Paliya Bible
यहेजकेल 18
खुद नी जीम्मेदारी
अळतेण यहोवा नो आहयो बोल मारीन्तां पुग्यो: “तमु जे ईस्रायल देस ना बारा मे आहयी कहावत केवो?”
खाट्ला अंगुर ते खादा आड़ा-बुड़ा,
पण दात खटाया सोरा ना। आनु ह़ु मतलब से?1
“मालीक यहोवा आसम केय के मारी जीवाय नी ह़ाम,” तमु ने ईस्रायल मे अळी आहयी कहावत केवा नो मोखो नी जड़े। देखो, आखा ना जीव ते मारा से, जेम बाह नो जीव, तेमेत सोरा नो जीव बी से; बेम मारात से। करीन जे जीव पाप करे तीहयोत मरहे।
“जे कोय धरमी से, अने नीयाव ना अने धरम ना काम करे, अने नी ते बड़ा ना पुजा करवा ना जागा मे खाणु खादो हय, अने नी ईस्रायल ना घोराणाम ना मुरत्या भणीन नींगा नाख्यो हय; अने नी बीजी बयर ने बगाड़्यो हय, अने नी मयना आवली बयर ह़ाते छीनाळु कर्यो हय। अने नी कोय पांह लुच्चाय कर्यो हय, अने करजा वाळा नो करजो माप कर्यो हय, अने भुकला ने आह़फा नो रोट्लो आप्यो हय अने नांगरला ने लुगड़ु ओडाड़्यो हय, अने नी वीयाज सी पय्हा आप्यो हय, अने नी वदु पय्हा लेदो हय, अने आह़फा नो हात गलत काम सी रोक्यो हय, माणहु नी वच मे सच्चाय सी नीयाव कर्यो हय, मारी रीती पोर चालतो हय अने मारा नेम ने मान्तो जाय्न सच्चाय सी काम कर्यो हय, आवो माणेह धरमी से, तीहयो पक्को जीवत्लो रेहे,” मालीक यहोवा आसमेत केय।2
“पण तीनो सोरो डाकु, हत्यारो, नीता उपर केदला पापु मे गेथो काना बी पाप ने करवा वाळो हय, अने उपर केदला वारला कामु ने करवा वाळो नी हय, अने बड़ा मे ना पुजा करवा ना जागा मे खाणु खादो हय, अने बीजी बयर ने बगाड़्यो हय, कमजोर गरीब ने वेला पाड़्यो हय, बीजा ने लुट्यो हय, अने कर्जा वाळा नु गीरवे मेकलु ह़मान पासु नी आप्यो हय, अने मुरत्या भणीन नींगा नाख्यो हय, ह़ीगी आवे एवु काम कर्यो हय, वीयाज सी पय्हा आप्यो हय, अने वदु पय्हा लेदो हय, ता ह़ु तीहयो जीवत्लो रेहे? तीहयो जीवत्लो नी रेय; आनीन करते के तीहयो आहया आखा ह़ीगी आवे एवा काम करलो से तीहयो पक्को मरहे अने तीनी मोत नो गुनो तीनात माथे पड़हे।
“अळतेण कदीम एवा माणेह नो सोरो हय अने तीहयो बाह ना आहया आखा पाप देखीन बीक ना कारण सी तीमनीन तेम नी करतो हय। मतलब नी ते बड़ा मे ना पुजा करवा ना जागा मे खाणु खादो हय, नी ते ईस्रायल ना घोराणा ना मुरत्या भणीन नींगा नाख्यो हय, अने नी बीजी बयर ने बगाड़्यो हय, अने नी कोय ने वेला पाड़्यो हय, अने नी कर्जा वाळा नु गीरवे मेकलु ह़मान नी लुट्यो हय, अने आह़फा नो रोट्लो भुकला ने आप्यो हय, नांगरला ने लुगड़ा ओडाड़्यो हय, कमजोर नु नुकसान करवा मे हात ने रोक्यो हय, वीयाज अने वदु पय्हा नी लेदो हय, मारा नेम ने मान्यो हय, अने मारी रीती पोर चाल्यो हय, ता तीहयो तीना बाह ना अधरम ना कारण सी नी मरे, पण जीवत्लोत रेहे। तीनो बाह, जे गरीब माणहु ने वेला पाड़्यो अने लुट्यो, अने आह़फा ना भायु नी वच मे गलत काम करलो से, तीहयोत तीना अधरम ना कारण सी मर जहे।
“ते बी तमु केवो, काहा? ह़ु सोरो बाह ना अधरम नो भार नी उचले? जत्यार सोरो नीयाव ना अने धरम ना काम कर्यो हय, अने मारी आखी रीती ने मानीन तीमनी पोर चाल्यो हय, ता तीहयो जीवत्लोत रेहे। जे पाप करहे तीहयोत जीव मरहे, नी ते सोरो बाह ना अधरम नो भार उचले नी बाह सोरा नो, धरमी ने आह़फा नात धरम नो फोळ, अने वेरी ने आह़फा नात पाप नो फोळ जड़हे।3
“पण कदीम वेरी माणेह आह़फा ना पाप भणी गेथु फीरीन, मारी आखी रीती ने पाळे अने नीयाव अने धरम ना काम करे, ता तीहयो नी मरे, पण जीवत्लो रेहे। तीहयो जेतरो गुनो करलो हय, तीमनी मे गेथा एक बी गुना नी फोम तीना वीरोद मे नी करे; जे धरम ना काम तीहयो कर्यो हय, तीना कारण सी तीहयो जीवत्लो रेहे। मालीक यहोवा आसमेत केय, ह़ु में वेरी ने मरवा सी थोड़ोक बी खुस हयु ह़ु? ह़ु में आनी सी खुस नी हयु के तीहयो तीनी वाटे गेथो फीरीन जीवत्लो रेय?
“पण जत्यार धरमी तीना धरम ना काम सी फीरीन गलत काम, मतलब वेरी ना आखा ह़ीगी आवे एवा कामु नी अनसारे करवा बाज जाय, ता ह़ु तीहयो जीवत्लो रेहे? जेतरा धरम ना काम तीहयो कर्यो हय, तीमनी मे गेथा काना काम नी बी फोम नी करे। जे धोको अने पाप तीहयो कर्यो हय, तीना कारण सी तीहयो मर जहे।
“ते बी तमु केवो, ‘मालीक नो वेहवार वारु नी हय।’ ए ईस्रायल ना घोराणा, देख, ह़ु मारो वेहवार वारु नी हय? ह़ु तमारी चाल बगड़ली नी हय ह़ु? जत्यार धरमी तीना धरम भणी गेथो फीरीन, गलत काम करवा बाज जाय, ता तीहयो तीहया काम ना कारण सी मरहे, मतलब तीहयो तीना गलत कामु ना कारण सीत मर जहे। अने कदीम वेरी तीना गलत कामु सी फीरीन, नीयाव अने धरम ना काम करवा बाज जाय, ता तीहयो तीनो जीव बचाड़हे। तीहयो जे सोच वीच्यार करीन आह़फा ना आखा गुना सी फीर्यो, करीन नी मरे, अने जीवत्लोत रेहे। ते बी ईस्रायल नु घोराणु केय के मालीक नो वेहवार वारलो नी हय। ए ईस्रायल ना घोराणा, ह़ु मारो वेहवार वारलो नी हय? ह़ु तमारीत चाल बगड़ली नी हय?
“मालीक यहोवा आसम केय, ए ईस्रायल ना घोराणा, में तमारी मे गेथो एक-एक माणेह नो नीयाव तीनी चाल-चलण नी अनसारेत करही। मन फीरावो अने आह़फाम ना आखा गुना ने छोड़ो, तात तमारो अधरम तमारा ठोकर खावा नो कारण नी बणे। आह़फाम ना आखा गुना ने जे तमु करला से, सेटा करो; आह़फाम नु मन अने आह़फाम नी आत्मा ने बदल देवो! ए ईस्रायल ना घोराणा, तमु ह़ुका मरो? काहाके, मालीक यहोवा आसम केय, जे मरे,” तीने मरवा सी में खुस नी हयु, “करीन मन फीरावो, तात तमु जीवत्ला रेहु।”
Source notes (3)
- Cross-reference यीरम्या 31:29
- Cross-reference लेव्यवेवस्था 18:5
- Cross-reference वेवस्थावीवरन 24:16
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.