहो तोड़्यो तीनो मुकदमो तीनी ह़ाते लड़ही, जे तीहयो मारी ह़ाते करलो से। तीना टोळा मे गेथा जेतरा बी नाहे तीहया आखा तलवार सी मरहे, अने जे री जाय तीहया च्यारो-मेर रीवण्या-तीवण्या हय जहे। ता तमु जाण लेहु के में यहोवात आसम केदलो से।”
भगवान नो वायदो
अळतेण मालीक यहोवा आसम केय:
“में बी देवदार नाम ना झाड़ नी उची सींडी मे गेथा
थोड़ाक लीन चोपही,
अने तीनी आखा गेथी उपरवाळी डाळु मे गेथी एक कुमळ्ळी डाळ तोड़ीन एक घणा उचा बड़ा पोर चोपही,
मतलब ईस्रायल ना उचा बड़ा पोर चोपही;
ता तीहयी डाळ्या सोड़ीन ताखत वाळु
अने वारलु देवदार नाम ना झाड़ बण जहे,
अने तीनी तळे मतलब तीना छाहळा मे
भाती-भाती ना आखा चड़ा पोतरो बांदहे।
ता चोवगान मे वाळा आखा झाड़का जाण लेहे के
में यहोवात उचा झाड़ ने नीचु
अने नीचु झाड़ ने उचु करलो से,
लील्ला झाड़ ने ह़ुकाड़ नाख्यो,
अने ह़ुकलु झाड़ ने फुलाड़्यो-फलाड़्यो,
में यहोवात आहयु केदो अने तेमेत करी बी देदलो से।”
Source notes (1)
- Cross-reference 1 राजा 14:15-20; 2 ईतीहास 36:10-13
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.